ژن و مێردێک لەسەر تاوانی دزی دەستگیرکران

هەواڵ / کوردستان :: 26/09/2019‌ :: 387‌ جار بینراوە

دواڕۆژ، محەمەد مستەفا

پۆلیسی راپەڕین رایدەگەیەنێت: ژن مێردێکیان لە رانیە بە تۆمەتی دزیکردن دەستگیرکردووە، کە دزیان لە ماڵە دراوسێکانی خۆیان کردووە.


شۆڕش ئیسماعیل، وتەبێژی پۆلیسی راپەڕین (ئەمڕۆ پێنجشەممە 26ى ئەیلولى 2019) بە دواڕۆژی راگەیاند: لەسەر سکاڵای هاووڵاتیانی قەزای رانیە هێزەکانی پۆلیس بە تۆمەتی دزیکردن ژن و مێردێکیان دەستگیرکردووە کە ئامانجیان بووە لە رێگەی خۆ لەیەک نزیکردنەوە لەگەڵ ماڵە دراوسێکانیان تاوانی دزییان بەرامبەریان ئەنجام بدەن.

وتیشی: "دوای لێکۆڵینەوە لەگەڵیان ئەو ژن و مێردە دانیانناوە بەوەی کە 350 هەزار دیناریان لە یەکێک لە ماڵە دراوسێکانیان دزیووە و چەند ساڵێک لەمەوبەریش بڕێکی زۆری زێڕ و پارەیان لە ماڵێکی تری دراوسێیان دزیووە".

باشی لەوەشکرد: ئەو ژن و مێردە هەوڵیانداوە تێکەڵاوی لەگەڵ ماڵە دراوسێکانیان دروستبکەن بۆ ئەوەی شارەزایی ناو ماڵەکانیان ببن و لەهەر کاتێک بیانەوێت دزیان لێبکەن.

شۆڕش ئیسماعیل روونیشکردەوە: هەردوو تۆمەتبار دانیشتووی قەزای رانیەن و لەئێستادا بەپێى مادەی 444 لە یاسای سزادانی عێراقی راگیراون و لێکۆڵینەوەش لەگەڵیاندا بەردەوامە.

پێداچوونەوە: شیروان شەریف



  • ڕۆژ
  • هەفتە
  • مانگ
created by Avesta Group and powered by Microsoft Azure

بەپەلە