هۆشداریی بەجووتیاران دەدرێت

هەواڵ / ئابوری :: پێش 3 هەفتە ‌ :: 225‌ جار بینراوە

دواڕۆژ، رێبین حەسەن

بەهۆی نزمبوونەوەی پلەكانی گەرما و هاتنی شەپۆلێكی سەرما و بارانبارین، لەبارەی زیانەكانی بۆ سەر بەرهەمی تەماتەی خۆماڵی و شێوازی پاراستنی، هۆشداریی بەجووتیاران دەدرێت.


سەڵاح محەمەد، شارەزا و ئەندازیاری كشتوكاڵی، لەبەڕێوەبەرایەتی كشتوكاڵی پێنجوێن، بەدواڕۆژی راگەیاند: لەئێستادا كە پلەكانی گەرما دابەزیون و هاتنی شەپۆلێكی سەرما و بارانبارین روویكردووەتە سنووری قەزای پێنجوێن، بۆیە لەهەر ئەگەرێكی شەپۆلی باران و سەرما، ئەو كێڵگە تەماتانەی كە بەرێكی زۆری كاڵی پێوەیە بۆ ئەوەی سەرما نەیبات و بەخەسار نەڕوات، جوتیاران دەتوانن هەر لەناو كێڵگەكە، بڕە تەماتەكە دابپۆشن بەشێوەیەكی رێكوپێك.

وتیشی: "ئەو داپۆشینە بۆ ئەوەیە تا سەرماكە نەگاتە بڕەكە و زیان بە بەرە ئاڵەكە نەگەیەنێت یان بە رێگەیەكی تر دەتوانن بەرە كاڵەكە لێبكەنەوە لەهۆڵێكی گەرم هەڵی بگرن تا بەرە ئاڵەكە بڕێكی باشی لێ سوور دەبێت و تەماتە گەیوەكە زۆر ئاسایی و تەندروستە".

سامان كەریم، بەڕێوەبەری كشتوكاڵی پێنجوێن بۆ دواڕۆژ، ئاماژەی بەوەكرد: هێشتا بڕێكی زۆر تەماتەی كوردی خۆماڵی لەسنوورەكەماندا ماوە و رۆژانە زیاتر لەهەزار تۆن تەماتە رەوانەی بازاڕەكانی كوردستان و ناوچەكانی دیكەی عێراق دەكرێت.

روونیشیكردەوە: "ئەگەرچی هێشتا تەماتە كۆتایی نەهاتووە، بەڵام ئەمساڵ بەهۆی زۆریی رووبەرێكی زۆر كراوەتە تەماتە، دەتوانین بڵێین بەرهەمی تەماتە زۆر زیاترە لەساڵانی رابوردوو".

پ: چ.ع



created by Avesta Group and powered by Microsoft Azure