سەركردەیەكی یەكێتی باسی وردەكاری كێشەكانی حیزبەكەی و پارتی دەكات

هەواڵ / کوردستان :: پێش 2 هەفتە ‌ :: 460‌ جار بینراوە

دواڕۆژ، پشتیوان جەمال

سەركردەیەكی یەكێتی رایدەگەیەنێت: پەیوەندییەكانیان لەگەڵ پارتی سارد و سڕە، بەڵام دەرفەتی چارەسەریش هەیە، هەروەها ئاماژە بەوە دەكات كە پارتی لە بادینان بەڵێننامەی بە كادیرانیان پڕكردۆتەوە كە نابێت یارمەتی پەكەكە بدەن.

لە چەند رۆژی رابوردوودا بەهۆی لێدوانی لەتیف شێخ عومەر، وتەبێژی یەكێتی سەبارەت بەجێبەجێنەكردنی رێككەوتنیان لەگەڵ پارتی لە پڕۆسەی پێكهێنانی حكومەتی هەرێم، پاشان وەڵامدانەوەی وتەبێژی پارتی و سەرۆكی دیوانی ئەنجومەنی وەزیران، هەروەها دووبارە وەڵامدانەوەی وتەبێژی یەكێتی بۆ لێدوانەكان، پەیوەندی پارتی و یەكێتی گرژییان تێكەوتەوە.

فەرید ئەسەسەرد، ئەندامی سەركردایەتی یەكێتی نیشتمانی كوردستان (ئەمڕۆ يەكشەممه 3ی تشرینی دووەمی 2019) بە دواڕۆژی راگەیاند: ئەوان لەگەڵ جێبەجێكردنی رێككەوتنەكانن، بۆ نموونە نزیكەی شەش مانگە لەگەڵ پارتی رێككەوتنێكیان لەسەر كەركوك هەیە، بەڵام ئەوەندە دەستی دەستییان پێكردن تا ئەنجومەنی پارێزگاكان هەڵوەشایەوە.

وتيشی: "سەبارەت بەگرتنی كادرانمان، ژمارەیەكی زۆر كادریان بانگ كردووین لە بادینان بەڵێننامەیان پێ پڕكردوونەتەوە كە نابێت یارمەتی پەكەكە بدەن، پڕكردنەوەی بەڵێننامە نیشانەی ئەوەیە ئەو كەسە هیچی نەكردووە و بەڵێن دەدات ئەو كارە بكات، بۆیە ئەگەر ئەو كارەی كرد ئەوكاتە دەستگیری بكەن".

سەبارەت بەوەی ئایا قسەكانی چەند رۆژی رابوردووی وتەبێژی یەكێتی دەربارەی كێشەكانیان لەگەڵ پارتی، قسەی باڵێكی یەكێتی یان قسەی هەموو یەكێتییە، ئەسەسەرد وتی: "قسەكانی وتەبێژ قسەی هەموو یەكێتییە، نەك قسەی باڵێكی یەكێتی بێت"، بۆ بژاردەی كشانەوەشیان لەحكومەت، ناوبراو دەڵێت: "بیرمان لەكشانەوە نەكردۆتەوە و تاوتوێشمان نەكردووە و ئومێد هەیە بۆ چارەسەری كێشەكان، بەڵام دەبێت ئەوەمان لەبەرچاو بێت ئەو رێككەوتنەی واژوومان كردووە دوو بەشە، یەكێكیان ئەوەی بڵاوكرایەوە و بەشی دووەمیش ئەوەبوو وتیان لەسەر ئێمە واتە لەسەر بەڵێنی شەخسی (جێنتڵمانانە) بەتایبەتیش ئەوەی پەیوەندی بە خالید شوانییەوە هەبوو، ئەوەش جێبەجێ نەكراوە".

دوێنێ ئومێد سەباح، سەرۆكی دیوانی ئەنجومەنی وەزیرانی حكومەتی هەرێم رایگەیاند: تائێستا یەكێتی ناوی كاندیدی بۆ پۆستەكان پێشكەش نەكردوون تا فەرمانیان بۆ دەربكەن.

لەو بارەیەوە فەرید ئەسەسەرد وتی: "ناوی كاندیدەكان ئامادەن، ویستیشمان پێشكەشیان بكەین، بەڵام ئەوانەی بادینان هاتنە ئاراوە، قسەمان لەگەڵ كردن كە بۆچی كادیرەكانمان بانگ دەكەن هیچ بیانوویەكی مەعقولیان پێ نەبوو، لە هەولێریش چەند كادیرێك دەستگیركراون، بۆیە لیستەكەمان پێشكەش نەكردن، ئەگینا لیستمان ئامادەیە"، هەروەها وتیشی: "لەگەڵ پارتی پەیوەندییەكی سارد و سڕمان هەیە و ئێستا لەشوێنێكدا چەقیوە كە باش نییە، بەڵام دەرفەت بۆ چارەسەركردن هەیە".



  • ڕۆژ
  • هەفتە
  • مانگ
created by Avesta Group and powered by Microsoft Azure