رێژا 70% ژ ئێزدیێن ل ئه‌رمینیا دژین لبن هێلا هه‌ژاریێ دانه‌

هەواڵ / ڕاپۆرت :: پێش 3 هەفتە ‌ :: 154‌ جار بینراوە

دواڕۆژ، بورهان یه‌حیا

پتری 200 سالانه‌ 50 هزار ئێزدی ل وه‌لاتێ ئه‌رمینیا دژین و د وان سالان دا 20 هزارێن دی ئاواره‌ی روسیا و وه‌لاتێن ئه‌وروپی بووینه و نوكه‌ 30 هزار لێ ماینه‌، وه‌ك ئه‌ندامه‌كێ بنگه‌هێ لالش یێ ره‌وشه‌نبیری و جڤاكی دبێژیت"هه‌تا نوكه‌ هه‌ستا نه‌ته‌وایه‌تی ل جه‌م وان خۆرت نینه‌ و باراپتر ئێزدیاتیێ وه‌كو ئایین و نه‌ته‌وه‌ دبینن زۆر گرێدایی ب رێوره‌سمێن ئێزدیاتیێ ڤه‌نه‌ و ژلایێ ئابووری‌ ڤه‌ نێزیكی70% ژوان لبن هێلا هه‌ژاریێ نه‌".


پتری 200 سالانه‌ ئێزدی ل وی وه‌لاتی دژین

شه‌مۆ قاسم ئه‌ندامێ بنگه‌هێ لالش یێ ره‌وشه‌نبیری و جڤاكی، بۆ دواڕۆژ دیاركر"به‌ری 200 سالان 50 هزار كوردێن ئێزدی ل وه‌لاتێ ئه‌رمینیا ئاكنجی بووینه،‌ لێ ژبه‌ر هه‌ژاریێ 20 هزار ژوان ئاواره‌ بووینه‌ و نوكه‌ ب تنێ 30 هزار ماینه‌ كو30% ژوان زۆر زه‌نگینن و70% ل بن هێلا هه‌ژاریێ نه‌ ئانكو هێلا ناڤین نینه‌ و ژ ئالیێ جیهانگیریێ ڤه‌ د ئاسته‌كێ كێم دانه‌ و پێدڤی ب پشته‌ڤانی و رێنیشاندانێ نه‌. وه‌كو بنگه‌هێ لاش پڕۆژه‌یه‌ك پێشكێشی حكومه‌تا هه‌رێمێ هاتییه‌كرن كو پشته‌ڤانیێ ل وان بكه‌ت چونكو زۆر حه‌ز دكه‌ن ڤه‌گه‌رنه‌ هه‌رێما كوردستانێ و ل ڤێره‌ بژین".


وانه‌یێن ئێزدیاتیێ ل قوتابخانه‌یان دهێنه‌ خواندن
ل سه‌ر بابه‌تێن كوردایه‌تیێ دوو چینێن جودا د ناڤا ئێزدیێن ئه‌رمینیا دا هه‌نه‌؛ سه‌باره‌ت ڤێ شه‌مۆ قاسم دیاركر"جۆره‌ ترسه‌ك لجه‌م كوردێن ئێزدی ل ئه‌رمینیا هه‌یه‌ بۆ هندێ خۆ وه‌كو كورد بده‌نه‌ نیاسین و دبێژن (ئێزدیاتی هه‌م ئایینه‌ هه‌م نه‌ته‌وه)‌ لێ به‌شه‌ك ژوان خۆ ب كورد دزانن و پێگیریێ ب هندێ دكه‌ن، لێ د بابه‌تێن قوتابخانه‌یان دا وانه‌یه‌كا ئێزدیاتیێ هه‌یه‌ كو ب زمانێ روسی یه‌ و داخواز ژوان هاتبووكرن كو ب لایتنی و كوردی بیت داكو پتر مفا ژێ بهێته‌ وه‌رگرتن".


باراپتر ب كارێ جۆتیاریێ ڤه‌ مژویلن
ئابوورێ وه‌لاتێ ئه‌رمینیا پتر گرێدایی ب هه‌ر دوو كه‌رتێن چاندن و گه‌شتوگوزارێ یه‌ و ئه‌ڤێ كاریگه‌ریی ل سه‌ر ئێزدییان ژی كرییه‌، وه‌ك شه‌مۆ قاسم دده‌ته‌ دیاركرن"باراپترا ئێزدییان ل گوندان ب كارێ جۆتیاریێ ڤه‌ مژویلن لێ قه‌باره‌یێ چاندنێ كێمه‌ و بازاڕ ژی به‌رده‌وام نینه‌ و وه‌رزێ چاندنێ ژی چه‌ند مه‌هـ بتنێ نه‌، له‌وا نه‌شێن پشتبه‌ستنه‌كا ته‌مام ل سه‌ر ڤی كه‌رتی بكه‌ن و كێشه‌یێن خۆ یێن ئابووری پێ چاره‌سه‌ر بكه‌ن. ئه‌گه‌ر كه‌سه‌ك ل وێرێ فه‌رمانبه‌ر ژی بیت مووچه‌یه‌كێ زۆر كێم وه‌ردگریت".


په‌ڕله‌مانتاره‌كێ بسورمان ل ئه‌رمینیا هه‌یه‌
كورد ل وێرێ گه‌له‌ك كێم تێكه‌لی سیاسه‌تێ بووینه‌. ئه‌ندامەكەی بنگه‌هێ لالش یێ ره‌وشه‌نبیری و جڤاكی، دیاركر"ئێزدیێن ل ئه‌رمینیا دژین ب رێژه‌یه‌كا كێم به‌شداریی ل كارێن سیاسی دكه‌ن و ب تنێ ئه‌ندام په‌ڕله‌مانه‌كێ كورد ئه‌و ژی ژ ئایینێ ئیسلامێ ل ناڤ وان دا هه‌یه‌".


په‌رستگه‌هه‌ك ب30 ملیۆن دۆلاران هاتییه‌ ئاڤاكرن
ئێزدیێن ل ئه‌رمینیا گرنگیێ ب كاروبارێن ئێزدیاتیێ دده‌ن. شه‌مۆ قاسم دیاركر"مه‌زنترین په‌رستگه‌ها ئێزدییان ل وی وه‌لاتی هه‌یه‌ كو ب په‌رستگه‌ها نۆرا تاووس (هه‌فت میرێن دیوانێ) دهێته‌ نیاسین و سه‌رمایه‌داره‌ك ب كۆژمه‌یێ 30 ملیۆن دۆلاران ئاڤاكرییه‌ و دوو په‌یكه‌رێن بۆ دوو كه‌سایه‌تیێن ئێزدی (ده‌روێشێ عه‌بدێ) و (نادیا مۆراد) هاتینه‌ ئاڤاكرن و ل مه‌ها بۆری په‌رده‌ ل سه‌ر هاتنه‌ هه‌لدان".


مه‌زنترین قوبا ئێزدییان ل ڤێرێ‌ یە
شێروان قادر چالاكڤانێ ئێزدی ل وه‌لاتێ ئه‌رمینیا بۆ دواڕۆژ دیاركر"نوكه‌ پتری 30 هزار ئێزدی ل وه‌لاتێ ئه‌رمینیا دژین و چه‌ندین جهێن په‌رستنێ یێن تایبه‌ت هه‌نه‌ و ڤێ دوماهیێ مه‌زنترین قوبا ئێزدییان ل هه‌موو جیهانێ ژلایێ سه‌رمایه‌داره‌كێ ئێزدی ڤه‌ ل وی وه‌لاتی هاتییه‌ چێكرن".
ئێزدی گرێدایی ب داب و نه‌ریتانه‌. شێروان قادر دیاركر"پترییا ئێزدییان ل گوندێ ئاكنالیج ل وه‌لاتێ ئه‌رمینیا ئاكنجینه‌ و ب به‌رده‌وامی سه‌ره‌دانا هه‌رێما كوردستانێ، ب تایبه‌ت په‌رستگه‌هێن ئێزدییان، دكه‌ن و ل هه‌فتییا بۆری دوو په‌یكه‌ر بۆ بالیۆزا نیازپاكیێ ل نه‌ته‌وه‌یێن ئێكگرتی نادیا مۆراد و قاره‌مانێ ئێزدی ده‌روێشێ عه‌بدێ هاتبوو چێكرن و د رێوره‌سمێن ڤه‌كرنێ دا ب سه‌دان ئێزدی ل هه‌موو جیهانێ لێ به‌رهه‌ڤ ببوون".

پ: ل. م
بڵاوکردنەوە: کارزان ساڵح



created by Avesta Group and powered by Microsoft Azure