کەمترین کۆنمرەی وەرگرتن لە زانکۆ و پەیمانگەکان راگەیەندرا

هەواڵ / کوردستان :: 10/09/2019‌ :: 22448‌ جار بینراوە

دواڕۆژ، هانا چۆمانی

بەرپرسی ناوەندی وەرگرتنی خوێندکاران رایدەگەیەنێت: "دوای ئەوەی وەزارەتی پەروەردە نمرە و ناوی خوێندکارانی دەرچووی ئەمساڵی خوێندنی ئاڕاستەی وەزارەتی خوێندنی باڵا کرد، رێژەی کۆنمرەی وەرگرتنمان لە زانکۆ و پەیمانگەکان بۆ ئەمساڵی خوێندن دیاریکرد".

 

ئارام قەنبەر، بەرپرسی ناوەندی وەرگرتنی خوێندکاران لە وەزارەتی خوێندنی باڵا و توێژینەوەی زانستی، تایبەت بە دواڕۆژ وتی: "ئەمساڵ وەزارەتی پەروەردە بە نزیکەیی ناو و لیستی نمرەی 52 هەزار خوێندکاری ئاڕاستەی وەزارەتمان کردووە، ئێمەش بەپێی ئاست و رێژەی دەرچوون کەمترین کۆنمرەی وەرگرتنمان لە زانکۆ و پەیمانگە حکومییەکان دیاریکردووە".

 

وتیشی: "بەپێی پلانی وەزارەت بڕیاردراوە کەمترین کۆنمرە بۆ زانکۆ حکومییەکان 65 بێت بۆ بەشی وێژەیی و 60 بۆ بەشی زانستی لە زانکۆکان، هەروەها بۆ خوێندنی بەیانیانی پەیمانگەکانیش کەمترین کۆنمرە 60 لە بەشی وێژەیی کەمتریش بۆ بەشی زانستی بێت، کەمترین کۆنمرەش لە خوێندنی ئێواران بۆ پەیمانگەکان 55 دەبێت".

 

سەبارەت بە پێدانی رێبەری بە خوێندکاران، ئارام قەنبەر وتی: "ئەمساڵ کتێبی رێبەری کۆلێژ و بەشەکان ئاڕاستەی هیچ خوێندنگەیەک ناکەین و لە وێب سایتی رەسمی وەزارەتی خوێندنی باڵا هەیە و خوێندکاران دەتوانن بە PDF لەوێ دایبگرن یان سەیری بکەن".

 

پ: ر. ف

بڵاوکردنەوە: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure