خانەوادەی ژەنەراڵی پایز راگەیەندراوێکیان بڵاوکردەوە

هەواڵ / کوردستان :: 5 رۆژ پێش ئێستا‌ :: 1523‌ جار بینراوە

دواڕۆژ، پشتیوان جەمال

بنەماڵەی شاعیری كۆچكردوو محەمەد عومەر عوسمان ناسراو بە (ژەنەڕاڵی پایز) رایدەگەیەنن: مامەڵەكردن بە بەرهەم و میراتی ئەو شاعیرە بەتەنیا مافی ئەوانە، داوا لەو كەسانەش دەكەن كە خۆیان بەدڵسۆزی ئەو شاعیرە دەزانن بۆ رێوڕەسمی چلەكەی، هاوكارییان بكەن.

خانەوادەی محەمەد عومەر عوسمان، شاعیری ناسراو بە (ژەنەراڵی پایز) لەڕاگەیەندراوێكدا كە وێنەی بۆ دواڕۆژ نێردراوە رایانگەیاندووە: هەموولایەك ئاگادار دەكەنەوە كە خانەوادەكەیان خەریكی ئامادەكارییە بۆ سازكردنی چلەی ئەو شاعیرە، تاكە رێوڕەسمی چلەی شاعیریش ئەوەیە كە ئەوان ئێستا ئامادەكاریی بۆ دەكەن و هەر كەسێك، خۆی بە دڵسۆزی شاعیر دەزانێت بانگهێشتیان دەكەن بۆ هاریكاریان لەو رێوڕەسمەدا.

هەر بەپێی ئەو راگەیەندراوە: هەموولایەك ئاگادار دەكەنەوە مامەڵەكردن بە بەرهەم و میراتی ژەنەراڵی پایز، بە تەنیا مافی ئەوانە بەتایبەتی تاقە دیوانەكەی (لە غوربەتا) كە هەوڵ دەدەن لە ئایندەدا بە شێواز و چاپێكی شایستەوە چاپی بکەنەوە، وەكو پێڕەوییكردن لە نەریتی باویش، كەلوپەل و ئامرازە بەكارهێنراوەكان و نووسین و تابلۆكانی شاعیریش بۆ نمایشكردن هەڵدەگرن و لە كاتی خۆی و لە جێگەی شیاودا بۆ هەواداران نماییش دەكرێن.

دوو هەفتە لەمەوبەر محەمەد عومەر عوسمان ناسراو بە ژەنەراڵی پایز لەماڵی خۆی لە شاری سلێمانی لەڕێگەی خۆهەڵواسینەوە كۆتایی بە ژیانی خۆی هێنا.

پ: چ.ع



created by Avesta Group and powered by Microsoft Azure