سێیەم گەورەترین بیری غازی سروشتی لەسەر ئاستی جیهان لە حەمرینە

هەواڵ / ئابوری :: 19/09/2019‌ :: 359‌ جار بینراوە

دواڕۆژ، بەغدا

بەرپرسێكی كوردی پارێزگای دیالە ئاشكرای دەكات: ناوچەی حەمرینی پارێزگای دیالە كێڵگەیەكی گەورەی غازی سروشتی تیادایە كە سێیەمین گەورەترین و دەوڵەمەندترین كێڵگەی غازی سروشتی جیھانە، باس لەوەش دەكات: سوودێكی كەمی بۆ ناوچەكە و پارێزگاكە ھەیە.

زاھد تاھیر، ئەندامی ئەنجومەنی پارێزگای دیالە (ئەمڕۆ پێنجشەممە 19ی ئەیلولی 2019) بە دواڕۆژی راگەیاند  "گەورەترین و پاكترین و دەوڵەندترین كێڵگەی غازی سروشتی لە ناوچەی حەمرینی سەر بە پارێزگای دیالەدایە كە سێیەمین گەورەترین كێڵگەی جیھانە بۆ یەدەگی غازی سروشتی".

وتیشی: "تائێستا ئەوەندەی كاری تیادا كرابێت، بەرھەمھێنانی وزەی كارەبا بووە كە ئێستا نزیكەی 750 مێگاوات كارەبای لێ بەرھەم دەھێنرێت، بەڵام ئەو بەرھەمە ھەمووی بۆ پارێزگای دیالە نییە، ئەو كارەبایە دەچێتە تۆڕی كارەبای عێراق، تەنیا 300 مێگاوات دەگەڕێتەوە بۆ دیالە".

سەبارەت بە پەرەپێدان و فراوانكردنی ئەو ئەندامەی ئەنجومەنی پارێزگای دیالە ئاماژەی بەوەكرد: وەبەرھێنان لەدەسەڵاتی وەزارەتی نەوت و حكومەتی فیدراڵدایە، لە رێگەی پارێزگار و ئەنجومەنی پارێزگاوە ناكرێت، كاتێكیش حکومەتی فیدراڵی بیەوێت وەبەرھێنانی تیادا بكات، بە ھیچ لایەنێكی پارێزگاکە ناڵێت.

بەپێی زانیارییەكانی دواڕۆژ تائێستا چوار بیر بۆ دەرھێنانی ئەو غازە سروشتییە لێدراوە كە تەنیا دەرھێنانی غاز و ھەناردەكردنی ماوە.

پ: چ.ع

بڵاوکردنەوە: ئیحسانی مەلا فوئاد



  • ڕۆژ
  • هەفتە
  • مانگ
created by Avesta Group and powered by Microsoft Azure