جارێکی تر فەرمانی دەستگیرکردن بۆ رێبوار تاڵەبانی دەرچوو

هەواڵ / کوردستان :: 26/09/2019‌ :: 6258‌ جار بینراوە

دواڕۆژ، عیماد جەباری

جارێکی تر دادگای کەرکوک فەرمانی دەستگیرکردنی بۆ رێبوار تاڵەبانی سەرۆکی ئەنجومەنی پارێزگای کەرکوک ده‌ركرد، ناوبراویش دەڵێت: "دادوەرەکە بەبێ ئاگادارکردنەوەم لە دۆسیه‌کە راستەوخۆ فەرمانەکەی دەرکردووە".


بەپێی چەند نووسراوێک کە لەلایەن سەرۆکی کوتلەی بەرەی تورکمانی لەئەنجومەنی پارێزگای كه‌ركوك بڵاوکراوەتەوە، لە 28ی ئاب لە لایەن سەباح مەجید دادوەری دەستەی دەستپاکی کەرکوکەوە بەمادەی 331 فەرمانی دەستگیرکردن بۆ رێبوار تاڵەبانی سەرۆکی ئەنجومەنی پارێزگای کەرکوک ده‌ركراوه‌.

بەپێی یەکێک لەو نووسراوانە لە 16ی ئەم مانگە نووسینگەی لێکۆڵینەوەی دەستەی دەستپاکی نووسراوێکی ئاڕاستەی ئەنجومەنی پارێزگا کردووەو ئاگاداری کردووەتەوە لەفەرمانی دەستگیرکردنەکە.

لەوبارەیەوە رێبوار تاڵەبانی سەرۆکی ئەنجومەنی پارێزگای کەرکوک بەدواڕۆژی راگەیاند: بەبێ ئەوەی ئاگادار بکرێمەوە لە سکاڵاکە، لەلایەن ئەو دادوەرەوە راستەوخۆ فەرمانی دەستگیرکردنی بۆ دەرکردووم کە رقی لێهەڵگرتووم و کەوتووەتە ژێر فشاری چەند لایەنێکەوە.

وتیشی: "بە کەمتەرخەم و ئامادەنەبوونم لەسەر کارەکەم تۆمەتبارکراوم، چونکە من ئامادەنیم دان بنێم بەو دۆخە عەسکەرتارییەتەی لەکەرکوک دەگوزەرێت و ناچمەوە سەر کارەکەم، چونکە ژیانم پارێزراو نابێت، دواتریش دۆسیەیه‌کی دیکەم لەبارەی دوو ئۆتۆمبێڵی حکومەت کە لەرووداوەکانی 16ی ئۆکتۆبەر لەناو خانووه‌کەم لەلایەن هێزی سەربازییەوە دزراوەو لەرێگەی پارێزەرەکەمەوە سکاڵام تۆمارکردووەو هەموو بەڵگەیەکم پێشکەش بەدادگا کردووە".

سەرۆکی ئەنجومەنی پارێزگای کەرکوک هۆکاری دووبارە وروژاندنەوەی ئەو بابەتانەی بۆ ئەوە گەڕاندەوە کە پەیوەندیەکانی بەغدا و هەرێم ئاسایی بوونەتەوەو هەردوولایش نزیکبوونەتەوە لە رێککەوتن بۆ دوبارە ئاساییکردنەوەی دۆخی کەرکوک و دانانی پارێزگارێک کە چەند لایەنێک لەرێگەی بەئامانجکردنی سەرۆکی ئەنجومەنەکەوە هەوڵی پەکخستنی هەوڵەکان دەدەن.

عەلی مەهدی سەرۆکی کوتلەی بەرەی تورکمانی لەکاتی بڵاوکردنەوەی نووسراوەکان لەتۆڕی کۆمەڵایەتی فەیسبووک ئاماژەی بۆ ئەوە کردووە کە رێبوار تاڵەبانی وێڕای فەرمانی دەستگیرکردنەکەی کەچی مانگانە موچەکەشی وەردەگرێت، لەوبارەیەوە رێبوار تاڵەبانی وتی: "عەلی مەهدی و کوتلەکەی شەش ساڵ بایکۆتی ئەنجومەنی پارێزگای کەرکوکیان کرد بەبیانووی ئەوەی بایکۆتی پرۆسەی سیاسیان کردووە، هەموو مانگێکیش موچەکانیان وەردەگرت، هەروەها لەکاتی خۆیدا عەلی مەهدی لەسەر ئامادەنەبوونی لەدانیشتنەکاندا بەفەرمی ئاگادارم کردەوە کە چیتر غایب نەبێت، ئێستاش خۆی دەوام ناکات".

پێداچوونەوەو بڵاوکردنەوە: ئیحسانی مەلا فوئاد



created by Avesta Group and powered by Microsoft Azure