"ئەمساڵیش هەورامان دەبێتە خاوەنی 10 ملیۆن گوێز"

هەواڵ / ڕاپۆرت :: پێش 2 هەفتە ‌ :: 348‌ جار بینراوە

دواڕۆژ، ڕاپۆرتی عەلی حەمە سەعید


بەهۆی هەڵكەوتەی شوێنی جوگرافی و هەروەها لەباریی كەشوهەواكەیەوە، لە ناوچەی هەورمان ساڵانە باشترین جۆری گوێز بەرهەمدەهێنرێت، بە وتەی هەورامییەكانیش هەرچەندە گوێزی دەرەكی هاوردەی بازاڕەكان دەكرێت، بەڵام لە نرخی گوێزەكەی ئێمە كەمناكاتەوە و كڕیاری تایبەتیمان هەیە، بەرپرسانی كشتوكاڵی ناوچەكەش دڵخۆشن بە بەرهەمی ئەمساڵی گوێز.

ئەمساڵیش جۆر و بڕ و كوالیتی گوێزی هەورامان لە ئاستێكی باشدایە.
هەردی مەعروف، یەكێك لە خاوەن باخە گوێزەكانی تەوێڵە، بە دواڕۆژی ڕاگەیاند "بەهۆی ئەوەی ئەمساڵ ڕێژەیەكی باش باران باری و هەروەها پلەكانی گەرماش تا ڕادەیەكی باش نزم بوونەوە، خۆشبەختانە ئەمە كاریگەرییەكی باشی هەبوو لەسەر بڕ و جۆر و كوالیتی بەرهەمی گوێزی ناوچەی هەورامان، بۆیە ئێستا دەستمان كردووە بە تەكاندن و كۆكردنەوەی بەرهەمی ئەمساڵی گوێز و تا كۆتایی ئەم مانگە تەكاندنی گوێز بەردەوامیی دەبێت.

ئەمساڵ باشترین جۆری گوێز هەزار دانەی بە 90 هەزار دەفرۆشرێت
ئاماژەی بەوەشكرد، بەهۆی ئەوەی ئێستا سەرەتای تەكاندنی گوێز و كۆكردنەوەی بەرهەمەكەیەتی لەگەڵیشیدا نرخێكی دیاریكراو لەسەر بەرهەمی گوێز دانراوە و هاوشێوەی ساڵانی ڕابوردوو ئەمساڵیش سێ‌ جۆر نرخ بۆ گوێزدانراوە، بەجۆرێك هەزار گوێزی نمرە یەك بە80 تا 90 هەزار دینار و گوێزی نمرە دوو بە 65 تا 70 هەزار و گوێزی نمرە سێش بە 55 تا 60 هەزار دینار دیاریكری كراوە.

گوێزی هەورامان كڕیاری تایبەتی هەیە.
ئاوێسەر سەباح، یەكێك لە خاوەن باخە دارگوێزەكانی بیارە بە دواڕۆژی ڕاگەیاند "لەگەڵ ئەوەی بە بەراورد بە باخە دارگوێزەكانی تەویڵە دارگوێزەكانی بیارە درەنگتر پێدەگەن و دەتەكێندرێن، بەڵام ئەمە كاریگەری ناكاتە سەر ساغكردنەوەی بەرهەمەكانمان، چونكە گوێزی بیارە و تەوێڵە لە باشترین جۆری گوێزەو ساڵانە پێش وەرزی پێگەیشتینان لەلایەن خەڵكی سلێمانی و شارەكانی ترەوە ئاگادار دەكرێینەوە كە بەرهەمەكانمان نەبەینە بازاڕەوە ئەوان لێمان دەكڕن، چونكە ئێستا خەڵك لەوە تێگەیشتوون ئەو گوێزە لە وڵاتانی ترەوە دێت هەرچەندە لە ڕووی نرخەوە هەرزانە، بەڵام لە ڕووی جۆر و كوالیتییەوە ناگات بە گوێزی هەورامان.

بەرهەمهێنانی گوێز پێویستی بە ئەزمون و شارەزایی هەیە
ئەو خاوەن باخە ئەوەشی خستەڕوو، ئەوەی تا ئێستا ماوەتەوە و توانیومانە درێژەی پێبدەین، ئەوەیە كە سودمان لە شارەزایی و ئەزمونی باوباپیرانمان وەرگرتووە بۆ چۆنیەتی مامەڵەكردن لەگەڵ دارگوێزەكاندا بەو جۆرەی كە باشترین جۆری گوێز بەرهەمبهێنین ئەو نازناوەی كە هەورمان هەیەتی لە باشترین جۆری گوێز بپارێزین، بۆیە ئێستاش ئەركی ئێمە سەختتر بووە كە نەوەكانی ئێستا فێری ئەو شارەزاییە بكەین بۆ ئەوەی هەورامان هەر بە باشترین جۆری گوێز بەناوبانگ بێت.

ئەمساڵ لە سنوری هەورامان 10 ملیۆن گوێز بەرهەمهاتووە
ستار مەحمود، بەڕێوەبەری گشتی كشتوكاڵی هەڵەبجە بۆ دواڕۆژی ڕاگەیاند: بەگوێرەی ئەو ئامارانەی لە بەردەستماندا هەن بەشێوەیەكی گشتی لە سنوری پارێزگای هەڵەبجە زیاتر لە 80 هەزار دار گوێزی بەردار بونیان هەیە و ئەمساڵ نزیكەی 10 ملیۆن گوێز بەرهەمهاتووە كە زۆربەیان دەكەونە ناوچەی هەورامان بەتایبەت تەوێڵە و بیارە و گوندی هاوار، ساڵانەش بە دەیان تۆن لەباشترین جۆری گوێز بەرهەمدەهێنن، بەڵام دار گوێزەكانیش بە دوور نین لە چەندین نەخۆشی و گرفت كە ئەوە ئەركی ئێمەیە چارەسەریان بكەین.

ئەوەشی وت، ئەمساڵ بە بەراورد بە ساڵانی ڕابوردوو بڵاوبوونەوەی نەخۆشییەكانی دارگوێز لە سنورەكەدا كەم بوو ئەوەش نەبووەتە هۆی ئەوەی بەرهەمی ئەمساڵ خراپ بێت، بۆیە هەركات خاوەن باخەكان داوایان لێكردبێتین ئێمە توانیمان لەڕێگەی دەرمانی قڕكەرەوە چارەسەری ئەو نەخۆشییانە بكەین كە ڕووبەڕووی دارگوێزەكان بووەتەوە و هاوكاری خاوەن باخەكانمان كردووە.



  • ڕۆژ
  • هەفتە
  • مانگ
created by Avesta Group and powered by Microsoft Azure