بەڵێندەران بۆ وەزارەتی دارایی: رەوشمان ناھەموارە

هەواڵ / ئابوری :: 02/10/2019‌ :: 235‌ جار بینراوە

تاگ :: ئابوری

دواڕۆژ، زریان محەمەد

سەرۆکی لقی سلێمانی یەکێتی بەڵێندەران رایدەگەیەنێت: رەوشی بەڵێندەران زۆر ناھەموارە و پێویستە وەزارەتی دارایی و حکومەت رەوشیان باش بکات، ئەگەرنا کاریگەریی لەسەر کاری بەڵێندەران دەبێت و مایەپووچ دەبن.


ناجی شێخ عیزەدین، سەرۆکی لقی سلێمانی یەکێتی بەڵێندەرانی کوردستان (ئەمڕۆ چوارشەممە 2ى تشرینى یەکەمى 2019) بە دواڕۆژی وت: "سەرۆکی حکومەت رایگەیاندووه‌ کە کێشەی دارایی چارەسەرکراوە، لەسەر ئەو قسانەی بڕی 600 ملیار دینار دانراوە بۆ بەڵێندەران لەھەر چوار پارێزگاکەی کوردستان کە لە 2019دا بتوانن خەرجی بکەن، كه‌چى بەبێ ئەوەی قیرانی تازە روویدابێت لە مانگی رابوردووە پێدانی تەمویلی سلێمانی بۆ ھەموو پڕۆژەکان راوەستاوە، ئەمه‌ش دەبێتە ھۆی شەلەلبوون و خاوبوونەوەی کاری تەواوی پڕۆژەکان و زەرمەندی یەکەمیش ئەو بەڵێندەرانەیە کە چاوەڕێی وەرگرتنی پارەن بۆ تەواوکردنی کارەکانیان".

وتیشى: "له‌وه‌ نیگه‌رانین كه‌ حکومەت بڕیارێکی راست و دروستی نییە به‌رامبه‌ر به‌وه‌ى نزیکەی سێ ھەزار پڕۆژە لە کوردستاندا راگیرێت و 500 کەس و سێ ھەزار کۆمپانیا زەرەرمەند دەبێت".

ناجی شێخ عیزەدین ئەوەشى خستەڕوو: لەگەڵ تەواوی ئەندامانی لقی سلێمانی یەکێتی بەڵێندەران کۆدەبینەوە و بڕیار لەسەر ئه‌وە دەدەین که‌ داھاتوو چی بکەین و چۆن ھەڵوێستی ترمان ھەبێت، چونكه‌ لە سنووری پارێزگای سلێمانی نزیکەى 200 پڕۆژە بەھۆی خەرجنەکردنی پارەوه‌ کارەکانیان رادەوەستێت ئه‌گەر حکومەت بەردەوامبێت لە راگرتنی پێدانی تەمویل".

پ: ل. م
بڵاوکردنەوە: شیروان شەریف



created by Avesta Group and powered by Microsoft Azure