لەسەر دیاردەی سواڵكردن لایەنە پەیوەندیدارەكانی سلێمانی روونكردنەوە دەدەن

هەواڵ / ڕاپۆرت :: پێش 4 هەفتە ‌ :: 8007‌ جار بینراوە

دواڕۆژ، پشتیوان جەمال

ئەندامێكی ئەنجومەنی پارێزگای سلێمانی رایدەگەیەنێت لە دووڕیانەکەی سەرچناری شاری سلێمانی هەندێك ئافرەتی سواڵكەر كاری لەشفرۆشی دەكەن و داوایان كردووە ئەو حاڵەتە چارەسەر بكرێت، بەڵام پۆلیسی سلێمانی ئەو قسانە رەتدەكاتەوە و دەڵێت: "لەو رووەوە بەڵگە نییە و ئەو كەسانە تەنیا سواڵ دەكەن".  

ساڵانێكی زۆرە رۆژانە و شەوانە لەفولكەی دووڕیانەكەی سەرچنار لەشاری سلێمانی ژمارەیەك ئافرەت دەبینرێن كە سواڵ دەكەن، بەڵام بەپێی یاداشتێكی ژمارەیەك ئەندامی ئەنجومەنی پارێزگای سلێمانی كە رۆژی 8ی ئەیلولی 2019 ئاڕاستەی سەرۆكایەتی ئەنجومەنیان كردووە، دەڵێن: 'ئەو ئافرەتانە بەناوی سواڵكردنەوە، كاری نەشیاو دەكەن و داوای چارەسەركردنی ئەو حاڵەتەش دەكەین".
 
لەنووسراوەكەدا هاتووە: "سەبارەت بەبوونی چەند گروپێكی ژنان و كچان لەئەندەرپاس و ترافیك و فولكەكانی ناوەندی پارێزگای سلێمانی كە بەهۆی دیاردەی سواڵكردنەوە كاری نەشیاو دوور لەئاداب و رەوشتی كۆمەڵگە ئەنجام دەدەن، داواكارین نووسراو ئاڕاستەی بەڕێوەبەرایەتی پۆلیسی سلێمانی بكرێت بۆ چارەسەركردنی ئەو دیاردەیە".

بەرزان شێخ محەمەد، جێگری سەرۆكی ئەنجومەنی پارێزگای سلێمانی بەدواڕۆژی راگەیاند: دیاردەی لەشفرۆشی لەگەڵ كێشەكانی كۆمەڵگە دەردەكەوێت، خەڵك هەیە لەو رووەوە سكاڵای كردووە و ئەوانیش چەند ئەندام ئەنجومەنێكیان راسپاردووە بۆ بەدواداچوون، چونكە لەحاڵەتەوە بووەتە دیاردە، بۆیە داوای چارەسەری دروستی ئەو حاڵەتانە دەكەن.

سەركەوت ئەحمەد، بەڕێوەبەری راگەیاندن و پەیوەندییەكانی پۆلیسی سلێمانی رەتیكردەوە ئەو ئافرەتانە لەشفرۆشی بكەن و بەدواڕۆژی راگەیاند: ئەو ئافرەتانە ماكیاژ دەكەن و خەڵك دەخەڵەتێنن، رەنگە خەڵك هەبێت دەستبازییان لەگەڵدا بكات و سواری ئوتومبیلەكەیان بكات، بەڵام لەنێو ئۆتۆمبێلدا پارەیان لێدەدزن یان ئەگەر پارەی زیاتریان پێنەدەن ژنەكان هاوار دەكەن و دەڵێن پەلاماریان داون، كاری لەشفرۆشی هەروا ئاسان نییە و دادوەر داوای بەڵگەی روون دەكات.

سەبارەت بەوەی حاڵەتەكە بوونی نییە یان بەشاراوەییە، نەقیب سەركەوت روونیكردەوە: "تائێستا كەسمان بەلەشفرۆشییەوە دەستگیر نەكردووە و لەهەموو حاڵەتەكاندا نیەتی ئەو ئافرەتانە دەستبڕینە، زۆربەیان سواڵ دەكەن و دەستگیریش كراون".

رێبوار ئەحمەد، ئەندامی ئەنجومەنی پارێزگای سلێمانی كە واژۆی لەسەر نووسراوەكەی ئەنجومەنی پارێزگا كردووە بەدواڕۆژی راگەیاند: ئەو بابەتە پێشتریش هەبووە و لەهەموو دنیادا هەیە، ئەگەر دەوترێت بەڵگە نییە، هەر كەسێك جلی مەدەنی لەبەردا بێت و ئۆتۆمبێلی مەدەنی پێ بێت بەشێوازێك لەشێوازەكان پارەیان پێبدات ئەوان لەگەڵیدا دەڕۆن بۆ ئەو شوێنانەی كە خۆیان هەیانە یان ئەو شوێنانەی لەگەڵ كەسەكە لەنێو ئۆتۆمبێل لەسەری رێكدەكەون.

دەربارەی ئەوەی ئایا چی بەڵگەیەك هەیە ئەو ئافرەتانە لەگەڵ پیاوان یان گەنجان لەنێو ئۆتۆمبێل بۆ لەشفرۆشی بڕۆن یان بۆ خەڵەتاندنە، رێبوار وتی: "بەڵێ ئەوە روونە بۆ لەشفرۆشییە، شۆفێری تەكسی هەبووە كاتێك ئەو كەسانەی گواستووەتەوە بەدەستیانەوە گیری خواردووە ئەو ئافرەتانە لەئۆتۆمبێلەكەدا دانەبەزیون پێیانوتووە لەبەرامبەر پارەكەدا چی دەوێت لەگەڵیدا دەیكەن".

ناوبراو ئاماژەی بەوەكرد: ئەوان دەمێكە بەدواداچوونیان كردووە و ئێستا بەپێویستی دەزانن ئەم كابینەیە چارەسەری ئەو كێشانە بكات ئەویش بەدەستگیركردنیان و ئەنجامدانی پشكنین بۆیان.

پ: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure