سەربازگەی هۆل.. بۆمبی تەوقیتكراوی داعش

هەواڵ / ڕاپۆرت :: پێش 4 هەفتە ‌ :: 385‌ جار بینراوە

دواڕۆژ


سەربازگەی هۆل كە دەكەوێتە باكوری خۆرهەڵاتی سوریاوە و دەیان هەزار كەسی لە ژنان و منداڵانی پاشماوەی داعش تێدایە، بووەتە یەكێك لە گرنگترین و دیارترین ئەو مەسەلانەی كە بەردەوام لە میدیا لۆكاڵی و جیهانییەكانەوە باس دەكرێت.

یەكێك لەو بابەتانە، راپۆرتێكی رۆژنامەی دەیلی مەیل-ی بریتانییە كە تێیدا دەڵێت: "بووك و منداڵەكانی داعش، سەربازگەی هۆل-ی باكوری خۆرهەڵاتی سوریایان كردووە بە خانەیەكی تیرۆر، چونكە زیاتر لە 70 هەزار كەسی تێدایە كە زۆربەیان ژن و منداڵن و هەزارانیان خێزانی چەكدارانی داعش-ن".
میدیاكان ئەوە رووندەكەنەوە كە بەهۆی لەشكركێشییەكەی ئەم دواییەی توركیا و چەكدارە ئیسلامیە سورییەكانی سەر بە توركیاوە بۆ سەر ناوچەكانی خۆرئاوای كوردستان "جەنگاوەرە كوردەكانی پاسەوانی سەربازگەكە ناچاربوون ژمارەی خۆیان لە پاراستنی سەربازگەكەدا كەمبكەنەوە و بەرەو بەرەكانی شەڕ بڕۆن، بەهۆی ئەمەیشەوە ناو سەربازگەكە بووەتە مەیدانی شەڕی خۆبەخۆی دانیشتوانەكەی و چەندین تاوانی جۆراوجۆریان لە دژی یەكتری ئەنجامداوە".
منداڵێكی تەمەن دە ساڵانی پاشماوەی داعش، بە پەیامنێرێكی كەناڵی سكای نیوز-ی وتووە"بەسەربڕین دەتكوژم.. سەرت لە لاشەكەت جیادەكەمەوە".
منداڵەكانی داعش، كە ژمارەیەكی زۆریان دایك یاخود باوك و یان هەردووكیان ئەوروپین، لەناو سەربازگەكەدا بۆخۆیان دێن و دەچن بێ‌ ئەوەی چاودێرییەكی ئەوتۆیان لەسەر بێت.
ئەگەرچی ژنانی ناو سەربازگەكە كەمتر بۆ میدیاكان دەدوێن، بەڵام یەكێكیان دەربارەی كوشتنی ئەبوكر بەغدادی سەركردەی داعش، بە هاوارەوە وتوویەتی"دەوڵەتی ئیسلامی ماوە و دەمێنێت"، چەند جارێك ئەمەی بەدەنگی بەرز وتووەتەوە، ئەمەیش بۆخۆی نیشانەی ئەوەیە كە "بەڵێ‌.. ئەمانە بۆمبی تەوقیتكراون و هەر كاتێك بێت دەتەقنەوە".
میدیاكان لە زاری سەرچاوە كوردییەكانەوە دەڵێن"سەدان ژن و منداڵی داعش، بەهۆی هێرشەكانی سوپای توركیاوە بۆ سەرناوچەكە، لە سەربازگەیەكی دیكەی نزیك شاری عەین عیسا-یش هەڵاتوون و خۆیان ون كردووە".

ئا: ل. م










created by Avesta Group and powered by Microsoft Azure