سەرۆكی هەرێمی كوردستان پەیامێكی بڵاو كردەوە

هەواڵ / کوردستان :: 04/10/2019‌ :: 1067‌ جار بینراوە

تاگ :: عێراق

دواڕۆژ
نێچیرڤان بارزانی، سه‌رۆكی هه‌رێمی كوردستان پەیامێكی له‌باره‌ی خۆپیشاندانەکان و دۆخی ئێستای عێراق‌ بڵاو كردەوە.

سەرۆكی هەرێم لەپایەمەكەیدا داوای پاراستنی ئاسایش و سه‌قامگیری دەکات و دەڵێت "عێراق لە دۆخێکی هه‌ستیاردایە کە پێویستی بە ئارامی و سەقامگیریی سیاسی و ئەمنی هەیە".

دەقی پەیامەکە

 بە نیگەرانییەوە لە ڕووداو و توندوتیژییەکانی ئەم چەند ڕۆژەی بەغدا و چەند پارێزگایەکی دیکەی عێراق دەڕوانین. خۆپیشاندانی مەدەنی و ئاشتیانە، مافێکی دەستووریی پارێزراوە، بەڵام نابێت بۆ توندوتیژی و پێکدادان و نانەوەی پشێوی و ده‌رچوون له‌ یاسا بگۆڕێت و هه‌ڕه‌شه‌ له‌ ئاسایشی گشتی و تێكدان و هه‌ڵوه‌شاندنه‌وه‌ی دامه‌زراوه‌كانی ده‌وڵه‌ت بكات.

كێشه‌ كه‌ڵه‌كه‌بووه‌كانی عێراق له‌دایكبووی ڕۆژ نین، به‌ڵكوو زاده‌ی ڕه‌فتار و سیاسه‌ته‌ هه‌ڵه‌كانی ده‌یان ساڵی ڕابردووی حكوومه‌ته‌ یه‌ك له‌دوای یه‌كه‌كانی عێراقن و هیچ حكوومه‌تێك ناتوانێت له‌ شه‌و و ڕۆژێكدا چاره‌سه‌ریان بكات. به‌دیهێنانی خواست و داواكانی گه‌ل، هاوكاری و پشتگیریی هه‌موو هێز و لایه‌نه‌كانی ده‌وێت. پاراستنی ئاسایش و سه‌قامگیری و ئێستا و داهاتووی وڵات، ئه‌رك و به‌رپرسیاریه‌تیی هه‌مووانه‌ و وریایی و داناییی هه‌مووانی پێویسته‌.

عێراق لە دۆخێکی هه‌ستیاردایە کە پێویستی بە ئارامی و سەقامگیریی سیاسی و ئەمنی هەیە، ئاڵۆزی و تێکدانی ئاسایش و ده‌رچوونی ڕووداوه‌كان له‌ كۆنترۆڵ، دۆخەکە خراپتر و دژوارتر دەکات، هیچ شتێک چارەسەر ناکات و هەموو گەلانی عێراق تیایدا زەرەمەند دەبن. داواکارین هەموو لایەک دان بە خۆیاندا بگرن، یاسا بپارێزن و به‌رژوه‌ندیی باڵای وڵات ڕه‌چاو بكه‌ن.

نێچیرڤان بارزانی

سەرۆکی هەرێمی کوردستان

4/10/2019



  • ڕۆژ
  • هەفتە
  • مانگ
created by Avesta Group and powered by Microsoft Azure