داهاتی فڕۆکەخانەکانی هەرێم زیادی کردووە

هەواڵ / ئابوری :: پێش 3 هەفتە ‌ :: 143‌ جار بینراوە

دواڕۆژ، راپۆرتی سەنگین خۆشناو

راگرتنی گەشتە ئاسمانییەکانی هەرێمی کوردستان لە ساڵی 2017 بۆ ماوەی شەش مانگ کاریگەری زۆری لەسەر داهاتی فڕۆکەخانەکانی هەرێمی کوردستان دروستکرد، بەڵام ئەوەی کە زۆرترین زیانی بەرکەوت فڕۆکەخانەی نێودەوڵەتی سلێمانی بووە.

بەپێی ئامارەکانی فڕۆکەخانەی نێودەوڵەتی سلێمانی، ساڵی رابوردوو داهاتی فڕۆکەخانەکە 8 ملیار و 964 ملیۆن دینار بووە، ئەمە لەکاتێکدایە، خەرجی فڕۆکەخانەکە 18 ملیار و 64 ملیۆن دینار بووە.

ئەمساڵ بەهۆی نەمانی گەمارۆ ئابوورییەکانی بەغدا و دەستپێکردنەوەی گەشتە ئاسمانییەکانی تورکیا، فڕۆکەخانەی سلێمانی داهاتی شەش مانگی یەکەمی ئەمساڵی بەرزبووەتەوە، بەجۆرێک داهاتی شەش مانگی یەکەمی ئەمساڵی فڕۆکەخانەی نێودەوڵەتی سلێمانی 6 ملیار و 331 ملیۆن دینار بووە، بەمەش بەراورد بە شەش مانگی یەکەمی ساڵی رابوردوو ملیارێک و 849 هەزار دینار زیادیکردووە.

تاهیر عەبدوڵا، بەڕێوەبەری گشتی فڕۆكەخانەی نێودەوڵەتی سلێمانی بۆ دواڕۆژ دەڵێت: "بەهۆی گەمارۆی توركیا، جگە لە هێڵە ئاسمانییەكانی توركیا، ئەو هێڵانەشی گەشتیان بەسەر خاكی توركیادا بوو وەستان، بۆیە ژمارەی گەشتیارانمان لە ساڵی رابوردوودا زۆر كەمی كرد".

دەشڵێت: "ئێستا هەموو هێڵە ئاسمانییەكان گەڕاونەتەوە، تەنانەت ئەمساڵ هێڵی ئاسمانی ستارئێریش زیاد بووە كە گەشتی راستەخۆی هەیە بۆ هۆڵەندا، هێڵی جۆرجیاش زیاد بووە كە بەردەوام گەشتی هەیە. بۆیە گەشبینین ئەمساڵ ژمارەی گەشتیارانمان زۆر زیاتر بێت لە ساڵی 2016 کە نزیکەی   526 هەزار گەشتیار بوو.

ئاماژەی بەوەشدا: "زۆری دەوێت تا بگەینە ئەو ئاستەی قەرەبووی زیانەکانی ساڵانی رابوردوو بکەینەوە، چونکە زیانەکان کەم نین".

فڕۆکەخانەی نێودەوڵەتی هەولێر جگە لە ژمارەی گەشتیاران داهاتەکانی بۆ دەزگا راگەیاندنەکان ئاشکرا ناکات، بەپێی ئامارەکانی وەزارەتی گواستنەوە و گەیاندن لە ماوەی چوار ساڵی رابوردوودا زیاتر لە هەشت ملیۆن گەشتیار لە هەردوو فڕۆكەخانەی نێودەوڵەتی هەولێر و سلێمانی گەشتیان كردووە.

لەئامارەکەدا دەردەکەوێت کە ژمارەی گەشتیاران لەساڵی 2018 بەراورد بە ساڵی 2017 بەڕێژەی نزیکەی 12% کەمیکردووە، هاوکات لەساڵی 2017 بەراورد بە ساڵی 2016 بەڕێژەی 10.8% کەمیکردووە، ژمارەی گەشتیاران لەساڵی 2016 بەراورد بەساڵی 2015 بەڕێژەی 5% زیادیکردووە.

بەپێی ئامارەکان: ژمارەی گەشتیارانی فڕۆکەخانەی هەولێر لە ساڵی 2018 زیاتر لە ملیۆنێک و 553 هەزار گەشتیار بووە، بەراورد بە ساڵی 2017 بەڕێژەی 5%، بەراورد بە ساڵی 2016ش بەڕێژەی 15% کەمیکردووە.

تەلار فایەق، بەڕێوەبەری گشتیی فڕۆكەخانەی نێودەوڵەتی هەولێر بۆ دواڕۆژ دەڵێت: "ئاشکرایە بەغدا بەهۆی ریفراندۆمەوە ماوەی شەش مانگ سزای فڕۆکەخانەکانی دا و سەرجەم گەشتەکان وەستان، ئەمەش وایکرد ساڵی 2018 ببێتە ساڵی کەمبوونەوەی داهات.

دەشڵێت: "مانگی حەوت ژمارەی گەشتیارەكانمان گەیشتە 206 هەزار گەشتیار كە رۆژانە بەتێكڕا دەكاتە 6,866 گەشتیار كە ساڵانی رابوردوو هەرگیز لەو مانگەدا نەگەیشتووین بەو ژمارەیە، بۆیە گەشبینین لە كۆتایی ئەمساڵدا ژمارەی گەشتیارانمان بگاتە 2 ملیۆن گەشتیار".

لە ئاماری حەوت مانگی رابوردوودا دەرکەوتووە: کە 1,104,463 گەشتیار لە فڕۆكەخانەی هەولێرەوە گەشتیان كردووە. بەراورد بە ساڵی رابوردوو ژمارەی گەشتیاران بەڕێژەی 11.8% زیادیكردووە، ژمارەكەش هەمیشە بەرەو هەڵكشانە.

پ: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure