کاکەییەکانی سنوری داقوق چاوەڕێی وەرگرتنەوەی 14 هەزار دۆنم زەوی و زاری کشتوکاڵین

هەواڵ / کوردستان :: پێش 3 هەفتە ‌ :: 219‌ جار بینراوە

دواڕۆژ، یوسف موڕاد

لەساڵی 1969وە ڕژێمی بەعس دانیشتوانی ژمارەیەک گوندی کاکەیی لەسنوری داقوق دەربەدەرکرد و عەرەبی هاوردەی لەشوێنیان نیشتەجێکرد بەوهۆیەشەوە 14 هەزار دۆنم زەوی کشتوکاڵی ئەو پێكهاتەیە داگیرکرا.

هەرچەندە لەپاش پڕۆسەی ئازادی عێراق و بەهۆی شەڕی داعشەوە ئەو عەرەبە هاوردانە ناوچەکەیان جێهێشت، بەڵام لەدوای ڕووداوەکانی ئۆكتۆبەری 2017 عەرەبی هاوردە دووبارە هەوڵی داگیرکردنی زێدی کاکەییەکان دەدەن.

فازڵ ئاغا کەسایەتی دیاری کاکەییەکان لەسنوری قەزای داقوق بە "دواڕۆژ"ی ڕاگەیاند "لەساڵی 2007وە بەڵگەی تەواومان خستەڕوو کە ئێمە خاوەنی ڕەسەنی ئەو گوند و زەوی و زارە کشتوکاڵییانەین، بەڵام لەدوای ڕووداوەکانی ساڵی 2017عەرەبی هاوردە هەوڵی تەعریب دەدەن و ئەو گوندانە چۆڵناکەن کە موڵکی ئێمەیە، لەئێستاشدا نووسراو بۆ بەڕێوەبەرایەتی کشتوکاڵی کەرکوک کراوە و جگە لەوەی بەڵگەی تەواومان هەیە کە دەری دەخات خاوەنی ڕەسەنین، دادگاش بڕیاری داوە کە پێمان بدرێتەوە، بەڵام تائێستا نەگەڕێندراوەتەوە بۆمان". 

وتیشی: "ئەرکی نوێنەرانی کوردە هەوڵی گێڕانەوەی ئەو زەوی و زارانە بدەن بۆ کاکەییەکان، چونکە کاریگەری خراپ دەکاتە سەر دیمۆگرافیای کەرکوک ئەگەر یەکلایی نەکرێنەوە".

بەپێی زانیارییەکانی دواڕۆژ ئەو 14هەزار دۆنم زەوییە کشتوکاڵییە لە سنوری شەش گوندی کاکەیین لە قەزای داقوق و تائێستاش سێ گوندی دیکە کە زێدی کاکەییەکانە، لەلایەن عەرەبی هاوردەوە داگیر کراوە.



created by Avesta Group and powered by Microsoft Azure