"دابەشکردنی مووچە بەردەوام دەبێت"

هەواڵ / کوردستان :: 08/10/2019‌ :: 32730‌ جار بینراوە

دواڕۆژ، عیسا عه‌بدولقه‌هار

به‌بێ ئاشكراكردنی هۆكاره‌كه‌ی، دابه‌شكردنی مووچه‌ی فه‌رمانبه‌ران بۆ ماوه‌ی دوو رۆژ دواكه‌وت و وته‌بێژی حكومه‌تی هه‌رێمیش له‌رێگه‌ی دواڕۆژ_ه‌وه‌ دڵنیایی به‌ مووچه‌خۆران ده‌دات و ده‌ڵێت: "دابه‌شكردنی مووچه‌ به‌رده‌وامده‌بێت".


دوای دوو رۆژ له‌ دواكه‌وتنی، سێشه‌ممه‌ 8ی تشرینی یه‌كه‌م، مووچه‌ی دیوانی وه‌زاره‌تی پێشمه‌رگه‌ و لیواكان دابه‌شبكرا.

دواكه‌وتنی مووچه‌ی فه‌رمانبه‌ران له‌كاتێكدایه‌، كه‌ ماوه‌ی هه‌فته‌یه‌كه‌ خۆپیشاندان له‌ به‌غدا و چه‌ند پارێزگایه‌كی دیكه‌ی عێراق به‌رده‌وامی هه‌یه‌، ئه‌مه‌ش ترسی لای هاوڵاتیانی هه‌رێم درووستكردووه‌ كه‌ به‌هۆی به‌رده‌وامی خۆپیشاندانەكانه‌وه‌، دابه‌شكردنی مووچه‌ی فه‌رمانبه‌ران بكه‌وێته‌ مه‌ترسییه‌وه‌ و دابه‌شنه‌كرێت.

له‌باره‌ی دابه‌شكردنی مووچه‌ی فه‌رمانبه‌ران، ئه‌مڕۆ سێشەممە جوتیار عادل وته‌بێژی حكومه‌تی هه‌رێم تایبه‌ت بۆ دواڕۆژ، دڵنیایی به‌ سه‌رجه‌م فه‌رمانبه‌ران و هاووڵاتیانی هه‌رێمدا كه‌ دابه‌شكردنی مووچه‌ ناوه‌ستێت.

وته‌بێژی حكومه‌ت، وتیشی: "به‌دڵنیاییه‌وه‌، دابه‌شكردنی مووچه‌ی مانگانه‌ فه‌رمانبه‌ران و چین وتوێژه‌كانی دیكه‌ی هه‌رێم، به‌رده‌وامده‌بێت".

 ئه‌م مووچه‌یه‌ی دابه‌شده‌كرێت، مووچه‌ی مانگی ته‌مموزی 2019یه‌و هه‌شته‌م مووچه‌یه‌، كه‌ به‌بێ پاشه‌كه‌وت دابه‌شده‌كرێت.

له‌ 8ی ئازاری ساڵی رابوردوو، حكومه‌تی هه‌رێم بڕیاریدا به‌ هه‌ڵوه‌شاندنه‌وه‌ی یه‌كجاری پاشه‌كه‌وتی مووچه‌ی فه‌رمانبه‌ران و چین و توێژه‌كانی دیكه‌ی هه‌رێم
بۆ دابه‌شكردنی مووچه‌، حكومه‌تی هه‌رێم مانگانه‌ پێویستی به‌ 881 ملیار دینار هه‌یه‌، كه‌ 453 ملیار دیناری مانگانه‌ له‌لایه‌ن به‌غداوه‌ پێده‌گات، هه‌روه‌ها 378 ملیار دیناری دیكه‌ش له‌لایه‌ن وه‌زاره‌تی سامانه‌ سروشتییه‌كانه‌وه‌ له‌ فرۆشتنی نه‌وت به‌ وەزارەتی دارایی ده‌درێت، ئه‌و 50 ملیار دیناره‌شی ده‌مێنێته‌وه‌ له‌لایه‌ن ئه‌نجومه‌نی وه‌زیرانی هه‌رێمەوە دابینده‌كرێت.

پ: ک. س



created by Avesta Group and powered by Microsoft Azure