سەرۆ دزەیی: بڕیارەكەی حكومەت مژدەیە بۆ هاووڵاتییان و بەڵێندەران

هەواڵ / چاوپێکەوتن :: پێش 3 هەفتە ‌ :: 1688‌ جار بینراوە
سەرۆ دزەیی

دواڕۆژ، دیدار: سامان قوبادی


 سەرۆكی یەكێتی بەڵێندەرانی كوردستان رایدەگەیەنێت "مژدە دەدەینە خەڵك و بەڵێندەران كە قەرزەكانیان دەدرێتەوە و پارەیش بۆ تەواوكردنی پڕۆژەكان خەرج دەكرێت". دكتۆر سەرۆ دزەیی سەرۆكی یەكێتی بەڵێندەرانی كوردستان، لە دیدارێكی دواڕۆژدا دەڵێت:"حكومەت بڕیاریداوە بە خەرجكردنی پارە بۆ ئەو پڕۆژانەی 85%ی تەواو بووە و پاشان بۆ پڕۆژەكانی تریش، لە مانگی یەك-ی ساڵی داهاتوویشدا بودجە بۆ پڕۆژەكان دابین دەكرێت".

دواڕۆژ: ماوەیەكی زۆرە هیچ بڕە پارەیەك بۆ بەڵێندەران خەرجنەكراوە، دواین زانیاریی لەبارەی خەرجكردنی پارە بۆ بەڵێندەران و پڕۆژەكانیان چییە؟

 سەرۆ دزەیی: لیژنەیەك لە ئەنجومەنی وەزیران پێكهێنراوە بە هەماهەنگی پلاندانان، دیراسەیان كردووە و بڕیاری تایبەت لەلایەن ئەنجومەنی وەزیرانەوە دەرچووە كە ئەو بەڵێندەرانەی زیاتر لە 85%ی پڕۆژەكانیان تەواوكردووە پارەی كاش-یان بۆ خەرج بكرێت، جگەلەوە چەند پڕۆژەیەكیش كە گرنگن، وەك رێگەوبان و سایلۆ، بڕیاردراوە تەواو بكرێن و پارەیان بۆ خەرج بكرێت. هەروەها نزیكەی 1 ملیار و 500 ملیۆن دۆلاریش دانراوە بۆ ئەو پڕۆژانەی بەپەلەن و گرنگن بەتایبەت پرۆژە خزمەتگوزارییەكان.

دواڕۆژ: لە خەرجكردنی بودجەكەدا (ئەولەویەت) بۆ كام پڕۆژانەیە؟
  سەرۆ دزەیی: زیاتر ئەولەویەوت بۆ پڕۆژە خزمەتگوزارییەكانە بەتایبەت رێگەوبان و ئاوی خواردنەوە و ئاوەڕۆ و كارەبا.

دواڕۆژ: كەی بودجە بۆ بەڵێندەران خەرج دەكرێت؟
  سەرۆ دزەیی: بڕیاری لەسەردراوە و ناوی پڕۆژەكانیش نووسراون لە سەرجەم پارێزگاكانی هەرێمی كوردستان، لەدوای بڕیارەكەوە بە بەردەوامیی پارەیان بۆ خەرج دەكرێت، جگە لەوە لە بەرواری 15ی 1 ئەوانەی 75%ی پڕۆژەكانیان تەواوكردووە بودجەیان بۆ خەرج دەكرێت. ئەوانەی 85%ی پڕۆژەكانیان تەواوكردووە و لەبەر بێ پارەیی رایانگرتووە ئەگەر دەست بەكاربكەنەوە لەئێستاوە بۆیان خەرج دەكرێت، داوا لە بەڵێندەران دەكەین بەدەم تەواوكردنی پڕۆژەكانیانەوە بچن.

دواڕۆژ: كۆی بڕی قەرزی بەڵێندەرانی هەرێم لای حكومەت چەندە؟
  سەرۆ دزەیی: نزیكەی 600 ملیار دینار قەرزی بەڵێنەرانی كوردستان لای حكومەتی هەرێمە. كێشەكە لەوەدایە ئەو بەڵێندەرانەی پڕۆژەكانیان راگرتووە دەبێت حكومەت قەرزەكانیان بداتەوە لەگەڵ ئەوەیشدا پارە دابینبكرێت بۆ تەواوكردنی پڕۆژەكانیان، ناكرێت بەڵیندەر دووبارە ئیش بكاتەوە و لەجیاتی پارە چەكی پێبدرێت، بۆیە پێویستە بڕە پارەیەك دابینبكرێت بۆ ئەو پڕۆژانەی تەواونەكراون، ئەمەیش بڕیاری بۆ دەرچووە و قۆناغ بە قۆناغ جێبەجێ دەكرێت. پاشان پارە بۆ ئەو پڕۆژانە خەرج دەكرێت كە 65%ی تەواوكراوە، ئەگەر حكومەت پارەی نەقد بۆ تەواوكردنی پڕۆژەكانیان دابین بكات، بەڵێندەریش دەڵێت با قەرزەكەم لای حكومەت بێت و دەست بە ئیش دەكەمەوە، بەپێی زانیارییەكانمان لە ئاییندەیەكی نزیكیدا حكومەت كۆی قەرزی بەڵێندەران دەداتەوە و لای نامێنێت.

دواڕۆژ: ئایا لەگەڵ وەزیری دارایی هەرێم چیتان كردووە بۆ ئەوەی ئەگەر بەڵێندەر قەرزەكەی پێدرایەوە، هاوكات خەرجكردنی پارە بۆ تەواوكردنی پڕۆژە راگیراوەكان بەردەوام بێت؟
سەرۆ دزەیی: پێشتر لەگەڵ وەزیری دارایی كۆبووینەتەوە، ئەو دەڵێت لەگەڵ بەغدا رێككەوتنی نوێ بكرێت، پارەیش بۆ بەڵێندەران دابین دەكرێت، بەڵام ئەو بڕیارە نوێیەی دەركراوە بۆ ئەو پڕۆژانەی لە قۆناغی كۆتاییدان، نیەتێكی باشی لەپشتەوەیە و بە بەرنامە پارەی بۆ خەرج بكرێت، ئەولەویەتیش بە رێگەوبان و خزمەتگوزاری و ئاوی خواردنەوە و كەرتی كارەبا دەدرێت.

دواڕۆژ: كەواتە لە نیەتی حكومەت دڵنیان كە پارە سەرف دەكرێت و راناوەستێت؟
سەرۆ دزەیی: دڵنیاین حكومەت بەردەوام دەبێت لە خەرجكردنی پارەی بەڵێندەران و پڕۆژەكان، بۆیە مژدە دەدەینە خەڵك و بەڵێندەران كە قەرزەكانیان دەدرێتەوە و پڕۆژەكانیش تەواو دەكرێن.

دواڕۆژ: ژمارەی ئەو پڕۆژانە چەندە كە ماویانە تەواو بكرێن؟ 
سەرۆ دزەیی: ئەو پڕۆژانەی كە هێشتا ماویانە كاریان تێدا بكرێت و تەواو بكرێن، نزیكەی 2 هەزار پڕۆژەن، پلان هەیە بۆ تەواوكردنیان، بڕیاری خەرجكردنی بودجەیش بەسەر پارێزگاكاندا بەشێوەیەكی هاوسەنگ و بەپێی زۆری و كەمیی پڕۆژەكانە.

پ: ل. م 

ب: ک. س



created by Avesta Group and powered by Microsoft Azure