لەبارەی زەوییە کشتوکاڵییەکانی کورد لە کەرکوک بڕیارێک دەرکرا

هەواڵ / کوردستان :: پێش 4 هەفتە ‌ :: 224‌ جار بینراوە

دواڕۆژ، عیماد جەباری

فەرماندەی ئۆپراسیۆنی هێزە هاوبەشەکانی عێراق لەکەرکوک لەچوارچێوەی کۆبونەوەیەکدا لەگەڵ جوتیارانی کورد و عەرەب لەبارەی زەوییە کشتوکاڵییەکانی ناوچەی تاڵەبانی، بڕیاریدا بەپێکهێنانی لیژنەیەک بۆ چارەسەرکردنی کێشەی نێوانیان.

ماوەی چەند رۆژێکە جارێکیتر عەرەبە هاوردەکانی سەردەمی حیزبی بەعس، بابەتی داوای زەوییە کشتوکاڵییەکانیان وروژاندووە و بەپاڵپشتی ئیدارە و هێزە سەربازییەکان فشاریان لەسەر جوتیارانی کورد دروستکردووە تاوەکو زەوییەکان چۆڵبکەن.

یەنگیجەی تاڵەبانی لەسنووری قەزای داقوق یەکێکە لەو ناوچانەی لەلایەن هێزە سەربازییەکانەوە فشار دروستکراوە تاوەکو رێگری بکەن جوتیارانی کوردی سنوورەکە زەوییەکانیان بکێڵن.

هیوا تاهیر، نوێنەری جوتیارانی گوندی یەنگیجە ئەمڕۆ پێنجشەممە 14ی تشرینی دووەم بەدواڕۆژی راگەیاند: فەریق روکن سەعد حەربییە، فەرماندەی ئۆپراسیۆنەکانی عێراق لە کەرکوک لەگەڵ جوتیارانی کورد و عەرەب کۆبوەوە و ماوەی چەند کاتژمێر گوێڕایەڵی هەردوولا بوو.

وتیشی: "حەربییە دوای گوێگرتن لەهەردوولا بڕیاریدا بەپێکهێنانی لیژنەیەک کە لەهەفتەی داهاتوەوە دەکەوێتە کار تاوەکو بگەنە چارەسەرێک، بەپێچەوانەشەوە ئەوە هەردوولا سەرپشک دەکات پەنا بەرنە بەر دادگا و ئەمانیش وەکو هێزی سەربازی بڕیاری دادگا جێبەجێ دەکەن".

پ: چ.ع



created by Avesta Group and powered by Microsoft Azure