بەڕێوەبەری رۆشنبیری سلێمانی بێئاگایه‌ له‌ دانانی پەیكەرەكان

هەواڵ / که‌لتور :: 11/09/2019‌ :: 107‌ جار بینراوە
وێنەی پەکەرێک لە سلێمانی

دواڕۆژ، راپۆرتی پشتیوان جەمال

لەبەشێكی شەقامی سالم و بەردەركی سەرای سلێمانی زۆرترین پەیكەر دانراون، بەڕێوەبەری گشتی رۆشنبیری سلێمانیش بێئاگایی خۆی له‌دانانی هەموو پەیكەرەكان ده‌رده‌بڕێت، پەیكەرسازێكیش دەڵێت: "بێسەروبەرەیی لەدانانی پەیكەرەكان هەیە".


جاران تەنیا لەنێو شەقامێكی تەسكی باخی گشتی بەدوو ریز پەیكەری شاعیرەكان دانرابوون، بەڵام لەماوەی ئەمساڵ و ساڵی رابوردوودا زۆرترین پەیكەر لەزۆرترین شوێنی سلێمانی دەبینرێت كە زۆربەشیان پەیكەری كەسایەتین، لەگەڵ ئەوەشدا ئامارێكی ورد سەبارەت بەژمارەی پەیكەرەكان نییە.

بابەكر دڕەیی، بەڕێوەبەری گشتی رۆشنبیری و هونەر لەسلێمانی بەدواڕۆژی راگەیاند: ئاگاداری دانانی هەموو پەیكەرەكان نین، چونكە لەسلێمانی زۆر لایەنی دیكەش دەستوەردان لەكاری هونەری دەكەن، بەڵام بۆ پەیكەر دەبێت ناوەندێك بڕیاری لێبدات، چونكە كارە هونەرییەكە دەمێنێتەوە، بڕیارە لەپارێزگای سلێمانی لیژنەیەك لەلایەنە پەیوەندیدارەكان بۆ ئەو مەبەستە دروست بكرێت، بەڵام تائێستا ئەو لیژنەیە چالاك نەبووە.

ناوبراو روونیكردەوە: بۆ نموونە لەدروستكردنی پەیكەر دەوڵەمەند هەیە سپۆنسەر دەكات كە ئەوە لەڕووی نیەتی كاركردنەوە باشە، بەڵام لەڕووی هونەرییەوە كارەكە باش نییە و نابێت بەمیزاج بێت.

هاوكات رۆژگار كەمال، سەرۆكی لقی سلێمانی سەندیكای هونەرمەندانی كوردستان بۆ دواڕۆژی روونكردەوە: دانانی پەیكەر دەبێت لەڕووی كاری هونەریی و شوێنەوە بۆ بینەر گونجاو بێت، ئێستا گرفتێك بۆ دانانی پەیكەرەكان دروستبووەو دەبێت پەیوەندی لەنێوان لایەنە پەیوەندیدارەكان هەبێت، چونكە هەندێك جار دانانی ئەو پەیكەرە بەپەیوەندی شەخسی دەكرێت، جگە لەوەش دەبێت كار لەسەر ئەوە بكرێت پەیكەرەكان پەیام بگەیەنن، چونكە هەست دەكرێت هەندێكیان  دووبارەن.

لەتیف سابیر، مامۆستا له‌ پەیمانگەی هونەرەجوانەكانی سلێمانی پێیوایه‌: بۆ دروستكردنی په‌یكه‌ر، پێویسته‌ سەرەتا ئەوان بەپڕۆژەكە رازی بن و پاشان پڕۆژەی دروستكردنی پەیكەرەكە بۆ پەیكەرسازان و پەیمانگەی هونەرەجوانەكان و كۆلێجی هونەر رەوانە بكرێت كە ئه‌گه‌ر هەمووی نموونەی باشیان هێنا، ئەوكاتە دەتوانرێت پەیكەری شایستە دروست بكرێت.

ناوبراو روونیكردەوە: بابەتی پەیكەرەكان جیاوازن، ئەگەر پەیكەرەكە بابەتی بێت دەنگدانەوەی دەبێت، بەڵام پەیكەری شاعیر یان كەسایەتی دەبێت لەبناغەوە رەنگدانەوەی ئەو كەسایەتییە و بوارەكەی بێت، بەڵام ئێستا هەر كەسێك دەڕوات سپۆنسەر پەیدا دەكات و لەهەر شوێنێك بیانەوێت پەیكەرەكە دادەنێن، بەڵام دەبێت لایەنی پەیوەندیدار بەدواداچوونی بۆ بكەن.

ئاڤان جەمال، سەرۆكی لیژنەی رۆشنبیری و هونەر لەئەنجومەنی پارێزگای سلێمانی بەهەمانشێوە بێئاگایی خۆی لەدانانی پەیكەرەكان راگەیاند و بەدواڕۆژی وت: "ئاگاداری هیچ چالاكییەك نین و لەڕێگەی میدیاوە دەیبینن، بۆ پەیكەرەكانیش دەبێت پسپۆران رایان وەربگیرێت، كاری باشی تیادایە، بەڵام زۆرینەی خراپە و هەوڵدەدەن رێكیان بخەنەوە".

چێنەر نزار كه‌ یەكێكە لەپەیكەرسازە گەنجەكان كە لەم دوو ساڵەدا زۆرترین پەیكەری دروستكردووە و بەوتەی خۆی نزیكەی 28 پەیكەری كردووە، ده‌ڵێت: "لەسەر چ پێوەرێك دەڵێن پەیكەر لەسلێمانی زۆرە؟، ئەوەی هەیە بێسەروبەرەییە لەدانانی پەیكەرەكان، ئەگینا بەتەحەداوە دەڵێم تا 10 ساڵی دیكەش كار بكرێت هەموو كۆڵانەكان پڕ نابن لەپەیكەر".

ناوبراو وتی :"ئەوەی هەیە نەبوونی پلانە بۆ دانانی پەیكەرەكان، بۆ نموونە شەقامی سالم و بەردەركی سەرا فەوزایەكی زۆر هەیە، بەڵام هەر لەبەردەركی سەرا پەیكەرەكانی ئەختەری رەشۆڵ و عەولەسیس دانراون كە خۆم دروستم كردوون، هەردووكیان لەو شوێنەدا شەهیدبوون".

سەبارەت بەوەی زۆربەی پەیكەرەكان لەڕووی هونەرییەوە گونجاو نین و زیاتریش پۆرترێتن، ئەو پەیكەرسازە وتی: "بۆ پۆرترێت، هەم لەڕووی تەكنیكی كاركردنەوە ئەوەندە دەتوانم كە رۆژانە دەیبینیم، بەڵام نەبوونی پەیكەرسازی پۆرترێت بەشێوەیەك تاڕادەیەك زۆر كەمە لەسلێمانی، هەبوونی پۆرترێت ستانداری جیهانییە و زۆر كات دەبینرێت لەبەردەم كافێیەك پۆرترێت هەیە".
 
هەرچەندە ئەو پەیكەرانەی پێشتر ئەم پەیكەرسازە دروستی كردوون لەلایەن كەسایەتییە ناسراوەكانی سلێمانی سپۆنسەر كراوە، بەڵام وەك خۆی ئاماژەی بۆ كرد، نزیكەی شەش ساڵە كۆمەڵێك پڕۆژەی تایبەتی لەبواری فیكریی و مێژوویی و دیواربەند، بەڵام كەس سپۆنسەری ناكات، بۆیە هەركەسێك هاوكاری بكات بۆ ئەو پڕۆژانە دەیكات.

پێداچوونه‌وه‌: ئیحسانی مه‌لا فوئاد



  • ڕۆژ
  • هەفتە
  • مانگ
created by Avesta Group and powered by Microsoft Azure