نوێترین زانیاری لەبارەی پێدانی کارەبای نیشتمانییەوە

هەواڵ / کوردستان :: پێش 2 هەفتە ‌ :: 1768‌ جار بینراوە

دواڕۆژ, ئاراس عەزیز

ماوەی چەند ڕۆژێكە گرفتی كەمی كارەبا لە هەرێمی كوردستان سەریهەڵداوەتەوە و بەرپرسانی كارەباش دەڵێن: "بەهۆی ئەوەی گەرمكەرەوەی زۆر لەوەرزی زستان بەكاردەهێندرێت ساڵانە ئەو كێشەیە دووبارە دەبێتەوە و تائیستاش چارەسەری پێویستی بۆ نەدۆزراوەتەوە".


ئومێد ئەحمەد وتەبێژی وەزارەتی كارەبا (ئەمڕۆ سێشەممە 19ی تشرینی دووەمی 2019) بە دواڕۆژی ڕاگەیاند: بەهۆی ئەوەی لە وەرزی زستاندا كارەبا دەبێتە هۆی سەرچاوەی گەرمكەرەوەی هەمووماڵێك فشارێكی زۆر لەسەر كارەبا درووست دەبێت و ئەمەش وادەكات كاتژمێرەكانی كارەبا كەمببنەوە.

وتیشی: "هەتاوەكوو كێشەی كارەبا چارەسەری یەكجاری بۆ نەدۆزرێتەوە ئەو كێشەیە ساڵانە بەردەوام دەبێت و ناتوانین كارەبای پێویست بە هاوڵاتیان بدەین بەڵكوو موەلیدەكان ئەو بۆشاییە پڕدەكەنەوە".

ئاماژەی بەوەشكرد: هاتاوەكوو حكومەت چارەسەری پێویستی بۆ دەدۆزرێتەوە, پێویستمان بە هەماهەنگی سەرجەم وەزارەتەكان و هۆشیاری هاوڵاتیان هەیە بۆئەوەی كارەبا بەپێی پێویست بەكاربهێندرێت و زێدەڕەوی تێدا نەكرێت ئەمەش ئەركی هەموولایەكە.
ئومێد محەمەد ئەوەشی خستەڕوو: لەئیستادا  3 هەزار و سەد تا پێنج سەد  مێگاوات دەتوانین كارەبا بەرهەمبێنین, بەڵام وەكوو ژێرخان دەتوانین نزیكەی 7 هەزار مێگاوات كارەبا بەرهەمبێنین، بەڵام بەهۆی نەبوونی سووتەمەنی بەشێك لەو وێستگانە وەستاون.

وتیشی: "لە بەهاردا خواستی كارەبا لە هەزار مێگاواتیش كەمتربوو, بۆیە ڕێژەی پێدانی كارەباش زیادیكردبوو، بەڵام لە زستاندا خواست بۆ 6 تاوەكوو 7 هەزار مێگاوات زیاد دەكات و ئەمەش دەبێتە هۆی درووستبوونی گرفتی كارەبا".

ک. س



created by Avesta Group and powered by Microsoft Azure