یەکەم کردەوەى پاشماوەکانى داعش لە رۆژئاواى کوردستان دەستیپێکرد

هەواڵ / کوردستان :: 09/10/2019‌ :: 2426‌ جار بینراوە

دواڕۆژ

لەپاش دەستپێکردنى پەلامارەکانى تورکیا بۆ سەر رۆژئاواى کوردستان، یەکەم کردەوەى پاشماوەکانى داعش لە رۆژئاواى کوردستان دەستپێکرد، پاش ئەوەى ژنە دەستگیرکراوەکانى کەمپى هۆڵ پەلامارى پاسەوانانى کەمپەکەیاندا و ئاگریان لە خێوەتەکان بەردا.


کەناڵى ئەلعەرەبیە بڵاویکردەوە: ژنانى دەستگیرکراوى چەکدارانى داعش لە کەمپى هۆڵ هێرشیانکردوەتەسەر پاسەوانانى کەمپەکە و ئاگریان لە هەندێک خێوەتدا کردوەتەوە.

ئەو کردەوەیەى ژنە دەستگیرکراوەکان پاش دەستپێکردنى هێرشەکانى تورکیا بۆ سەر چەند ناوچەیەک لە رۆژئاواى کوردستان دێت، کە ئەمڕۆ لەرێى بۆمبهاوێژ و فڕۆکەى سەربازییەوە ئەنجامدرا.

کەمپى هۆڵ دەکەوێتە ریفى حەسەکە و ژن و منداڵانى پاشماوەى چەکدارانى داعشى تیا کۆکراوەتەوە.

لاى خۆیەوە ئاژانسى (ANF NEWS)ى نزیک لە یەکینەکانى پاراستنى گەل رووداوەکەى دوپاتکردەوە و ئاشکرایکرد: ژمارەیەک لە دەستبەسەرکراوانى کەمپەکە دوابەدواى ئەو رووداوە هەڵهاتوون. 

هەر لەو چوارچێوەیەدا ئەمڕۆ دوو بەرپرسى ئەمریکى و سەرچاوەیەکى سەربازى کوردى رایگەیاند: شەڕڤانان پڕۆسە سەربازییەکانیان دژ بە داعش لە سوریا وەستاندووە هاوکات لەگەڵ دەستپێکردنى هێرشەکەى تورکیا بۆ سەر باکورى رۆژهەڵاتى سوریا.

سەرچاوە سەربازییەکەى کورد راشیگەیاند: هێزەکانى سوریاى دیموکرات پڕۆسەکانى دژ بە داعشى راگرتووە، بەهۆى ئەوەى ئەستەمە هیچ هەنگاوێک بنرێت لەکاتێکدا لەلایەن سوپایەکى گەورەوە لەسەر سنوور لە بەردەم هەڕەشەدا بیت.



created by Avesta Group and powered by Microsoft Azure

بەپەلە