به‌دران چیا كورد: رێڤه‌به‌ریا خوه‌سه‌ر دانپێدانێ ب ده‌ستورێ نوو یێ سوریایێ ناكه‌ت

هەواڵ / چاوپێکەوتن :: پێش 2 هەفتە ‌ :: 111‌ جار بینراوە
به‌دران چیا كورد

دواڕۆژ، دهۆك 

به‌دران چیا كورد، شێوه‌رمه‌ندێ رێڤه‌به‌ریا خوه‌سه‌ر ل باكوورو رۆژهه‌لاتێ سوریایێ، د چاڤدیتنه‌كا دواڕۆژ دا، ده‌ر‌باره‌ى كۆمیته‌یا نڤێسینا ده‌ستوورێ نوو یێ سوریایێ راگه‌هاند: ئه‌گه‌ر نوونه‌رێن كوردان د وێ كۆمیته‌یێ دا نه‌بن، رێڤه‌به‌ریا خوه‌سه‌ر ل باكوور ورۆژهه‌لاتێ سوریایێ دانپێدانێ ب ئه‌نجامێن وێ كۆمیته‌یێ ناكه‌ت.


دواڕۆژ: بۆچى كورد و نوونه‌رێن رێڤه‌به‌ریا خوه‌سه‌ر د كۆمیته‌یا نڤێسینا ده‌ستوورێ نوو یێ سوریایێ دا نینن؟
به‌دران چیا كورد
: ئه‌ڤ كۆمیته‌، ژ ئالیێ وان وه‌لاتان هاتییه‌ پێكهینان یێن ل سوریایێ خۆدان كاریگه‌رینه‌، وان وه‌لاتان بۆ پاراستنا به‌رژه‌وه‌ندیێن خوه‌ ئه‌و كۆمیته‌ چێكریه‌، به‌رژه‌وه‌ندیێن گه‌لێ سوریایێ ل به‌رچاڤ نه‌گرتینه‌، له‌ورا ئیرادا 30% ژ گه‌لێ باكوورو رۆژهه‌لاتێ سوریایێ دڤێ كۆمیته‌یێ دا جهـ نه‌بوویه‌‌.

دواڕۆژ: د ڤێ كۆمیته‌یێ دا دوو كورد دناڤ ئه‌ندامێن هه‌ڤپه‌یمانیا سوریایێ دا هه‌نه‌، ئه‌رێ ئه‌و دێ شێن نوونه‌راتیا كوردان كه‌ن؟
به‌دران چیا كورد
: لادانا نوونه‌رێن رێڤه‌به‌ریا خوه‌سه‌ر، واته‌ لادانا پرۆژه‌یێ رێڤه‌به‌ریا خوسه‌ر بۆ ده‌ستوورێ سوریایێ و چاره‌سه‌ر‌كرنا ئاریشه‌یێن بنگه‌هین یێن ڤى وه‌لاتى، تركیا و ئیران و روسیا و سوریا، دژى رێڤه‌به‌ریا خوه‌سه‌ر رێككه‌ڤتینه‌، له‌ورا دیاركرنا دوو كوردان دناڤ هه‌ڤپه‌یمانیا سوریایێ دا نابیته‌ نوونه‌راتیا كوردان، چنكو پێدڤییه‌ رێژا كوردان د ڤێ كۆمیته‌یێ دا نه‌كێمتر بیت ژ 17%.

دواڕۆژ: "كورد ل مه‌یدانێن شه‌ڕان سه‌ركه‌ڤتینه‌، لسه‌ر مێزا دانوستاندنان دووراینه‌" ئه‌ڤ جاره‌ ژى دێ كورد ژئالیێ سیاسیڤه‌ رۆژئاڤیێ كوردستانێ دوورینن؟
به‌دران چیا كورد
: لدوور ڤێ مژارێ، نوونه‌رێن رێڤه‌به‌ریا خوه‌سه‌ر، ب هه‌موو ره‌نگان خه‌باتێن خوه‌ یێن سیاسى دكه‌ن، رێڤه‌به‌ریا خوه‌سه‌ر، هه‌لوه‌ستێ خوه‌ ب زه‌لالى گه‌هاندییه‌ نه‌ته‌وه‌یێن ئێكگرتى و ئه‌مریكا و ئه‌ورۆپا كو ئه‌و ئه‌نجامێن كۆمیته‌یا ده‌ستوورێ نوو یێ سوریایێ ب ڤى ره‌نگى قبۆل ناكه‌ن، چنكو ئه‌ڤ كۆمیته‌‌ نوونه‌راتیا 30% ژ گه‌لێ سوریایێ ناكه‌ت.

دواڕۆژ: ئه‌گه‌ر نوونه‌رێن رێڤه‌به‌ریا خوه‌سه‌ر نه‌بوونه‌ ئه‌ندامێن ڤێ كۆمیته‌یێ، هه‌لوه‌ستێ كوردان و رێڤه‌به‌ریا خوه‌سه‌ر دێ لسه‌ر پاشه‌ڕۆژا سوریایێ چۆبیت؟
به‌دران چیا كورد
: ره‌نگه‌ وى ده‌مى، سوریا به‌ر ب پارچه‌بوونێ بچیت، چنكو مافێن كوردان  ئه‌و گه‌لێن ل هه‌رێمێن رێڤه‌به‌ریا خوه‌سه‌ر دژین د ده‌ستوورێ سوریایێ دا ناهێنه‌ بجهكرن، رێڤه‌به‌ریا خوه‌سه‌ر ئه‌و هۆشدارى دایه‌ وه‌لاتێن زلهێز و سوریایێ ژى، نه‌بنه‌ ئه‌گه‌رێ جۆدابوونا سوریایێ، لێ ژبه‌ر خاترا تركیا، روسیا و و ئه‌مریكا نه‌ڤییایه‌ چۆ بڕیاران لسه‌ر تركیا ب سه‌پینن و د كۆمیته‌یا ده‌ستوورێ سوریایێ دا جهـ نه‌دایه‌ كوردان، چنكو تركیا گه‌له‌ك به‌رژه‌وه‌ندى دگه‌ل تركیا هه‌نه، لێ ئه‌ز دبێژم ئه‌ڤ كۆمیته‌‌ نه‌شێت چۆ ئه‌نجامان بده‌ستڤه‌ بینیت، چنكو له‌سه‌ر داخواز گه‌لێ سوریایێ نه‌هاتیه‌ پێكهینان.

دواڕۆژ: هه‌لوه‌ستێ روسیا ب ته‌مامى به‌رامبه‌ر كوردان هاتیه‌ گۆهه‌رتن، بۆ چێكرنا ده‌ڤه‌را ئارام، روسیا پشته‌ڤانییا پرۆژێ تركیا دكه‌ت، بۆچى؟
به‌دران چیا كورد
: هه‌لوه‌ستێ روسیا د كۆمبوونا ئاستانه‌ یا 13-ێ دا، باش زه‌لالبوو كو كیانێ باكوور و رۆژهه‌لاتێ سوریایێ قبول ناكه‌ن، لگۆر هه‌لوه‌ستێ روسیا خوه‌یابوو؛ پێدڤییه‌ باكوور و رۆژهه‌لاتێ سوریایێ، بكه‌ڤیته‌ ژێر كۆنترۆلا رژێما سوریایێ و ئه‌و رێ ناده‌ن چۆ كیان ل ژێر ناڤێ خه‌باتا دژى تیرۆرێ ل وێ هه‌رێمێ چێببن‌، پشتى 2016-ێ، تێكه‌لیێن روسیا و تركیا پێشكه‌ڤتن، له‌ورا روسیا بۆ پاراستنا وان تێكه‌لیان لدووڤ گه‌له‌ك داخوازیێن تركان دچیت. 

دواڕۆژ: بۆچى ئه‌مریكا هه‌لوه‌سته‌ك زه‌لال به‌رامبه‌ر ڤێ پرسێ نینه و پشته‌ڤانیا رێڤه‌به‌ریا خوه‌سه‌ر‌ نه‌كریه‌؟
به‌دران چیا كورد:
ئه‌مریكا دڤێ قۆناغێدا هه‌لوه‌ستێ خوه‌ لسه‌ر پرسا پشكداربوونا نوونه‌رێن رێڤه‌به‌ریا خوه‌سه‌ر ئاشكه‌را نه‌كریه‌، ئه‌م نزانین دێ هه‌لوه‌ستێ ئه‌مریكا چۆ بیت، چنكو ئه‌مریكا گه‌له‌ك به‌رژه‌وه‌ندى دگه‌ل تركیا هه‌نه‌، ره‌نگه‌ بۆ پاراستنا وان به‌رژه‌وه‌ندییان ئه‌مریكا دژى تركیا نه‌راوه‌ستیت.

دواڕۆژ: جه‌یمس جێفرى، هنارتیێ ئه‌مریكا بۆ سوریایێ گۆتبوو:"ئه‌ندامێن نه‌ته‌وه‌یێن ئێكگرتى بۆ ڤێ كۆمیته‌یێ هه‌لبژاردین، دشێن نوونه‌راتیا باكوور ورۆژهه‌لاتێ سوریایێ بكه‌ن" ئه‌ر ئه‌و ئه‌ندام دێ شێن نوونه‌راتیا رێڤه‌به‌ریا خوه‌سه‌ر‌ كه‌ن؟ 
به‌دران چیا كورد
: هه‌تا نوكه،‌ ب ناڤێ رێڤه‌به‌ریا خوه‌سه‌ر، چۆ كه‌س دناڤ وان ئه‌ندامان دا نینن یێن نه‌ته‌وه‌یێن ئێكگرتى هه‌لبژاردین كو 50 كه‌سن، رێڤه‌به‌ریا خوه‌سه‌ر وان ئه‌ندامان ناس ناكه‌ت و ئه‌و 50 كه‌س نوونه‌راتیا كوردان و رێڤه‌به‌ریا خوسه‌ره‌ ناكه‌ن، هه‌موو ئه‌ندامێن ڤێ كۆمیته‌یێ نه‌شێن ده‌ستوو‌ره‌ك نوو بۆ سوریایێ چێكه‌ن، چنكو ئه‌و ته‌كه‌ز دكه‌ن كو چه‌ند مادده‌یێن ده‌ستوورێ سوریایێ بهێنه‌ گۆهه‌ڕتن، لێ ئه‌م دبێژین؛ پێدڤییه‌ هه‌موو ده‌ستوورێ سوریایێ ژ نوو بهێته‌ نڤێسین، چنكو ب نڤێسینا ده‌ستووره‌ك نوو، دێ شێین مافێن نه‌ته‌وه‌یا كورد یێن سیاسى و كلتورى د وه‌لاتێ سوریایێ دا بنه‌جهـ بكه‌ین.

دواڕۆژ: پاشه‌ڕۆژا رۆژئاڤایێ كوردستانێ به‌ره‌ڤ كیڤه دچیت‌؟ 
به‌دران چیا كورد
: ئه‌م كوردان پشتراست دكه‌ین كو رێڤه‌به‌ریا خوه‌سه‌ر، خۆدان هێز و پره‌نسیپ و رێكخستنه‌، ئێدى سوریا به‌رى 2011-ێ ‌ناڤه‌گه‌ریت، ده‌ستووره‌ك نووژى بۆ سوریێ بێى كوردان بهێته‌ نڤێسین، كورد ب ده‌ستوورێ خوه‌ نابینن، كورد دێ هه‌رێمێن خوه‌ پارێزن و خه‌باتێن كوردان ب هه‌موو ره‌نگان بۆ ده‌ستكه‌ڤتێن سیاسى دێ به‌رده‌وامبن.

پ: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure