گرژییەكانی عێراق چی لەئایندەی پارەی جوتیاران دەكات؟

هەواڵ / ڕاپۆرت :: پێش 2 هەفتە ‌ :: 155‌ جار بینراوە

دواڕۆژ، سەنگین خۆشناو


گرژی و ئاڵۆزی و خۆپیشاندانەکان لە شارەکانی عێراق بەردەوامە، مەرامی سەرەکیش گۆڕانکاری لە هەیکەلی حکومەت و چاکسازیی ریشەییە.

ئەو گرژی و ئاڵۆزییە فەرمانبەر و جووتیارانی هەرێمی کوردستانی دووچاری دڵەڕاوکێ کردووە، بەجۆرێک هەم فەرمانبەر خەرجی کەمکردووەتەوە، هەم جووتیاران خەم بۆ ئەو پارانە دەخۆن کە لە ساڵانی (2014-2015-2016) گەنمیان رادەستی حکومەتی عێراق کردووە و تائێستاش پارەکانیان وەرنەگرتووە کە بڕەکەی (557) ملیار دینارە.

سەرەڕای هەنگاونانی وەزارەتی بازرگانی و خودی سەرۆکی هەرێم بۆ وەرگرتنەوەی پارەی گەنمی جووتیاران، رێکخراوەکانی داکۆکیکار لە مافی جووتیارانیش بە سکاڵای یاسایی سەرقاڵی گەڕاندنەوەی پارەکانن.

فارس حوسێن، سەرۆکی رێکخراوی جووتیارانی سەردەم بۆ بەرگری لە مافی جووتیاران بە دواڕۆژی راگەیاند: "ئێمە دوو سکاڵامان تۆرمار کردووە کە خۆشبەختانە لە سکاڵاکانیش تائێستا براوەین، دوا دانیشتنی دادگا مانگی داهاتووە ئەگەر رەوشی بەغدا ئاسایی بێتەوە، ئەوە سەردانی بەغدا دەکەین بۆ گەڕاندنەوەی مافی جووتیاران".

فارس حوسێن، دەشڵێت: "دڵنیایی دەدەینە جووتیاران کە ئەگەر حکومەتی ئێستای عێراق هەڵوەشێتەوە هیچ گۆڕانکارییەک بەسەر سکاڵاکەی ئێمە نایەت و هەموو قۆناغە سەختەکانی تێپەڕاندووە".

نەوزاد ئەدهەم، بەڕێوەبەری گشتی بازرگانی لە وەزارەتی بازرگانی بە دواڕۆژی راگەیاند: "بەشێکی پارەی ساڵانی (2014-2015-2016)ی گەنمی رادەستکراوی جووتیاران كە تەنیا ملیارێک دینارە، دابەشکراوە و بڕی 557 ملیار دینار ماوە".

دەشڵێت: "وەک وەزارەت تاوەکو ئێستاش لەسەر خەتین بۆ خەرجکردنی پارەکە لەگەڵ وەزارەتی بازرگانی و خودی عادل عەبدولمەهدی گفتوگۆمان کردووە بۆ خەرجکردنی پارەکە، بۆیە ئەگەر حکومەتی ئێستاش گۆڕانکاری تیادا بکرێت لە هەوڵەکانمان بەردەوام دەبین بۆ ئەوەی مافی جووتیارانمان نەخورێت".

سەرەڕای وەرنەگرتنەوەی رەنجی ساڵانی رابوردوویان کەچی جووتیاران لە تۆوکردنی زەوییەکانیان بەردەوامن، بەجۆرێک ئەمساڵیش زۆربەی جووتیاران بە فرۆشتنی موڵک و ماڵ و ئۆتۆمبێلیان زەوییەکانیان تۆو کردووە چاوەڕوانی بارانن بۆئەوەی بڕی بەرهەمیان باش بێت، بەڵام هێشتا ئەو ترسەیان هەیە لە گۆڕانکاری حکومەتی عێراق.

حاجی ئیبراهیم سەعید کە ساڵی رابوردوو ئۆتۆمبێلەکەی فرۆشتووە بو تۆوکردنی زەوییەکانی بە گەنم، بۆ دواڕۆژ دەڵێت: "ئەمساڵ هیوایەک گەڕایەوە کە سێ بەشی پارەکانمان بەخێرایی وەرگرت، بەڵام ئێستا خەریکە بێهیوا دەبین، چونکە بەشێکی پارەکەمان لای بەغدایە دەبوو ئێستا دابەشکرابا".

دەشڵێت: "ئەگەر جگە لە پارەی ئەمساڵ پارەی ساڵانی ڕابوردووشمان بدەنێ، ئەوا دەتوانم زیاتر لە 300 دۆنمی دیکەش بە سەوزە و میوە دابچێنم".
بۆ وەزری چاندنی ئەمساڵ وەزارەتی كشتوكاڵ پێشبینی چاندنی رووبەری 3.552.860 دۆنم زەوی بەگەنم دەكات و ملیۆنێك  و 674 هەزار تۆن گەنم بۆ وەزارەتی بازرگانی عێراق دەنێرێت.

 

بڵاوکردنەوە: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure