پێشنیاردەكرێت خانووەكەی عیزەدین مستەفا رەسوڵ بكرێتە مۆزەخانە

هەواڵ / ڕاپۆرت :: پێش 4 هەفتە ‌ :: 761‌ جار بینراوە

دواڕۆژ، راپۆرتی پشتیوان جەمال

رۆشنبیرێكی شاری سلێمانی پێشنیاردەكات خانووەكەی پڕۆفیسۆر عیزەدین مستەفا رەسوڵ بكرێتە مۆزەخانەیەكی تایبەت بۆ ئەوەی بەرهەمەكانی تێدا بپارێزرێت، فاروق مەلا مستەفا برای كۆچكردووش رایدەگەیەنێت : بەرهەمە مەزنەكانى دەپارێزین و وادەكەین مێژووی پڕ سەربەرزی لەهەموو بوارەكاندا لەبەردەستی خوێندەواراندا بێت.


(رۆژى هه‌ینى 15ی تشرینی دووەمی 2019) لە هۆڵی هۆتێل گراند میلینۆم لە سلێمانی، مەراسیمێكی شایستە بۆ چلەی كۆچى دوایى (پڕۆفیسۆر دكتۆر عیزەدین مستەفا رەسوڵ) بەڕێوەچوو، كە تیایدا ژمارەیەكی به‌رچاو له‌ بەرپرسانی حكومی و بەرپرسی لایەنە سیاسییەكان و ئەدیب و رۆشنبیر و هاورێیانى و خانەوادەكەی ئامادەبوون.

پڕۆفیسۆر دكتۆر عیزەدین مستەفا رەسوڵ ساڵی 1934 لە سلێمانی لەدایكبووە و ساڵی 1948 بووه‌تە ئەندامی حیزبی شیوعی عێراق، ساڵی 1959 خانەی مامۆستایانی تەواوكردووە و ساڵی 1963 یەكەم بڕوانامه‌ى دكتۆرای لەشاری باكۆ وەرگرتووە.

دكتۆر عیزەدین زیاتر لە 90 كتێبی بڵاوكردۆتەوە و سەرپەرشتی نامەی ماستەر و دكتۆرای چەندین ئەكادیمی كردووە، سەر لەبەیانی رۆژی 3ی تشرینی یەكەمی 2019یش لە سلێمانی كۆچی دواییكرد.

فاروق مەلا مستەفا، سەرمایەداری نیشتمانی و برای د. عیزەدین له‌و مه‌راسیمه‌دا وتاری بنەماڵەكەیانی خوێندەوە و رایگەیاند: "بەشداریكردنتان نموونەی وەفادارییە بۆ پیاوێك كە هەموو تەمەنی بۆ خزمەتی گەل و نیشتمان تەرخانكردووە، كاكە گیان تا لەژیاندا بین یەك چركە تۆمان لەبیرناچێت، كە هەواڵی جەرگبڕی پڕ ئازاری مەرگتم پێگەیشت بەپەلە گەیشتمە سەرت، باوەڕم نەدەكرد بەجێمان دەهێڵیت، بۆیە كەوتمە جوڵاندنی جەستەت و فووم دەكردە ناو دەمت، بەڵكو بكەویتەوە جوڵە، بەڵام قەدەر ئەوەی كرد مەرگی تۆ ببینم كە حەزم دەكرد بەپێچەوانەوە بوایە".

وتیشی: "تۆ نزیكترین كەس بووی لە جەستەم، هەر لەو رۆژەوەی كە منت برد رەسمت گرتم و بردمت بۆ قوتابخانەی فەیسەڵییە، هەتا دواڕۆژ جێگەی شانازیمی، منت خستە رێگەی راستی تێكۆشان، تۆ و باوكم ئەلف و بێی خۆشەویستی گەل و نیشتمانتان لەدڵمدا جێگیركرد، ئەمە بۆ هەموو دۆست و هاوڕێكانیش بوو".

فاروق مەلا مستەفا لەدرێژەی پەیامەكەیدا ئه‌وه‌شى وت: "كاكە گیان دڵنیابە دەنگ و رەنگ بۆ هەتاهەتایە لەگوێماندا دەزرنگێتەوە و لەبەرچاوماندایە، كێ دەتوانێت یەك رۆژ یادی تۆی لەبیربچێت، ئێمەش بەرامبەر مێژووە جوانەكەت بەوەفا دەبین، بەرهەمە مەزنەكانت دەپارێزین و وادەكەین مێژووی پڕ سەربەرزیت لەهەموو بوارەكاندا لەبەردەستی خوێندەواراندا بێت".

له‌ مه‌راسیمه‌كه‌دا جگه‌ له‌ وتارى بنه‌ماڵه‌، چه‌ندین وتار و چالاكى ترى جۆراوجۆرى تیا پێشكه‌شكرا.

له‌ په‌راوێزى مه‌راسیمه‌كه‌دا رەفیق ساڵح، سەرۆكی بنكەی ژین بۆ كۆكردنەوەی كەلەپوری كوردی بە دواڕۆژی راگەیاند: بەداخەوە ئەوەندەی هەستی پێدەكەن ناتوانن ئەم جۆرە كەسایەتییانە بەرهەم بێننەوە، بەڵام زۆر گرنگە و پێشنیار بۆ بنەماڵەكەی دەكەن خانووەكەی پڕۆفیسۆر بكرێتە مۆزەخانەیەكی تایبەت تا ئەو ئەرشیفە گەورەیەی كە هەیەتی بەشێوەیەكی رێكوپێك رێكبخرێت بۆ خوێندەواران و توێژەران.

رەفیق ساڵح پێشنیارێكی دیكەشی بۆ بنەماڵەكەی پڕۆفیسۆر عیزەدین ئەوە بوو،  رێكخراوێكی تایبەتی بۆ دروستبكەن لەلایەن لیژنەیەكی شارەزاوە بەرهەمەكانی پۆلێن بكرێن پاشان وەك سەرجەم بەرهەمەكانی بڵاوبكرێتەوە تا هەمووان بتوانن بەباشی سوودی لێوەربگرن.

د. سالار عوسمان، بریكاری وەزارەتی رۆشنبیری و لاوانی حكومەتی هەرێمی كوردستان لەلێدوانێكدا بۆ دواڕۆژ رایگەیاند: پڕۆفیسۆر عیزەدین گەنجینەیەكی گەورەی (مێژوویی، هزریی، ئەدەبی، كلتوری، سیاسی و رۆژنامەگەری)یە و هەموو گەنجێكی ئەم وڵاتە دەبێت بگەڕێنەوە بۆ بەرهەمەكانی، بۆ روانینە سیاسییە كلتورییە ئەدەبی و رۆژنامەوانییەكانی.

وتیشی: "هەمانكات ئەم زانایە، ئەكادیمییەكی گەورەشە واتە كاتێك گەنجەكان دەگەڕێنەوە بۆ ئەو گەنجینە گەورەیە، دەگەڕێنەوە بۆ بوارە ئەكادیمی و رۆشنی ئەو بوارەش كە گرنگە تا بتوانن بەیانییەكی باشتر دروستبكەن، ئەم زانایە ئینسكلۆپیدیایەكی گەورەی كوردییە".  

لەلایەكی دیكەوە د. كوردستان موكریانی، نووسەر و هاوڕێی دێرینی پڕۆفیسۆر دكتۆر عیزەدین بۆ دواڕۆژ رایگەیاند: بەهۆی ئەوەی ئەمڕۆ سەردەمی پێشكەوتنی تەكنەلۆجیایە و ئەوەش یارمەتیدەرە تا سەرجەم بەرهەمەكانی بپارێزن و سەرلەنوێ كۆیان بكەنەوە و بخرێنە سەر ئۆنلاین، تا لەوێوە باشتر بخوێنرێتەوە و گەنجی ئەمڕۆ زیاتر ئەو زانایانە بناسن.

موكریانی وتیشی: "هەر زانایەك شوێنی خۆی پڕكردۆتەوە و هەر كەسە لە سەردەم و كات و بوارێكدا كارەكەی ئەنجام دەدات، ئێمە میللەتێكی نەزۆك نین بۆ دروستكردنی زانا، بەڵام هیچ كەسێكیش ناتوانێت شوێنی ئەم پڕۆفیسۆرە گەورەیە بگرێتەوە".

پێداچوونه‌وه‌: شیروان شه‌ریف



created by Avesta Group and powered by Microsoft Azure