پەیوەندی هەرێمی کوردستان و عێراق دوای عادل عەبدولمەهدی

هەواڵ / ڕاپۆرت :: 08/11/2019‌ :: 817‌ جار بینراوە

دواڕۆژ، سەنگین خۆشناو

بڕیاری دەستلەکارکێشانەوەی عادل عەبدولمەهدی سەرۆک وەزیرانی عێراق سەرکردەکانی کوردی کۆکردەوە، بەمەبەستی دانانی پلانێک بۆ حکومەتی دوای عادل عەبدولمەهدی.


سەرباری یەکدەنگی لایەنەکان و نزیکی بیروڕایان لەبەرامبەر داخوازی و مافەکانی کورد بەڵام هەندێک لە لایەنەکان ئەو راستییە ناشارنەوە کە حکومەتی عێراق تێبینی لەسەر مەسەلەی نەوت و داهاتی گومرگەکان و خاڵە سنوورییەکان هەیە.

سەرباری گرژی و ئاڵۆزییەکانی شەقامی عێراق، وتەبێژی حکومەتی هەرێمی کوردستان دەڵێت: "گفتوگۆکانمان لەگەڵ بەرپرسانی بەغدا بەردەوامە و گرژی و ئاڵۆزییەکان هیچ کاریگەری لەسەر پەیوەندییەکانمان دروستنەکردووە، مووچەی فەرمانبەرانیش دەنێردرێت".

جوتیار عادل، وتەبێژی حکومەتی هەرێمی کوردستان بە دواڕۆژی راگەیاند: هەردوو سەرۆکایەتی حکومەتی هەرێم و حکومەتی عێراق لە گفتوگۆکانمان بەردەوامین، دوای ئاسایی بوونەوەی بارودۆخەکەش سەردانی بەغدا دەکەین و لەگەڵ بەرپرسانی بەغدا کۆدەبینەوە.

جوتیار عادل، سەبارەت بە بەشە بودجەی هەرێمی کوردستان لە بودجەی ساڵی 2020 رایگەیاند: "ئێمە بودجەی خەمڵێندراوی خۆمان بۆ بەغدا رەوانە کردووە، بۆئەوەی پێش پەسەند کردنی لە پەرلەمان پشکی کورد دیاری بکرێت بەشێوازێک کەمتر نەبێت لەبودجەی ساڵی 2019".

ئارێز عەبدوڵا، ئەندامی پەرلەمانی عێراق لە فراکسیۆنی یەکێتیی نیشتمانیی کوردستان بۆ دواڕۆژ دەڵێت: "تاوەکو ئێستا پەیوەندییەکانمان لەگەڵ بەغدا زۆر باشە و کێشەی نییە، بەڵام ئێستاش عێراق دەستوری جێبەجێ نەکردووە زۆر بەند هەیە کە مافی کوردە پێمان نەدراوە سەرەکیترینیان ماددەی 140ە کە ئێمە بەهیچ جۆرێک دەستبەرداری نابین".

دەشڵێت: "هەرچەندە نازانین کێ شوێنی سەرۆک وەزیرانی ئێستای عێراق دەگرێتەوە، بەڵام هەر کەسێک بێت ئێمە پێداگیرین لەسەر ئەوەی کە دەستوری عێراق جێبەجێ بکرێت مافەکانی ئێمە بەتایبەت بودجە و موچەی فەرمانبەران و مافی جوتیاران دەبێ ئەوانە بدرێن بەبێ کێشە".

سەبارەت بە یەکدەنگی لایەنەکانی کوردستان ئارێز عەبدوڵا، دەشڵێت: "کۆبوونەوەی سەرۆک کۆمار لەگەڵ سەرجەم لایەنەکان زۆر سەرکەوتوو بوو بیر و ڕای سەرجەم حیزب و لایەنەکان لەیەکەوە نزیک بوو، بۆیە بەردەوامی ئەو یەک هەڵوێستییە وادەکات کورد بە تەواوی مافەکانی بگات.

ئەحمەد حاجی رەشید، ئەندامی لیژنەی دارایی پەرلەمانی عێڕاق بە دواڕۆژی راگەیاند: پەیوەندییەکانی هەرێم و بەغدا ئەگەر عادل عەبدولمەهدیش بمێنێتەوە وەکو ئێستا نابێت چونکە ئەوەی عادل عەبدولمەهدی بۆ کورد کردوویەتی ئەوە خاڵێکی گرنگە کە خەڵک و لایەنەکانی دیکەش ناڕازین.

دەشڵێت: "سەرۆک وەزیرانی عێراق بەبێ ئەوەی نەوتی هەرێم وەرگرێت بەبێ ئەوەی داهاتی فڕۆکەخانە و سنوورەکان وەرگرێت بودجەی کوردستانی داوە کە ئەمە لە ساڵی نوێدا وانامێنێت ئەگەر عادل عەبدولمەهدیش بمێنێت".

لەبارەی پابەندبوونی هەرێم بە دەستورەوە، ئەو پەرلەمانتارە دەڵێت: "پێویستە هەرێمی کوردستان پابەندی بەندەکانی دەستور بێت و ئەو لیژنانەشی بۆ دانووستان بۆ بەغدای دەنێرێت پێویستە کەسانی شارەزابن لەسەر دەستور".

پ: چ.ع



created by Avesta Group and powered by Microsoft Azure