ئەم کەسانە بۆ داوای دامەزراندن خۆپیشاندان دەكەن

هەواڵ / کوردستان :: پێش 2 هەفتە ‌ :: 3130‌ جار بینراوە

دواڕۆژ، پشتیوان جەمال

بڕیارە رۆژی یەكشەممە 10ی تشرینی دووەمی 2019، مامۆستایانی وانەبێژ لەهەرێمی كوردستان بۆ داواكردنی دامەزراندنیان، لەبەردەم بەڕێوەبەرایەتییە گشتییەكانی پەروەردە خۆپیشاندان بكەن.

كارزان فیزیك، نوێنەری گشتی مامۆستایانی وانەبێژ بەدواڕۆژی راگەیاند: بۆ داواكردنی دامەزراندنیان، بڕیاریانداوە سەرجەم مامۆستایانی وانەبێژ لەشارەكانی هەرێمی كوردستان لەبەردەم بەڕێوەبەرایەتییە گشتییەكانی پەروەردە خۆپیشاندان بكەن. 

وتیشی: "ئێمە دژی دامەزراندنی مامۆستایانی گرێبەست نین، بەڵام ئێمەش مافی خۆمانە دابمەزرێین و پێش ئەوان دەستمان بەدەربڕینی ناڕەزایی و خۆپیشاندان بۆ دامەزراندن كردووە".

ناوبراو ئاماژەی بەوەكرد: "بۆ دامەزراندنن مامۆستایانی وانەبێژ هەقتر و لەپێشترن، لەبەرئەوەی زۆرترین ئەركمان لەسەرە و كەمترین مافیشمان هەیە، تەنانەت مامۆستای وانەبێژ هەیە لەساڵێك تا 12 ساڵە خزمەت دەكات و وانەبێژە، مووچەكانیشمان بەپێی وانەیە و كەمترین مووچەمان هەیە".

كارزان فیزیك روونیكردەوە: بەپێی ئەو ئامارەی كە ساڵی رابوردوو دەستیان كەوتووە و پەروەردەكان گەڕاون نزیكەی 17 هەزار مامۆستای وانەبێژ هەیە، بەڵام بەپێی داتای وەزارەتی پەروەردە و یەكێتیی مامۆستایان نزیكەی 12 هەزار مامۆستای وانەبێژ هەیە.

لەكۆبوونەوەی رۆژی چوارشەممەی رابوردووی ئەنجومەنی وەزیراندا، بڕیاردرا بە دامەزراندنی هەمیشەیی بۆ سەرجەم مامۆستایانی گرێبەست لەهەرێمی كوردستان.

پ: چ.ع



created by Avesta Group and powered by Microsoft Azure