تورکمانەکان ڕەخنە لە لایەنە سیاسیەکان دەگرن

هەواڵ / کوردستان :: 10/12/2019‌ :: 160‌ جار بینراوە

دواڕۆژ، بڕیار محەمەد 

بەهۆی دەنگنەدان بە پێشنیازی یاسای (ڕۆژانی بۆنه‌ فه‌رمییه‌كانی نه‌ته‌وه‌ی توركمان)، ئەمڕۆ سێشەممە ۱۰ی کانوونی یەکەمی ۲۰۱۹  تورکمانەکان ڕەخنەیان لەبەشێک لەلایەنە سیاسیەکان گرت.

محمد سەعدەدین سەرۆکی فراکسیۆنی پارتی گەشەپێدانی تورکمانی لەکۆنفڕانسێکی ڕۆژنامەوانیدا ڕایگەیاند: بەداخەوە ئەمڕۆ ڕووبەڕووی شتێکی چاوەڕوان نەکراو بوونەوە کەوا هەندێ لایەنی سیاسی کە نزیکەی لە ٤۰٪ی دەنگی پەڕلەمان پێکدەهێنن، دەنگیان بە پێدانی سیفەتی بەپەلە بۆ پێشنیازی یاسای 
 (ڕۆژانی بۆنه‌ فه‌رمییه‌كانی نه‌ته‌وه‌ی توركمان) نەدا.

دەشڵێت: "ئێمە هەموومان بەیەکەوە لەسەر گۆڕەپانی سیاسی هەرێم کاردەکەین و ڕێککەوتن هەبووە پێشتر لەنێوان هەموو لایەنەکان و ئێمە دەنگمان داوە بۆ ئەو لایەنانە، کەچی ئەمڕۆ بۆ ئەو پێشنیازە دەنگیان نەدا، لەکاتێکدا لەکۆوونەوەکانیان لەگەڵ ئێمەی تورکمان و لەسەر شاشەکان دەڵێن ئێمە لەگەڵ پێکەوە ژیانین لەهەرێمی کوردستان".

ئەوەشی خستەڕوو: چیتر پێویست ناکات ئەولایەنانە باس لە پێکەوەژیان بکەن لەگەڵمان، داوای ڕوونکڕدنەوەش لەکەسی یەکەم یاخوود مەکتەب سیاسی ئەو لایەنانە دەکەین ڕوونکردنەوە بدەن کەوا ئەوە هەڵوێستی فەڕمیانە یاخوود فڕاکسیۆنەکەیان.

ئەمڕۆ خوێندنەوەی یەکەم بۆ پێشنیازی یاسای (ڕۆژانی بۆنه‌ فه‌رمییه‌كانی نه‌ته‌وه‌ی توركمان)، پێشنیاری پێدانی سیفەتی بەپەلەشی بۆ خرایە دەنگدان، بەڵام تەنها ٥٥ دەنگی هێنا، هەریەکە لە یەکێتی و گۆڕان و یەکگرتوو و کۆمەڵ و نەوەی نوێ دەنگیان پێ نەدا.

 

ک. س



  • ڕۆژ
  • هەفتە
  • مانگ
created by Avesta Group and powered by Microsoft Azure