بەڵگەكانی تاوانی كیمیابارانی هەڵەبجە بەرەو لەناوچوون دەچن

هەواڵ / ڕاپۆرت :: پێش 4 هەفتە ‌ :: 249‌ جار بینراوە

دواِۆژ، عەلی حەمە سەعید


دوای تێپەڕبوونی 30 ساڵ بەسەر كیمیابارانی هەڵەبجەدا، تا ئێستاش لەناو كۆڵان و گەڕەكەكانی هەڵەبجەدا ژمارەیەك خانوو بەشێوەی كەلاوە ماونەتەوە كە مێژووەكەیان بۆ كاتی پێش كیمیابارانی هەڵەبجە دەگەرێتەوە خاوەنەكانیان بوونەتە قوربانی كیمیاباران، بەڵام لە ئێستادا سەرجەم ئەو خانووانە بەرەو لەناوچوون دەچن كەسوكاری شەهیدانیش پێیان باشە لایەنە پەیوەندیدارەكان ئەو خانوانە وەربگرنەوە وەك بەڵگەیەكی زیندووی كیمیاباران مامەڵەیان لەگەڵدا بكرێت.

محەمەد عەبدوڵا، یەكێك لە كەسوكاری شەهیدانی كیمیارانی هەڵەبجە بە دواڕۆژی ڕاگەیاند "بەداخەوە دوای تێپەڕبوونی نزیكەی 30 ساڵ بەسەر تاوانی كیمیابارانی هەڵەبجەدا، دەبینین كە ساڵ لە دوای ساڵ ئەو بەڵگەو دیكیۆمێنتانەی كە بەڵگەبوون لەسەر تاوانی كیمیابارانی هەڵەبجە خەریكە بەتەواوی لەناو دەچن و ئەگەر حكومەت و لایەنە پەیوەندیدارەكان هەروا بێباك بن ئەوا لەچەند ساڵی داهاتوودا شتێك نامێنێت بەناوی بەڵگەی تاوانی كیمیابارانی هەڵەبجە".

ئەوەشی خستەڕوو، تا ئێستاش ژمارەیەكی زۆر لە خانووی كەسوكاری شەهیدان وەك خۆیان ماونەتەوە كە مێژووەكەیان بۆ پێش كیمیابارانی هەڵەبجە دەگەڕێتەوە لەكاتی كیمیاباراندا خاوەنەكایان شەهید بوون، لەكاتێكدا چەندینجار پێشنیازمان كردووە بۆ لایەنە پەیوەندیدارەكان كە بەهەر نرخێك بێت ئەو خانوانە بكڕێتەوە لە ئەگەری لەناوچوون بیان پارێزێت و وەك بەڵگەیەكی زیندووی كیمیاباران مامەڵەیان لەگەڵدا بكرێت.

وتیشی: "جێگەی داخە كە حكومەتی هەرێم و لایەنە پەیوەندیدارەكان زۆر بێباكن لە ئاست پاراستنی ئەو بەڵگە و دیكیۆمێنتانەی كە بوونەتە شاهیدی ئەو تاوانە گەورەیەی بەرامبەر بەم شارەو هاوڵاتییەكانی ئەنجامدراوە لەكاتێكدا لەهەر ولاتێكی تردا ڕووی بدایە زۆر بەگەورەو پیرۆز سەیر دەكران".

كوێستان ئەكرەم، سەرۆكی شارەوانی هەڵەبجە بۆ دواڕۆژی ڕوونكردەوە "وەك شارەوانی هیچ لاریمان نییە لەوەی كە ئەو خانوانەی وەك بەڵگەی كیمیابارانی هەڵەبجە ماونەتەوە لە هاوڵاتیانیان وەربگرینەوە وەك شوێنێكی بەڵگەیی و كەلەپوری بەكاریان بهێنێنین، بەڵام ئەوە لە توانای ئێمەدا نییە و دەبێت ئەنجومەنی وەزیران بەو كارە هەستێت و بودجەی بۆ تەرخان بكات".

ئاماژەی بەوەشكرد، لە ڕابوردوودا زۆر داواكاری لەو شێوەیە كراوە لە حكومەتی هەرێم كە بەلایەنی كەمەوە 15 خانوو بكڕێتەوە خۆی خاوەندارییان لێبكات و لەمەترسی لەناوچون بیان پارێزێت، بەڵام بەداخەوە تا ئێستا حكومەت ئامادە نییە ئەو كارە جێبەجێ‌ بكات، ئەمەش وایكردووە كە ساڵ لەدوای ساڵ ئەو خانوانە لەمەترسی لەناوچونی یەكجاری نزیك دەبنەوە.

سەرۆكی شارەوانی هەڵەبجە ئەوەشی باسكرد، نوسراومان ئاڕاستەی وەزارتی دارایی كردووە بۆ ئەوەی بڕێك بودجە تەرخان بكەن بۆ كڕینەوەی ئەو خانووانە، بەڵام لە دوای سەردانی (قوباد تاڵەبانی) جێگری سەرۆكی حكومەتی هەرێم لە ئێستادا ئەنجومەنی وەزیران ڕەزامەندییان دەبڕیوە بە كڕینەوەی خانووەكەی (عومەری خاوەر) ئێمەش لای خۆمانەوە دەستمان بە مامەڵە یاساییەكان كردووە بۆ ئەوەی ئەو خانووە ببێتە موڵكی شارەوانی.



created by Avesta Group and powered by Microsoft Azure

بەپەلە