قاسم سلێمانى بە نهێنى سەردانى بەغداى کردووە

هەواڵ / عێراق :: 18/09/2019‌ :: 343‌ جار بینراوە
قاسم سلێمانى و ئەبو مەهدى موهەندیس فۆتۆ: ئەرشیف

دواڕۆژ

قاسم سلێمانى، فەرماندەى سوپاى قودس لەم هەفتەیەدا بەنهێنى سەردانى بەغداى کردووە و چاوى بە بەرپرسى گروپە چەکدارە عێراقییە لایەنگرەکانى ئێران کەوتووە، وەک ئەوەى هەندێک میدیا بڵاویانکردووەتەوە.


کەناڵى ئەلعەرەبیە هەواڵێکى لەو بارەیەوە بڵاوکردووەتەوە و دەڵێت: "سلێمانى لەگەڵ بەرپرسانى هاوپەیمانى (بینا‌ء) کۆبووەتەوە بە بەشدارى فالح فەیاز، سەرۆکى دەستەى حەشدى شەعبى و هادى عامرى، سەرۆکى رێکخراوى بەدر و ئەبو مەهدى موهەندیس، جێگرى سەرۆکى دەستەى حەشدى شەعبى.

ئاماژەی بەوەشداوە: سلێمانى داواى لە فەرماندەى ئەو هێزانە کردووە بەرژەوەندییەکانى ئەمریکا لە عێراق بکەنە ئامانج.

ناکۆکییەکانى نێوان ئەمریکا و ئێران روویان لە زیادبوون کرد لەوکاتەوەى دۆناڵد ترامپ، سەرۆکى ویلایەتە یەکگرتووەکانى ئەمریکا لە ئایارى 2018دا بەشێوەیەکى تاکلایەنە لە رێککەوتنى ئەتۆمى کشایەوە و سزا ئابورییەکانى بۆ سەر تاران دەستپێکردەوە.

سەردانەکەى فەرماندەکەى سوپاى قودس دواى ئەو هێرشانە دێت کە شەممەى رابوردوو کرایەسەر دامەزراوە نەوتیەکانى سعودیە و دواتر وا بڵاوکرایەوە کە هێرشەکان لەلایەن هێز و لایەنەکانى لایەنگرى ئێران لە عێراق یان یەمەنەوە ئەنجامدراون.

ئا: شیروان شەریف

بڵاوکردنەوە: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure