جه‌مال كۆچه‌ر: مووچه‌یێن فه‌رمانبه‌رێن هه‌رێما كوردستانێ دێ هێن‌ گه‌ره‌نتیكرن

هەواڵ / کوردستان :: پێش 2 هەفتە ‌ :: 12445‌ جار بینراوە

دواڕۆژ، دهۆك

په‌رله‌مانتاره‌كێ ئێكگرتوو ئیسلامى كوردستان ل جڤاتا نوونه‌رێن ئیراقێ، راگه‌هاند: ئه‌گه‌ر حكومه‌تا هه‌رێما كوردستانێ، پشكه‌كا په‌ترۆلا خوه‌ راده‌ستى حكومه‌تا ئیراقێ بكه‌ت، هنارتنا مووچه‌یێن فه‌رمانبه‌رێن كوردستانێ دێ ژ ئالیێ حكو‌مه‌تا ئیراقێ هێنه‌ گه‌ره‌نتیكرن.


ئه‌ڤرۆ هه‌ینى 22-ێ چڕیا پاشى 2019، سامر غه‌سبان، وه‌زیرێ په‌ترۆلا ئیراقێ، خوه‌یاكر:"هه‌رێما كوردستانێ ب رێیا هێلا جیهان، دێ رۆژانه‌ 250 هزار به‌رمیلێن په‌ترۆلێ راده‌ستى كۆمپانییا سۆمۆ كه‌ت".

لدۆر ڤێ داخوه‌یانییا وه‌زیرێ په‌ترۆلا ئیراقێ، جه‌مال كۆچه‌ر، ئه‌ندامێ جڤاتا نوونه‌رێن ئیراقێ گۆت:"ئه‌گه‌ر حكومه‌تا هه‌رێما كوردستانێ، 250 هزار به‌رمیلێن په‌ترۆلێ، رۆژانه‌ راده‌ستى سۆمۆ بكه‌ت، سالا 2020 هاتنا مووچه‌یێن فه‌رمانبه‌رێ، هه‌رێما كوردستانێ ژ ئالیێ به‌غدا هێنه‌ گه‌ره‌‌نتیكرن".

ناڤبۆرى دازانین:"ب ڤێ رێككه‌ڤتنێ پارێزگه‌هێن هه‌رێما كوردستانێ ژ بوددجه‌یا ئیراقێ یا سالا 2020-ێ، گه‌له‌ك مفاداربن و لدووڤ رێككه‌ڤتنا ئیراقێ دگه‌ل وه‌لاتێ چینێ پارێزگه‌هێن هه‌رێما كوردستانێ دێ‌ ب ره‌نگه‌كێ باش مفاداربن، چنكو گه‌له‌ك پرۆژه‌ ل هه‌رێما كوردستانێ دێ هێنه‌ چێكرن".

لدۆر دانا قه‌رزێن سه‌ر حكومه‌تا هه‌رێما كوردستانێ ژى، كۆچه‌ر د وێ باوه‌رێدابوو؛ ئه‌گه‌ر حكومه‌تا هه‌رێمێ ب درووستى مفاى ژ داهاتێن ناڤخوه‌ ببینیت و كه‌رتێ په‌ترۆلێ باش پێشڤه‌به‌ت و گه‌نده‌لیێ نه‌هێلیت، دێ شێت گه‌له‌ك ب سانه‌هى قه‌رزێن خوه‌ ده‌ت.

لدووڤ رێككه‌ڤتنا حكومه‌تا ئیراقێ و هه‌رێما كوردستانێ لسه‌ر بوددجه‌یا 2019-ێ، پێدڤیبوو هه‌رێما كوردستانێ رۆژانه‌ 250 هزار به‌رمیلێن په‌ترۆلێ، راده‌ستى حكومه‌تا ئیراقێ كربان، لێ حكومه‌تا هه‌رێما كوردستانێ، ئه‌ڤ ساله،‌ پابه‌ندى وێ رێككه‌ڤتنێ نه‌بوو و چۆ په‌ترۆل راده‌ست نه‌كربوو.

بڵاوكردنه‌وه‌: ئیحسانی مه‌لا فوئاد



created by Avesta Group and powered by Microsoft Azure