په‌كه‌كه‌: گه‌ریلا ل شنگال نینن

هەواڵ / کوردستان :: پێش 2 هەفتە ‌ :: 91‌ جار بینراوە

دواڕۆژ، دهۆك

فه‌رمانده‌كێ گه‌ریلایێن پارتییا كاركه‌رێن كوردستانێ ل سنوورێ پارێزگه‌ها دهۆك راگه‌هاند: چۆ هێزێن گه‌ریلا نه‌ماینه‌ ل شنگال.


نێزیكى مه‌هه‌كێ یه‌، ب به‌هانه‌یا لێدان ل گه‌ر‌یلایێن په‌كه‌كێ، باله‌فڕێن تركیا سێ جاران هێرش كرینه‌ سه‌ر چه‌ند ده‌ڤه‌رێن قه‌زا شنگال.

لدوور وان هێرشان، تیرێژ عه‌گید، فه‌رمانده‌یێ گه‌ریلایێن پارتییا كاركه‌رێن كوردستان، ل ده‌ڤه‌را دووسكییان ل سنوورێ پارێزگه‌ها دهۆك، ‌بۆ دواڕۆژ گۆت:"هێرشێن تركیا بۆ سه‌ر شنگال زۆلمه‌كا مه‌زنه‌ لسه‌ر شنگالییان، تركیا بناڤێ هێرشا سه‌ر په‌كه‌كێ، هێرش دكه‌ته‌ سه‌ر سڤیلێن بێگۆنه‌هـ".

عه‌گید گۆتژى:"به‌رى دوو سالان په‌كه‌كێ هه‌موو هێزێن خوه‌ ژ شنگال ڤه‌كێشابوون، نوكه‌، چۆ گه‌ریلایێن په‌كه‌كێ ل شنگال نه‌ماینه‌، لێ هه‌ر جهه‌كێ كورد بوونه‌ خۆدان ئیراده‌ و هه‌ست ب هێزا خوه‌ كر، تركیا هێرش دكه‌ت سه‌ر وان كوردان وه‌كى هێرشێن سه‌ر شنگال".

ده‌رباره‌ى هێرشێن تركیا بۆ سه‌ر باره‌گایێن یه‌كینه‌یێن به‌رخوه‌دانا شنگال (یه‌به‌شه‌)، فه‌رمانده‌یێ په‌كه‌كێ زه‌لالكر:"چۆ په‌یوه‌ندییا وان ب هێزێن(یه‌به‌شه‌) نینه‌، چنكو (یه‌به‌شه‌) هێزه‌كه‌ ژ وه‌لاتیێن شنگال پێكهاتییه‌ و گه‌لێ ئێزدى ل وێ ده‌ڤه‌رێ دپارێزن".

نه‌ورۆزا سالا 2017-ێ په‌كه‌كێ ب فه‌رمى هه‌موو گه‌ریلایێن خوه‌ ل قه‌زا شنگال ڤه‌كێشابوون، لێ هێرشێن تركیا بۆ سه‌ر باره‌گایێن یه‌كینه‌یێن به‌رخوه‌دانا ‌شنگال به‌رده‌وامن و هه‌بوونا وان هێزان وه‌ك په‌كه‌كه‌‌ دبینن.

بڵاوكردنه‌وه‌: ئیحسانی مه‌لا فوئاد



created by Avesta Group and powered by Microsoft Azure