تورکیا هەڕەشە لەم وڵاتە دەکات

هەواڵ / جیهان :: پێش 4 هەفتە ‌ :: 34324‌ جار بینراوە

دواڕۆژ

ئەمشەو 13ی تشرینی یەکەمی 2019 راوێژکارێکی رەجەب تەیب ئەردۆغان، سەرۆکی تورکیا رایگەیاند: کە هێزەکانی وڵاتەکەی رووبەڕووی سوپای سوریا دەبنەوە ئەگەر بچێتە ناو باکور و خۆرهەڵاتی سوریاوە.


یاسین ئەقتای، راوێژکاری رەجەب تەیب ئەردۆغان، سەرۆکی تورکیا بە ئاژانسی هەواڵی سپوتنیکی راگەیاند: سوپای سوریا کە نەیتوانیوە تائێستا شەڕ دژی یەپەگە بکات کە دەیانەوێت لە سوریا جیا ببنەوە و دەوڵەتی سەربەخۆ دروست بکەن، ئێستا ئەگەر دەتوانێت رووبەڕووی سوپای تورکیا ببێتەوە، ئەوا با بفەرموێت.

وتیشی: "ئەگەر سوپای سوریا رووبەڕووی ئەو کارانەی ئێمە بوونەوە لە باکور و خۆرهەڵاتی سوریا، ئەوا پێکدادان لەنێوان سوپاکانماندا روودەدات".

ئەوەشی وت: "ئەگەر سوپای سوریا دەتوانێت ئاسایش لە ناوچەکانی باکور و خۆرهەڵات بەدیبێنێت بۆچی تائێستا چاوەڕێی دەکرد؟ بۆچی ئێستا لە دوای هاتنە ناوەوەی سوپای تورکیا دەیانەوێت بێنە ناوەوە؟"

باسی لەوەشکرد: سوپای سوریا هێزێکی ئەوەندەی نییە و هیچ کارێکیشی بە باکور و خۆرهەڵاتی سوریا نییە، ئەگەر هاتیشنە ئەو ناوچەیە ئەوا دەبێ بزانن رووبەڕووی کێ دەبنەوە، هێزە ئەمریکییەکان یان یەپەگە یان تورکیا؟ بۆیە دەبێت پێش هاتنە ناو ناوچەکە بیر بکەنەوە و دۆخەکە ئاڵۆز نەکەن.

ئاماژەی بەوەشکرد: ئەگەر ئەو هەواڵانە راست بن کە سوریا لەگەڵ هەسەدە رێککەوتبێت و چەند ناوچەیەک بدرێت پێیان، ئەوا راگەیاندنی دژایەتییە بەرامبەر تورکیا.

چەند سەرچاوەیەک لە لە قامیشلۆ رایانگەیاند کە هەسەدە و سوریا بۆ رووبەڕووبوونەوەی لەشکرکێشییەکەی تورکیا رێککەوتوون.

باسیان لەوەشکردووە کە رێککەوتنەکەی دیمەشق و هەسەدە بە چاودێری رووسیا بووە.

ئێوارەی ئەمڕۆ رژێمی سوریا لە دژی ئۆپراسیۆنەکەی تورکیا لە خۆرئاوای کوردستان هێزی جوڵاند.

ئاژانسی هەواڵی سپوتنیک بڵاویکردەوە: چەند سەرچاوەیەک لە سوپای سوریا رایگەیاندووە کە لە چەند ناوچەیەکەوە سوپای سوریا بەرەو منبج بەڕێکەوتووە.

باسی لەوەشکردووە: کە لەنێوان سوریا و رووسیا و هەسەدە رێککەوتن هەیە کە پۆلیسی رووسی و چەند یەکەیەکی سوپای سوریا بچنە ناو منبج و کۆبانی-یەوە.

ئەمەش لەکاتێکدایە کە ماوەی پێنج رۆژە سوپای تورکیا ئۆپراسیۆنێکی بۆ داگیرکردنی خۆرئاوای کوردستان دەستپێکردووە.


ئا: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure