گەرمیان.. لەخۆپیشاندانێکدا چەند داواکاریەک خرایەڕوو

هەواڵ / کوردستان :: 18/10/2019‌ :: 179‌ جار بینراوە

دواڕۆژ، سیروان حەسەن

لەشاری کەلار هاووڵاتیانی گەرمیان دژی لەشکرکێشی تورکیا بۆسەر کوردانی رۆژئاوا خۆپیشاندانێکی جەماوەریان ئەنجامداو داوایان کرد کۆمپانیاکانی تورکیا لە کوردستان دەربکرێن و هاووڵاتیانیش بایکۆتی شمەک و کاڵای تورکی بکەن. 


ئێوارەی ئەمڕۆ هەینی 18ی تشرینی یەکەمی 2019 لەنێو بازاڕی شاری کەلار بە بەشداری سەرجەم چین و توێژەکان خۆپیشاندانێکی بەرفراوان دژی لەشکرکێشی تورکیا بۆ سەر رۆژئاوا ئەنجامدرا. 

لە وتارێکدا مامۆستا حەمە ئەمین سەرۆکی لقی گەرمیانی یەکێتی زانایانی گەرمیان پشتگیری مامۆستایانی ئاینی بۆ کوردانی رۆژئاوا دەربڕی و وتی: "پێویستە هاوهەڵوێستی هاوزمان و نەتەوەکەمان بین لەهەر شوێنێکی دونیادا و ئەوەی ئەمڕۆ ئەردۆغان لە رێگەی سوپاوە دژی میلـلەتەکەمان لە رۆژئاوا ئەنجامی دەدات داگیرکاری و زوڵم و ستەمە، بەڵام شەڕڤانان وەڵامی پێویستیان داونەتەوە و دوو هێندە زیانیان لە تورکیا داوە، بەڵام لەبەر ئەوەی تورکیا وڵاتێکی زلهێزە رەنگە پێوەی دیار نەبێت".

هاوکات وتاری خۆپیشاندەران خوێندرایەوە و تێیدا چەند داواکارییەک خرایەڕوو لەوانە، هەڵوەشاندنەوەی گرێبەستی ئابووری لە گەڵ وڵاتی تورکیا، بایکۆتکردنی شمەک و کاڵای تورکی، دەرکردنی کۆمپانیا تورکییەکان لەهەرێمی کوردستان و هاوکاریکردنی ئاوارەکانی ڕۆژئاوا.

پێداچوونەوە: کارزان ساڵح




created by Avesta Group and powered by Microsoft Azure