لە شوقەیەکی هەولێردا رووداوێکی دڵتەزێن روویدا

هەواڵ / کوردستان :: 07/12/2019‌ :: 8862‌ جار بینراوە

دواڕۆژ، هانا چۆمانی 

بەرەبەیانی ئەمڕۆ شەممە 7ی کانوونی یەکەمی 2019 ئاگر لە نهۆمی 17ی شوقەکانی ئێم ئاڕ ئێف لە شاری هەولێر کەوتەوە و بەهۆیەوە دوو کەس برینداربوون و کەسێکش گیانی لەدەستدا.

لەوبارەیەوە، کامەران رەسوڵ کە خاوەن نووسینگەیە لە ئێم ئار ئێف و هاوکات رۆژانە لەوێدا دەوام دەکات بۆ دواڕۆژ وتی: "رووداوەکە بەرەبەیانی ئەمڕۆ بووە و ئەو شوێنە بۆ نووسینگە بەکرێ گیراوە، بەڵام ئەو سێ هاووڵاتییە کوردە کە خەڵکی شاری دهۆکن شەوان لەوێدا ماونەتەوە و کاریشیان کردووە، شەوی رابوردوو ئاگرەکە کەوتووەتەوە دووانیان برینداربوون و یەکێکیشیان گیانی لەدەستداوە".

وتیشی: "هەرسێکیان ناسیاوی یەکترن و هۆکاری ئاگرەکەش نازانرێت و هەرچەندە سیستمی ئاگرکوژێنەوەی بەهێز هەیە لەباڵەخانەکەدا، بەڵام بەهۆی ئەوەی رووداوەکە بێ ئاگادارکردنەوە بووە و ئەوانیش خۆیان نەیانتوانیوە سود لە ئاگرکوژێنەوەکان وەربگرن بەداخەوە ئەو رووداوە روویداوە".

لەبارەی رووداوەکەوە رائید سەرکەوت ئەحمەد، ئەفسەری بەڕێوەبەرایەتی بەرگری شارستانی هەولێر تایبەت بۆ دواڕۆژ دەڵێت: "لە رووداوەکەدا سێ هاووڵاتی بوونەتە قوربانی و لەناویاندا دوو کەس بریندارن و بەشێکی جەستەیان سوتاوە و یەکێکی دیکەش گیانی لەدەستداوە، هاووڵاتیەکانیش خەڵکی شاری دهۆکن و لەو شوقەیەدا نیشتەجێبوون".

وتیشی: "رووداوەکە لە نهۆمی 17ی شوقەکانی ئێم ئار ئێف بووە، تائێستا ئێمە نازانین هۆکاری رووداوەکە چییە،  بەڵام لێکۆڵینەوە دەستیپێکردووە و خەریکی لێکۆڵینەوەین".

پ: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure