لە ساڵێکدا زیاتر لە 73 هەزار حاڵەتى جیابوونەوە لەعێراقدا تۆمارکراوە

هەواڵ / عێراق :: 28/09/2019‌ :: 180‌ جار بینراوە

دواڕۆژ

زیادبوونى ژمارەى حاڵەتەکانى جیابوونەوە لە عێراق لەلایەن شارەزایانەوە بە "مەترسیدار" ناودەبرێت، بەجۆرێک تەنها لە ساڵى رابردوودا زیاتر لە 73 هەزار تۆمارکراوە.


بەپێى ئامارێک ژمارەى حاڵەتەکانى راستاندنى جیابوونەوەى دەرەکى تۆمارکراو لە دادگاکانى عێراقدا لە ماوەى چوار مانگى رابردووى ئەمساڵدا بەمجۆرەیە: مانگى ئاب 3650 حاڵەت، مانگى تەمموز 4696، مانگى حوزەیران 3303 و مانگى ئایار 3810 حاڵەت.

هەروەها حاڵەتەکانى جیابوونەوە لەڕێى دادگاوە لە سەرتاسەرى عێراق لەو چوار مانگەدا بەمجۆرەیە: مانگى ئاب 1296 حاڵەت، تەمموز 1932، حوزەیران 1245 و ئایار 1367 حاڵەت.

ئامارەکە لەلایەن سایتى (ئیرفەع سەوتەک- ارفع صوتك) بڵاوکراوەتەوە.

سایتەکە لەسەر زارى عەلى بەیاتى، ئەندامى کۆمسیۆنى باڵاى مافەکانى مرۆڤەوە بڵاویکردوەتەوە: ژمارەى حاڵەتەکانى جیابوونەوە لە ساڵى رابردووشدا گەیشتووەتە (73569) حەفتا و سێ هەزار و پێنج سەد و شەست و نۆ حاڵەت، کە بەغدا زۆرترین ژمارەى تیا تۆمارکردووە بە (30028) حاڵەت.

بەیاتى دەڵێت: دیارترین هۆکارەکانى جیابوونەوە بریتیە لە هۆکارى ئابورى و کەمى هۆشیارى و لاوازى ئاستى رۆشنبیرى لەبارەى ژیانى هاوسەرییەوەیە.

وتیشى: "لەهەمان کاتدا خراپ بەکارهێنانى تۆڕە کۆمەڵایەتیەکان دەبێتە هۆى کێشە و دەستێوەردانى نەرێنى لەلایەن کەسوکار و هاوڕێیانەوە".

لاى خۆیەوە فەوزیە عەتیە، توێژەرى کۆمەڵایەتى و مامۆستا لە زانکۆى بەغدا چەندین هۆکار وەک سەرچاوەى زیادبوونى "مەترسیدارى" حاڵەتەکانى جیابوونەوەى هاوسەران پشتبەست بە توێژینەوە زانستیەکان ناودەبات لەوانە: خراپى رەوشى کۆمەڵایەتى کۆمەڵگاى عێراقى و خراپى دۆخى ئابورى و هاوسەرگیرى پێشوەختى کچان و کوڕان و فرە هاوسەرگیرى و گەڕان بەدواى ژینگەیەکى باشتر و تۆڕە کۆمەڵایەتیەکان.

پێشنیاریش دەکات: دەوڵەت بەرنامەى هۆشیارى و رۆشنبیرى دابنێت بۆ پێشکەشکردنى زانیارى و ئامۆژگارى بە هاوسەران و پشتیوانیکردنیان، لەگەڵ زیادکردنى ژمارەى توێژەران لە دادگا و دامەزراوەکانى وەزارەتى داد-دا. 

ئا: شیروان شەریف



created by Avesta Group and powered by Microsoft Azure