د. شێرزاد حه‌مید: پترى 2700 خودان پێدڤیێن تایبه‌ت ژ پشكنینا دووباره‌ ده‌رنه‌چۆینه‌

هەواڵ / چاوپێکەوتن :: پێش 4 هەفتە ‌ :: 269‌ جار بینراوە
د. شێرزاد حه‌مید

دواڕۆژ، بورهان یه‌حیا

رێڤه‌به‌رێ گشتیێ چاڤدێرى و گه‌شه‌پێدانا جڤاكى ل پارێزگه‌ها دهۆك (د. شێرزاد حه‌مید حه‌سه‌ن) د دیداره‌كێ دا دگه‌ل دواڕۆژ راگه‌هاند؛ ب رژدى كار ل سه‌ر چۆنا قوتابخانه‌ی بۆ زارۆیێن بێ سه‌میان دهێته‌كرن كو سه‌رجه‌مێ وان 132 زارۆنه‌ و ل كه‌مپان ژى 6 سه‌نته‌ر بۆ خزمه‌تكرنا ئاواره‌ و په‌نابه‌ران هه‌نه‌ و د دووباره‌ پشكنینا خودان پێدڤیێن تایبه‌ت ل پارێزگه‌هێ پترى 2700 كه‌س ده‌رنه‌چۆینه‌ و  نوكه‌ 17042 مووچه‌ی وه‌ردرگرن و راگه‌هاند ژى خێرخوازێن دهۆك د بیاڤێ هاریكاریكرنا خه‌لكێ هه‌ژار و خودان پێدڤیێن تایبه‌ت دا هاریكارن. 

دواڕۆژ: دووماهى ئامارێن گشتى یێن گرێدایى ب رێڤه‌به‌رییا گشتییا چاڤدێرى و گه‌شه‌پێدانا جڤاكى ل پارێزگه‌ها دهۆك چنه‌؟
د. شێرزاد حه‌مید: ل سنۆرێ پارێزگه‌هێ 17042 كه‌س مووچه‌یێ كێم ئه‌ندامیێ وه‌ردگرن، مامه‌له‌یێ 7800 كه‌سان هه‌ر ژ سالا 2014ێ وه‌ره‌ ل وه‌زاره‌تا دارایى یه‌، د به‌رنامه‌یێ چاڤدێرییا خێزان دا 16494 كه‌سان مووچه‌ وه‌ردگرت لێ ژبه‌ر هاتنا قه‌یرانێ هه‌ر ژ 1/9/2015ێ ئه‌ڤ مووچه‌ هاته‌ راوه‌ستاندن و 7096 كه‌س ژى هه‌ر ژ سالا 2014ێ وه‌ره‌ مامه‌له‌یێن وان ل وه‌زاه‌رتا دارایى ماینه‌.

دواڕۆژ: دووماهى ئامارێن گرێدایى ب وان سه‌نته‌ر و خانیێن ته‌خێن جودا لێ دهێنه‌ خودانكرن و په‌روه‌رده‌ و فێركرن چنه‌؟ 
د. شێرزاد حه‌مید: ل مالا دانعه‌مران 19 كه‌س لێ هه‌نه‌ كو 12 زه‌لام و 7 ژنن، خانه‌یێ بێ سه‌میانان و دناڤا مالێن خه‌لكى دا 132 زارۆ لێ هه‌نه‌ كو 66 كۆڕ و 66 كچ لێ هه‌نه‌، ل په‌یمانگه‌ها رۆناهى تایبه‌ت ب نه‌بینا 30 كه‌س هه‌ر ژ پۆلا 1 هه‌تا 9ێ هه‌نه‌، ل په‌یمانگه‌ها ئاوات یا په‌روه‌ردا مێشكى 48 كه‌س، ل په‌یمانگه‌ها هیوا یا نابیستان 60 كه‌س، ل په‌یمانگه‌ها هانا یا كارێن ده‌ستى 24 كه‌س، و ل سه‌نته‌رێ ئۆتیزم 25 كه‌س كو سه‌رجه‌مێ وان هه‌میا دبیته‌ 187 كه‌س.

دواڕۆژ: زارۆیێن بێ سه‌میان ب چ مه‌رج ل جه‌م هه‌وه‌ بۆ خودانكرنێ دهێنه‌ وه‌رگرتن؟
د. شێرزاد حه‌مید: ئه‌و زارۆیێن ژ ئه‌نجامێ كریاره‌كا نه‌شه‌رعى په‌یدا دبن، یێن ل به‌رده‌رگه‌هێن مزگه‌فت و كۆلانان دهێنه‌ دانان، ئه‌وێن ژبه‌ر ئاریشه‌یێن ناڤبه‌را ده‌یك و بابان بێ خودان ماینه‌، ئه‌و زارۆیێن ده‌یك و بابێن وان مرین یان ده‌یكا وان شوو كرییه‌، یێن سه‌میانێن وان ژبه‌ر تاوانان د زیندانێ ڤه‌نه‌ و هه‌ر هه‌موو ب بڕیارا دادگه‌هێ بۆ خانیێن بێ سه‌میانان ژ كچ و كۆڕان دهێنه‌ هنارتن و ل وێرێ دهێنه‌ خودانكرن.

دواڕۆژ: ل خانه‌یا كچ و كۆرێن بێ سه‌میان ب چ ره‌نگ پاشه‌رۆژه‌كا گه‌ش بۆ وان دهێته‌ دابینكرن؟
د. شێرزاد حه‌مید: ب رژدى كار ل سه‌ر پاشه‌رۆژا ڤان زارۆیان دهێته‌كرن و ڤه‌كۆله‌رێن جڤاكى و ده‌روونى ژى پشته‌ڤانیێ دكه‌ن و مه‌هانه‌ راپۆرتان ل سه‌ر ره‌وشا وان پێشكێش دكه‌ن و ژبلى زارۆیێن خانه‌یێن بێ سه‌میانان، گه‌له‌ك زارۆیێن دى ل ناڤ مالێن خه‌لكى دهێنه‌ خودانكرن ئه‌وێن ب رێیا دادگه‌هێ بۆ هنده‌ك خێزانان هاتینه‌ پێشكێشكرن لێ ب به‌رده‌وامى دووڤچۆنا ره‌وشا ژیان و خواندنا وان دهێته‌كرن و گه‌نگه‌شه‌یه‌كا تێروته‌سه‌ل ل سه‌ر قوتابخانه‌یێن وان بۆ وه‌رزێ نوو یێ خوادنێ هاتییه‌كرن بۆ هندێ رێكخستنه‌كا باش بۆ بهێته‌كرن".

دواڕۆژ: گرنگییا هه‌بوونا ڤه‌كۆله‌رێن جڤاكى یان ده‌روونى ل قوتابخانه‌یان ب مه‌ره‌ما پشته‌ڤانیكرنا قوتابییان چه‌نده‌؟
د. شێرزاد حه‌مید: هه‌ماهه‌نگییه‌كا باش ناڤبه‌را مه‌ و رێڤه‌به‌رییا گشتییا په‌روه‌ردا پارێزگه‌ها دهۆك هه‌یه‌ و ئێك ژ به‌رهه‌مان ژى هه‌بوونا ڤه‌كۆله‌رانه‌ ل قوتابخانه‌یان و ئه‌گه‌ر ل قوتابخانه‌یه‌كێ ڤه‌كۆله‌ر نه‌هاتبیته‌ دانان خولێن تایبه‌ت هاتینه‌ ڤه‌كرن و مامۆستایێن په‌روه‌ردا تایبه‌ت بۆ هاتینه‌ دابینكرن و ل زانكۆیا دهۆك ژى به‌شێ په‌روه‌ردا تایبه‌ت ڤه‌كرییه‌ و سالانه‌ قوتابى لێ ده‌ردچن و دشێن ل قوتابخانه‌یێن ب ڤى ئه‌ركى رابن و پلان ئه‌وه‌ ب به‌رده‌وامى مفا ژ شیانێن وان بهێته‌ وه‌رگرتن.

دواڕۆژ: چه‌ند گرنگه‌ فێركرن به‌رى په‌روه‌رده‌ یان ل ئاستێ وێ بیت نه‌ك بهێته‌ پشتگوهـ ئێخستن؟
د. شێرزاد حه‌مید: ئێك ژ ئه‌ركێن سه‌ره‌كى یێن رێڤه‌به‌ریێن گه‌شه‌پێدانا جڤاكى فێركرنه‌ و په‌روه‌رده‌ ئه‌ركێ وه‌زاره‌تا په‌روه‌ردێ یه‌ و به‌رنامه‌كێ تایبه‌ت دگه‌ل رێڤه‌به‌رییا په‌روه‌ردا دهۆك هاتییه‌ دارشتن كو فێركرن ژلایێ مه‌ و په‌روه‌رده‌ ژلایێ وان ڤه‌ بۆ قوتابییان بهێته‌ پێشكێشكرن.

دواڕۆژ: بابه‌تێ مووچه‌یێ خودان پێدڤیێن تایبه‌ت و پشكنینان دووباره‌ بۆ هزاران كه‌سان گه‌هشتییه‌ چ قۆناغ؟
د. شێرزاد حه‌مید: ب هه‌ماهه‌نگى دگه‌ل لژنه‌یا نۆژدارى ل پارێزگه‌ها دهۆك دووباره‌ پشكنینا خودان پێدڤیێن تایبه‌ت هاتییه‌كرن و ل نێزیك دێ ده‌ست ب به‌لاڤكرنا مووچه‌یێ وان هێته‌كرن لێ پترى 2700 كه‌س ژ پشكنینان دووباره‌ ده‌رنه‌چۆن و مووچه‌یێ وان هاتییه‌ بڕین.

دواڕۆژ: رۆلێ رێڤه‌به‌رییا چاڤدێرى و گه‌شه‌پێدانا جڤاكى ل كه‌مپان بۆ ئاواره‌ و په‌نابه‌ران چییه‌؟
د. شێرزاد حه‌مید: ل كه‌مپێن سنۆرێ پارێزگه‌هێ 6 سه‌نته‌رێن تایبه‌ت هه‌نه‌ كو ب هه‌ڤكارى دگه‌ل رێكخراوێن بیانى دهێنه‌ برێڤه‌برن و ل بارا پترا كه‌مپان نوونه‌رێن رێڤه‌به‌ریێ لێ هه‌نه‌ و پاراستنا زارۆیان، پێگه‌هشتنا سنێله‌یان، شووكرنا زوو، چاڤدێرى خێزان و یێن گرێدایى ب كێشه‌یێن ده‌روونى و هه‌ڤژینى و ژێك جودابوون ژ به‌رنامه‌یێن سه‌ره‌كى یێن وان سه‌نته‌رانه‌ كو كار ل سه‌ر دكه‌ن و لایه‌نێ ره‌فتارى گه‌له‌ك ب هوشیارى كار ل سه‌ر دهێته‌كرن.

دواڕۆژ: كاریگه‌رییا قه‌یران و شه‌ڕێن سالانێن بۆرى ل سه‌ر خێزانا كورد چ بوویه‌؟
د. شێرزاد حه‌مید: ل هه‌موو جیهانێ هه‌ر ده‌ما قه‌یران یان شه‌ڕه‌ك په‌یدا دبیت ئێكه‌م جار دێ كاریگه‌ریێن نه‌رێنى ل سه‌ر خێزانێ كه‌ت و به‌ره‌ به‌ره‌ ئه‌ڤ كاریگه‌رییه‌ دگه‌هنه‌ ئاستێن بلندتر و دووڤدا دگه‌هیته‌ ناڤ بازاڕ و كه‌رتێن تایبه‌ت و گشتى.

دواڕۆژ: رۆلێ خێرخواز و كه‌رتێ تایبه‌ت د هاریكاریكرنا ته‌خێن هه‌ژار و پێدڤى ل پارێزگه‌ها دهۆك چه‌نده‌؟
د. شێرزاد حه‌مید: خێرخوازێن پارێزگه‌ها دهۆك ب به‌رده‌وامى پشته‌ڤانیێ ل رێڤه‌به‌ریێ و خه‌لكێ هه‌ژار و پێدڤى دكه‌ن و ئه‌گه‌ر پشته‌ڤانییا وان نه‌با نه‌دشیان ل ڤى ئاستێ نوكه‌ خزمه‌تا ته‌خێن جودا بكه‌ین بۆ نموونه‌ ل مه‌ها ره‌مه‌زانێ خه‌لكى بۆ دابینكرنا خوارنا فتارێ بۆ مالا دانعه‌مران سرایێن خۆ دنڤیسان.



  • ڕۆژ
  • هەفتە
  • مانگ
created by Avesta Group and powered by Microsoft Azure

بەپەلە