سیماكانی شاری سلێمانی لەپێشانگەیەكی شێوەكاریدا

هەواڵ / که‌لتور :: 24/11/2019‌ :: 396‌ جار بینراوە

دواڕۆژ، پشتیوان جەمال

بەبۆنەی ناساندنی شاری سلێمانی لەلایەن رێكخراوی یونسكۆوە وەك شاری داهێنەری ئەدەب، پێشانگەیەكی شێوەكاری بۆ ناساندنی سیماكانی ئەو شارە كرایەوە.

ئەمشەو 24ی تشرینی دووەمی 2019 بنكەی ئەدەبی و رووناكبیری گەلاوێژ لە هۆتێل رامادا لەشاری سلێمانی ئاهەنگێكی خێزانی بەبۆنەی ناساندنی شاری سلێمانی لەلایەن رێكخراوی یونسكۆوە وەك شاری داهێنەری ئەدەب سازكرد و لەبەشێكیدا لەلایەن هێمن جەمیل فۆتۆگرافەر، پێشانگەیەكی شێوەكاری كرایەوە.

هێمن جەمیل بەدواڕۆژی راگەیاند: وێنەكانی پێشانگەكە تایبەتن بەشاری سلێمانی و وێنەكانیش لەدوو ساڵ كاركردن تا هەفتەیەك لەمەوبەریشی تیادایە و هەوڵیداوە پیشە كۆنەكان، ئەو شوێنانەی مۆركی سلێمانییان پێوە دیارە لەوێنەكاندا رەنگ بداتەوە.

ناوبراو روونیكردەوە: زۆر گرنگە شاری سلێمانی لەلایەن یۆنسكۆوە ناسێنراوە، چونكە پێشتر لەناوخۆدا پایتەختی رۆشنبیری بوو، بەڵام ئێستا رێكخراوێكی نێودەوڵەتی دانی پیادا دەنێت، بۆیە دەكرێت فۆتۆگرافەكان پلانی تایبەتیان هەبێت بۆ خستنەڕووی سیماكانی سلێمانی.

رۆژی 31ی تشرینی یەكەمی 2019 رێكخراوی یونسكۆ بە رەسمی شاری سلێمانی وەك شاری داهێنەری ئەدەب و شاری سنەی خۆرهەڵاتیش وەك شاری داهێنەری میوزیك ناساند.

پ: چ.ع



created by Avesta Group and powered by Microsoft Azure