فەرمانی دەستگیرکردن بۆ ژمارەیەک بەرپرسی کەرکوک دەرچوو

هەواڵ / کوردستان :: پێش 2 هەفتە ‌ :: 435‌ جار بینراوە

دواڕۆژ، عیماد جەباری

دەستەی دەستپاکی کەرکوک ئاشکرایکرد کە فەرمانی دەستگیرکردن و بانگێشتی ژمارەیەک لەبەرپرسانی کەرکوک کراوە بۆ بەردەم دادگا.


بەپێی بەیاننامەیەکی دەستەی دەستپاکی عێراق، فەرمانگەی لێکۆڵینەوەی دەستەکەیان دوای لێکۆڵینەوە چەند دۆسیەکی رەوانەی دادگا کردووە، لەسەر بنەمای ئەو لێکۆڵینەوانەش دادگا فەرمانیکردووە بە بانگهێشتکردنی یاریدەدەری پارێزگاری کەرکوک بۆ کاروباری هونەری بەپێی مادەی ٣٣١ی یاسای سزادانی عێراقی.

بەپێی بەیاننامەکە، دادگا بانگهێشتی سەرۆکی پێشوی زانکۆی کەرکوک و یاریدەدەری زانستی سەرۆکی زانکۆ و سەرۆکی بەشی یاسایی زانکۆی کردووە.

دەستەی دەستپاکی ئەوەشی خستوەتەڕوو کە فەرمانی دەستگیرکردن بۆ ١٠ بەرپرس دەرچووە لە کۆمپانیای بەروبوومە نەوتییەکانی کەرکوک کە لەنێوان ساڵانی ٢٠١٥ بۆ ٢٠١٨ بەرپرسیارێتیان لەمستودعی کۆندا هەبووە بەپێی مادەی ٣٤٩ی سزادان.

هەر بەپێی بەیاننامەکەی دەستپاکی، فەرمانی دەستگیرکردن بۆ قایمقامی پێشوی داقوق دەرچووە بەپێی مادەی ٣٢٢ی یاسای سزادانی عێراقی.

دەستەی دەستپاکی عێراق لەسەرەتای ئەم مانگەوە، ٦٠ فەرمانی دەستگیرکردن و بانگهێشتنامەی راگەیاندووە کە بۆ پەرلەمانتاران و بەرپرسانی خۆجێیی پارێزگاکان دەرچووە بەهۆی تێوەگلانیان بەگەندەڵی و زیان گەیاندن بە بەبودجەی گشتی.

 

ک. س



created by Avesta Group and powered by Microsoft Azure