حکومەت بۆ وەرگرتنەوەی قەرزی هاووڵاتیان پەنا بۆ یاسا دەبات

هەواڵ / کوردستان :: پێش 4 هەفتە ‌ :: 1941‌ جار بینراوە

دواڕۆژ، هانا چۆمانی

وەزارەتی كاروكاروباری كۆمەڵایەتی رایدەگەیەنێت دەستکراوە بە وەرگرتنەوەی قەزی بچووک، ئەو قەرزەی ساڵانی پێش قەیران بە گەنجان دەدرا بۆ پرۆژەکانیان. هەموو ئەوانەیش كە کاتی هاتووە قەرزەکەیان بدەنەوە دەبێت لە وادەی خۆیدا و بەپێی قیستەکان بیگەڕێننەوە ئەگەرنا رێکاری یاسایی لە دژی خۆیان و کەفیلەکانیان دەگرنەبەر.

ئارام ئەنوەر بەڕێوەبەری قەرزی بچووك لە وەزارەتی كاروكاروباری كۆمەڵایەتی، بە دواڕۆژی راگەیاند"دوای ئەوەی بۆ ماوەی نزیکەی ٤ ساڵ وەرگرتنەوە قەزری بچووک بە بڕیاری حکومەتی هەرێمی کوردستان و بەهۆی قەیرانی داراییەوە راگیرابوو، ئیستا دەستکراوە بە وەرگرتنەوەی قەرزەكان و بەپێی ریزبەندی و قیستی هاووڵاتیانی سوودمەند پەیوەندییان پێوەدەکرێت بۆ ئەوەی قەرزەکە بگەڕێننەوە".

ئارام دەڵێت: "ئاگادارین ژمارەیەك لە گەنجان کە قیستەکانیان وەرگرتووە چوونەتە ئەوروپا یان بەشێکیان بەبیانووی جیاجیا نایگەڕێننەوە، ئێمە تەنیا کاری خۆمان دەکەین و پەیوەندییان پێوەدەکەین، لەئەگەری نەگێڕانەوەی قیستەکانیان لە وادەکانی خۆیاندا یان خۆدزینەوە لە دانەوەی، ئەوا بە فەرمی رێکاری یاسایی دژی خۆی و کەفیلەکانی دەگرینەبەر".

لەبارەی رێکارە یاساییەکان، بەڕێوەبەری قەرزی بچووك لە وەزارەتی كاروكاروباری كۆمەڵایەتی، وتی: "بەوپێیەی هەر کەسێک کە قەرزەکەی وەرگرتووە دوو کەفیلی هەیە کە فەرمانبەری حکومەتی هەرێم-ن ئێمە نووسراوی تایبەت دەکەین بۆ فەرمانگەی کەفیلەکان و لەوێ مانگانە یەک لەسەر سێی پارەکەی دەگێڕینەوە بەپێی قیستەکان تا قسیتەکە تەواو دەبێت، ئەوەیش قانونی حکومەتە و بۆهەموو قەرز و پێشینەکان وایە لەئەگەری نەدانەوە پەنا بۆ مووچەی کەفیلەکان دەبرێت".

وتیشی:"پلانمان هەیە لەماوەیەکی نزیکدا بە هەمان پارە و داهاتی وەرگیراوەی قیستەکان، پرۆژەکە دەستپێبکاتەوە و قەرز بدرێتەوە بە هاووڵاتیان".

پ: ل. م



 



created by Avesta Group and powered by Microsoft Azure