کوردانی ڕۆژهەڵات و ئێرانییەکان رێگەیان پێنادرێت بچنە سنووری دەسەڵاتی حکومەتی عێراق

هەواڵ / ڕاپۆرت :: 11/09/2019‌ :: 187‌ جار بینراوە

دواڕۆژ: ڕاپۆرتی سەنگین خۆشناو

سەرەڕای یەکخستنی سیستمی گومرگ لەنێوان هەرێمی کوردستان و عێراق، بەڵام هێشتا کێشەی نێوانیان کۆتایی نەهاتووە، چونکە هەر گەشتیارێکی کوردی ڕۆژهەڵات یاخود ئێرانی لەڕێگەی هەرێمەوە بێتە عێراق رێگەی پێنادرێت.


مەریەم زێڕین کە خەڵکی پیرانشارە لەگەڵ چوار لە منداڵەکانی لەڕێگەی گومرگی حاجی ئۆمەرانەوە هاتوونەتە هەرێمی کوردستان ویستیان سەردانی کەرکووک بکەن بۆ دواڕۆژ دەڵێت: "لە بازگەی شێراوەی نێوان هەولێر و کەرکووک ڕێگریان لێکردین نەمانتوانی بچینە کەرکووک، کاتێک پرسیارم کرد هۆکار چییە یەکێک لە سەربازەکان پێی وتم کە دەبێت ڤیزەی عێراقم هەبێت و ڤیزە و مۆری هەرێم قبوڵکراو نییە".

مەریەم زێڕین، دەشڵێت: " ئێمە بەشێوەیەکی فەرمی لەڕێگەی سنوری حاجی ئۆمەران هاتووین وامانزانی کێشەی نێوان هەرێم و بەغدا نەماوە، بۆیە ویستمان بچینە کەرکووک هەندێک خزممان لەوێ بوون سەردانیان بکەین، بەڵام ڕێگەیان نەدا".

سۆما مستەفا، هاوڵاتییەکی دیکەی خەڵکی ڕۆژهەڵاتی کوردستانە بۆ دواڕۆژ دەڵێت: "لە بۆکانەوە هاتووین تا بچین ئەو ئاگرەی بابەگوڕگوڕ ببینین، بەڵام کاتێک گەیشتینە بازگەی هەولێر - پردێ ڕێگریان لێکردین و بگرە خەریک بوو پاسپۆرتەکانیشمان ببەن".

سۆما، دەشڵێت: "یەکێک لە پۆلیسەکان پرسیاری ئەوەی کرد کە تەنیا ڕێگە بەو کەسانە دەدرێت شیعە مەزهەبن و بۆ مەراسیمی محەرەم هاتوون".

لیوا عەبدولخالق تەڵعەت، بەڕێوەبەری پۆلیسی هەولێر کە لەکاتی کردنەوەی ڕێگەی نێوان هەولێر و کەرکوک دوای ڕووداوەکانی 16ی ئۆکتۆبەر و چارەسەر بوونی کێشەکانی ڕایگەیاندبوو، ئەو کێشانەیان نەماوە بۆ دواڕۆژ دەڵێت: "ئێمە دەسەڵاتمان نییە حکومەتی عێراق خۆی دەزانێت کە رێگە دەدات یان نا".

لیوا عەبدولخالق، دەشڵێت: "ڕێککەوتنی نێوانمان تەنیا بۆ کردنەوەی ڕێگاکەبووە، بۆیە ناتوانین دەست لەکاروباری حکومەتی عێراق وەربدەین و دەسەڵاتی خۆیانە".

شێخ یادگار، بەڕێوەبەری نشینگەی هەرێم، بۆ دواڕۆژ دەڵێت: "هێشتا کێشەکانی نێوان هەرێم و بەغدا ماون یەکێک لەوانە تائێستا ڕێگە بە هیچ بییانییەک نادرێت کە لە هەرێمەوە هاتبێتنە کوردستان بچنە پارێزگاکانی خوار و ناوەڕاستی عێراق تەنانەت کەرکوکیش".

شێخ یادگار، راشیگەیاند: هەردوو وەزیری ناوخۆی عێراق و هەرێمی کوردستان گفتوگۆیان کردووە بۆ ئەم بابەتە گەیشتوونەتە ڕێککەوتنیش، بەڵام هێشتا بڕیاری بۆ دەرنەکراوە.

دواڕۆژ پەیوەندی بە عەلائەدین قەیسی، وتەبێژی دەستەی خاڵە سنورییەکانی عێراق کرد ئەو بەرپرسە بۆ دواڕۆژ پشتڕاستی کردەوە کە ڕێگە بە هیچ کەسێکی بیانی نادەن بێتە ناوچەکانی ژێر دەسەڵاتیان تاوەکو ڤیزەی عێراقی نەبێت.

هەرچەندە هۆکارەکەی ئاشکرا نەکرد، بەڵام ئاماژەی بەوەدا: کە هەموو بازگەکانیان ئاگادار کراونەتەوە کە ڕێگە بە کەس نەدەن و هەر بازگە و پارێزگایەک بەرپرسە لەو بابەتە.

 

پ: ک. س



created by Avesta Group and powered by Microsoft Azure