زانیاری نوێ‌ لە بارەی ڕووفاتەكانی سیتەكەوە ئاشکراکرا

هەواڵ / کوردستان :: 09/10/2019‌ :: 285‌ جار بینراوە

دواڕۆژ، هەوراز ئەحمەد

پۆلیسی سلێمانی ئاشكرای دەكات, یەكێك لەو سێ‌ ڕووفاتە ناسراوەتەوە كە لە باخێك لە ناحیەی سیتەكی سەربەر پارێزگای سلێمانی دۆزرایەوە, كە كوردە و خەڵكی شاری سلێمانیە و خێزانەكەشی دۆزراوەتەوە و مێژووی تەرمەكانیش دەگەڕێتەوە بۆ ساڵی نەوەدەكان.


د.بەرزان محەمەد بەڕێوەبەری پزیشكی دادی سلێمانی بە دواڕۆژی ڕاگەیاند: ئەو سێ‌ ڕووفاتە هێنراوەتە پزیشكی دادی لە ئێستا سەرقاڵی توێكارین بۆ ڕووفاتەكان, ئەمڕۆش تیشكیان لێدەدرێت, پاش تەواو بوونی پشكنینی تەواوەتی ڕاپۆرتی خۆمان دەدەین بە لایەنی لێكۆڵینەوە".

وتیشی: "ڕۆژانە چەند كەس دێن بۆ ئەوەی دڵنیابن لەوەی كە ئەو تەرمانە كەسوكاری ئەوانن یان نا, بۆیە سامپڵی خوێنیان لێوەردەگرێت دەنێردرێت بۆ پشكنینی (دی ئێن ئەی) لەوێ‌ دڵنیا دەبین كە ئەو  دوو تەرمەی دیكە هی كام خێزانە".

سەركەوت ئەحمەد وتەبێژی پۆلیسی سلێمانی بە دواڕۆژی ڕاگەیاند: لە ڕێگای هەواڵدەرێكەوە ئەو سێ‌ ڕووفاتە دۆزراتەوە,كە سەرجەمیان لە ڕەگەزی نێرن و كوردن و مێژووی تەرمەكانیش دەگەڕێتەوە بۆ ساڵی نەوەدەكان.

ئاماژەی بەوەش كرد: ناسنامەی یەكێك لە ڕووفاتەكان ئاشكرا بووە و خێزانەكەشی دۆزراوەتەوە و خەڵكی شاری سلێمانیە, لە ئێستاشدا لێكۆڵینەوە بەردەوامە بۆ ئەوەی بزانرێت هۆكاری كوشتنی ئەو كاسانەی چی بووە, ئەو خێزانەش لە لایەن پۆلیسەوە وتەیان لێ‌ وەردەگیرێت, تاوەكو وێنەی تەواوی ڕوداوەكەمان بۆ ئاشكرا ببێت.
 
پ: ک. س



created by Avesta Group and powered by Microsoft Azure