بەڵگەی ڤیدیۆیی سوتانی سێوان قادر و منداڵەكانی بڵاوکرایەوە

هەواڵ / کوردستانی :: 13/09/2019‌ :: 26354‌ جار بینراوە

دواڕۆژ

پەرلەمانتارێک بەڵگەى ڤیدیۆیى سوتانى سێوان قادر و منداڵەکانى بڵاودەکاتەوە ئەمەش پاش ئەوەى کەمپینێک لەسەر ئەو دۆسیەیە راگەیەنرا.


سۆران عومەر، ئەندامی پەرلەمانی كوردستان لە پەیجی خۆی لە فەیسبوك تۆمارێکى ڤیدیۆیى بڵاوکردەوە و رایگەیاند: بەڵگەی ڤیدیۆی سوتانی سێوان قادر و منداڵەكانی تیادا دەردەكەوێت.

ڤیدیۆکە ساتەکانى پێش رووداوەکە و هاتووچۆ و جموجوڵى سێوان و منداڵەکانى و هاوسەرەکەى، کە لەلایەن ماڵى باوکى سێوانەوە وەک تۆمەتبارى رووداوەکە باسدەکرێت، دەردەکەون.

ئەمەش لەکاتێکدایە دوێنێ سێ چالاكوانی مەدەنی و پەرلەمانتارێکی كوردستان، کەمپەینێكیان بۆ باشتر بەڕێوەچوونی دادگاییكردنی دۆسیەی سێوان قادر پێكهێنا

پەرچەم قەرەداغی، چالاكوان و رێكخەری كەمپەینەكە بەدواڕۆژی راگەیاند: هەوڵ دەدەین ئەو دۆسیەیە بگەیەنینە لایەنە پەیوەندیدارەكان تا سێوانێكی دیكە دووبارەنەبێتەوە.

وتیشی: "بەدواداچوونی زۆرمان كردووە تا بزانین دۆسیەكە بە كوێ گەیشتووە، بەداخەوە نیگەرانی دروستكردووە، لەبەرئەوەی تۆمەتباری دووەم لەكاتی لێكۆڵینەوەدا ئازادكراوە، ئەوەش لەڕووی یاساییەوە نایاساییە، بۆیە دەمانەوێت كار بۆ دۆسیەكە بكەین و بێدەنگ نابین".

ئێوارەی 16ی كانوونی یەكەمی 2018، بەهۆی ئاگرێكی گوماناوییەوە له ‌ماڵێكی گەڕەكی ئاسوودە له ‌چەمچەماڵ، سێ منداڵ بەناوەكانی (دارین – لارین و دەوەن دیار) كە تەمەنیان لەنێوان 5 ساڵ و 3 ساڵ و 6 مانگدا بوو گیانیان لەدەستدا و دایكیشیان بەناوی (سێوان قادر) دوای هەفتەیەك ‌مانەوەی لە نەخۆشخانە بەهۆی زۆریی و سەختی برینەكەیەوە بەرەبەیانی رۆژی 24ی هەمان مانگ گیانی لەدەستدا.

ئا: شیروان شەریف



  • ڕۆژ
  • هەفتە
  • مانگ
created by Avesta Group and powered by Microsoft Azure