لە ماڵی لانەوە چەند زانیارییەک دەخرێتەڕوو

هەواڵ / کوردستان :: پێش 4 هەفتە ‌ :: 74494‌ جار بینراوە

دواڕۆژ، پشتیوان جەمال

لیژنەی مافی مرۆڤی پەرلەمانی كوردستان لەسەر دۆسیەی گیانلەدەستدانی رۆژنامەنووسان ئامانج بابانی و لانە محەمەدی هاوسەری و كوڕەكەیان، سەردانی ماڵی لانە محەمەدیان كرد و پەرلەمانتارێكیشیان دەڵێت: "باسیان لەسەرهەڵدانی كێشە كۆمەڵایەتییەكەیان كردووە و چەند زانیارییەكی پێویستییان وەرگرتووە".

ئەمشەو 21ی تشرینی یەكەمی 2019 شاندی لیژنەی مافی مرۆڤ لەپەرلەمانی كوردستان سەردانی ماڵی لانە محەمەدیان كرد، زانا مەلا خالید، پەرلەمانتاری لیژنەی مافی مرۆڤ لەپەرلەمانی كوردستان لەكۆنگرەیەكی رۆژنامەوانیدا رایگەیاند: سەردانی ماڵی لانە محەمەد وەك یەكەم قۆناغی بەدواداچوونیان بووە و لەنزیكەوە باسیان لەسەرهەڵدانی كێشە كۆمەڵایەتییەكەیان كردووە و چەند زانیارییەكی پێویستییان وەرگرتووە و دەستخۆشی لەهێزە ئەمنییەكان دەكەن بۆ بەدواداچوونی كەیسە و قۆناغەكانی لێكۆڵینەوە.

ناوبراو وتی :"باوەڕی تەواومان بەدەزگاكانی حكومەتی هەرێم، پۆلیس و ئاسایش هەیە بۆ گەیشتن بەئەنجامی كۆتایی، بەڵام لەڕووی چاودێری پەرلەمان چاودێری وردی قۆناغەكانی لێكۆڵینەوەی دادگا و هێزە ئەمنییەكان دەبین، پاشان راپۆرت بۆ سەرۆكایەتی پەرلەمان بەرز دەكەینەوە".

هەر ئەمشەو ئەم لیژنەیەی پەرلەمان سەردانی ماڵی ئامانج بابانی و سبەینێش سەردانی دەزگا ئەمنییەكان دەكەن.

شەوی چوارشەممەی رابردوو ئامانج بابانی و لانە محەمەدی هاوسەری لەگەڵ منداڵە تەمەن 3 ساڵەكەیان لەنزیك تێرمیناڵی شارەزوور لەشاری سلێمانی بەكوژراویی لەئوتومبیلەكەیان دۆزرانەوە، دواتر پۆلیسی سلێمانی رایگەیاند: رووداوەكە خۆكوژی بووە.

 

پێذاچوونەوە: کارزان ساڵح



created by Avesta Group and powered by Microsoft Azure