خوێندكارێك چەند رۆژێکە لە ماڵ چووەتە دەرەوە و تائێستا نادیارە

هەواڵ / کوردستان :: پێش 3 هەفتە ‌ :: 1109‌ جار بینراوە

دواڕۆژ، رێبین حەسەن

لەسنووری شارۆچكەی پێنجوێن، كوڕە خوێندكارێكی فۆناغی بنەڕەتی بەناوی (رێكان مەحمود) دیار نەماوە و كەسوكارەكەشی داواكارن هەر كەسێك زانیاری لەسەر هەبێت پەیوەندییان پێوە بكەن.


هێرش جەلال، برای رێكان، (ئەمڕۆ یەكشەممە 20ی تشرینی یەكەمی 2019) لەلێدوانێكی تایبەتدا، بەدواڕۆژی راگەیاند: براكەمان كە ناوی رێكان جەلال مەحمودە و دانیشتوی شارۆچكەی پێنجوێنین، ماوەی چەند رۆژێكە دیار نەماوە و تائێستاش هیچ زانیارییەك لەبارەی چارەنووسی نازانین.

ناوبراو، وتیشی: "رێكان لەدایكبووی ساڵی 2005ەو خوێندكاری قۆناغی پێنجی بنەڕەتییە، كاتێك لەخوێندنگە هاتووەتەوە بۆ ماڵەوە و نانی نیوەڕۆی خواردووە، دواتر چووەتە دەرەوە، بەڵام بەداخەوە دیار نەماوە و نازانین چی لێ بەسەرهاتووە".

ئاماژەی بەوەشكرد: لایەنی پۆلیس و ئاسایشمان ئاگاداركردووەتەوە و كێشەی كۆمەڵایەتیشمان لەگەڵ كەس نییە و هیچ كەسێك دوژمنمان نییە و داواكاریشین لە رێگەی سایتی دواڕۆژەوە، وەك ئەركێكی ئینسانی دەنگمان بگەیەنرێت و هەر كەسێك زانیاری لەبارەی براكەمانەوە هەبوو دەتوانن پەیوەندی بكەن بەم ژمارە مۆبایلەوە (07716072929).

سەرچاوەیەك لەبەڕێوەبەرایەتی پۆلیسی پێنجوێن كە لەبەر هەستیاریی پۆستەكەی و هاوكات لەبەر ئەوەی لێدواندان لەبەڕێوەبەرێتی پۆلیسی قەزاكان قەدەغەكراوە و ناوەكەشی لای دواڕۆژ پارێزراوە، رایگەیاند: باوكی ئەو گەنجە خوێندكارە هاتووەتە  بنكەی پۆلیسی پێنجوێن و وەكو هەواڵدەر وتەی داوە و دواتریش چووەتە بەردەم دادوەر و بەهەمان شێوە لەوێش وتەی لێوەرگیراوە.

وتیشی: "لای خۆمانەوە بەنووسراوێكی رەسمی گشتاندنی دیارنەمانەكەیمان بەوێنە و ناوەكەیەوە كردووە، واتە لای ئێمە بووەتە نووسراو، جگە لەوەش بەدواداچوونی باشمان بۆ كردووە و لەهەوڵی بەردەوامداین".

جەختیشی كردەوە: سەرووی خۆمانمان ئاگادار كردووەتەوە بە بڕیاری دادوەر و  وێنەكانمان بۆ ناردوون. ئەوانیش بەوێنە و ناونیشان و ناوی تەواوەوە، گشتاندنی بۆ دەكەن و دەیدەنە سەرجەم بنكە و مەركەزەكانی پۆلیس  لەسەرتاسەری هەرێمی كوردستان و بڵاویدەكەنەوە، بۆ ئەوەی هەر كاتێك سەرەداوێك یان زانیارییەك دەستكەوت راستەوخۆ بەدواداچوونی بۆ بكەن و پاشانیش هەر بەنووسراوی رەسمی پۆلیسی قەزای پێنجوێنی لێ ئاگادار بكەنەوە.

پ: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure