بۆچی لە دووەم دانیشتنی دادگادا سزای بكوژانی تاریقی بەقاڵ درا؟

هەواڵ / کوردستان :: 13/09/2019‌ :: 1184‌ جار بینراوە

تاگ :: داد

دواڕۆژ، پشتیوان جەمال

پاش دوو دانیشتن دادگاى تاوانەکانى سلێمانى سزاى بکوژانى تاریقى بەقاڵى دەرکرد، سەبارەت بەهۆکارى زوو دەرچوونى بڕیارەکەش وتەبێژی دادگا دەڵێت: دۆسیەكە لێكۆڵینەوەی تەواوی تێدا كرابوو و کەموکوڕى تیادانەبوو.


دوێنێ لە دووەم دانیشتنی دادگایى بكوژانی تاریق رۆستەم ناسراو بە (تاریقی بەقاڵ) دادگای تاوانەكانی سلێمانی سزای (لەسێدارەدان تا مردن)ی بۆ سێ تاوانباری دۆسیەكە دەركرد، كە ئەوەش تاڕادەیەك جێی سەرسوڕمان بوو كە لە دووەم دانیشتندا بڕیاری دادگایان بۆ دەرچوو.

دادوەر عومەر ئەحمەد، وتەبێژی سەرۆكایەتی دادگای تێهەڵچوونەوەی ناوچەی سلێمانی (ئەمڕۆ هەینى 13ی ئەیلولی 2019) بە دواڕۆژی راگەیاند: ئەو دۆسیەیە لێكۆڵینەوەی تەواوی تێداكراوە و كەموكوڕی تێدانەبووە، بۆیە دادگا بڕیاری یەكلاییكەرەكەی تێدا دەركردووە.

روونیشیکردەوە: چەندین دۆسیەی دیكەش هەیە بەو شێوەیە بووە، بەڵام بڕیارەكە شایستەی تەمیزكردنەوەیە، دادگا بڕیارەكە رەوانەی دادگای پێداچوونەوەی هەرێمی كوردستانی دەكات بۆ پێداچوونەوە.

دوابەدواى بڕیارەکەى دادگا حاجى مەولود فارس، خاڵى تاریق لە لێدوانێکدا بۆ دواڕۆژ خۆشحاڵى و رەزامەندى کەسوکارى ئەو قوربانییەى لەبارەى بڕیارەکەوە نیشاندا و داواشیکرد بڕیارەکە جێبەجێبکرێت.

لەمیانەى دانیشتنەکەدا یەکێک لە تۆمەتباران رەتیکردبوەوە کە بەشدارى لە تاوانەکەدا کردبێت، بەڵام دوو تۆمەتبارەکەى دیکە دانیان بە تاوانەکەدا نا و ئەوەشیان دووپاتکردوەتەوە کە تۆمەتبارى سێیەمیش لەگەڵیاندا بەشداربووە.

دوو هەفتە لەمەوبەر یەكەم دانیشتنی دادگاییكردنی تۆمەتبارانی كوشتنى تاریق رۆستەم، ناسراو بە تاریقی بەقاڵ، ئه‌نجامدرا، بەڵام بەهۆی دروستبوونی قەرەباڵغی، دانیشتنەكە دواخرا.

رۆژی 7ی نیسانی 2019 ئاسایشی سلێمانی باندێكیان دەستگیركرد كە هەستابوون بە رفاندن و كوشتنی هاووڵاتیان، لەدیارترینیان تاریقی بەقاڵ بوو ئەوەش دەنگدانەوەی زۆری لێكەوتەوە.   

پێداچونەوە: شیروان شەریف



  • ڕۆژ
  • هەفتە
  • مانگ
created by Avesta Group and powered by Microsoft Azure