ئیبراهیم شێخۆ: ئێزدیێن ژ عه‌فرین په‌نابه‌ری دهۆك بووین دچن ئه‌ورۆپا

هەواڵ / چاوپێکەوتن :: پێش 1 هەفتە ‌ :: 91‌ جار بینراوە
ئیبراهیم شێخۆ

دواڕۆژ، دهۆك 


به‌رده‌ڤكێ رێكخراوا مافێن مرۆڤان ل هه‌رێما عه‌فرین، د چاڤدیتنه‌كا دواڕۆژدا راگه‌هاند: دیمۆگرافییا عه‌فرین دهێته‌ گۆهه‌ڕتن، نوكه‌، بتنێ 35% ژ روونشتڤانێن عه‌فرین كوردن، ئێزدیێن ژ عه‌فرین په‌نابه‌ری دهۆك بووین دچن ئه‌ورۆپا.


دواڕۆژ: ژمارا ئاواره و په‌نابه‌رێن عه‌فرین نوكه‌ چه‌نده‌؟

ئیبراهیم شێخۆ: ژ ده‌ستپێكا هێرشێن له‌شكه‌رێن تركیا و گرۆپێن چه‌كدار یێن گرێدایی تركیا بۆ سه‌ر عه‌فرین، ژماره‌یا ئاواره‌یان و په‌نابه‌رێن عه‌فرین تا نوكه‌، گه‌هشتییه‌ نێزیكی 350 هزار كه‌سان،  پترییا وان ل كه‌مپێن هه‌رێما شه‌هبا دژین كو ژمارا وان 150 هزار كه‌سن.

دواڕۆژ: ژبلی هه‌رێما شه‌هبا، ئاواره‌یێن عه‌فرین به‌ره‌ڤ كیڤه‌ چۆینه‌؟
ئیبراهیم شێخۆ
: گه‌له‌ك ئاواره‌یێن عه‌فرین چۆینه‌ باژارێ كۆبانێ، حه‌سه‌كه‌ و تاخێن (ئه‌شره‌فییه‌ و شێخ مه‌قصود) ل باژارێ حه‌له‌ب، ژماره‌كا دی یا وه‌لاتیێن عه‌فرین، به‌رێ خوه‌دان باشورێ كوردستانێ، بتایبه‌ت باژارێ دهۆك كو ئێزدیبوون.

دواڕۆژ: بۆچی ئێزدیێن عه‌فرین ژ دهۆك ناڤه‌گه‌ڕن رۆژئاڤایێ كوردستانێ یان بچن عه‌فرین؟
ئیبراهیم شێخۆ
: ژماره‌كا كێم ژ ئێزدییان ل عه‌فرین ماینه‌، چنكو گرۆپێن چه‌كدار دوو جاران زۆرداریێ ل وان دكه‌ن؛ چنكو ئه‌و كوردن و ئاینێ وان جۆدایه‌، له‌ورا گه‌له‌ك ئێزدی بووینه‌ په‌نابه‌ر و ئاواره‌، ژماره‌كا ئێزدییان په‌نابه‌ری دهۆك بوون، ڤێ دووماهیێ، ژ دهۆك به‌رێ خوه‌داینه‌ وه‌لاتێن ئه‌ورۆپا و ژبه‌ر ره‌وشا خراب یا عه‌فرین، ئێزدی نه‌شێن ڤه‌گه‌ڕن وی باژاری.

دواڕۆژ: ژمارا كوردان نوكه‌ ل عه‌فرین چه‌نده‌؟
ئیبراهیم شێخۆ
: ژمارا كوردان ل عه‌فرین ناگه‌هیته‌ 100 هزار كه‌سان، نوكه، ژ روونشتڤانێن عه‌فرین بتنێ 35% كوردن، خه‌لكێ بیانی، خێزانێن چه‌كدارێن گرۆپێن چه‌كدار یێن ل عه‌فرین و نێزیكی 100 هزار ئاواره‌یێن ئدلب ل عه‌فرین دژین، واته‌ دیمۆگرافییا عه‌فرین ب ره‌نگه‌كێ بله‌ز دهێته‌ گۆهه‌ڕتن.

دواڕۆژ: ئه‌رێ ل عه‌فرین زمانێ كوردی ل قوتابخانان دهێته‌ خواندن؟
ئیبراهیم شێخۆ
: نه‌خێر، زمانێ كوردی ل قوتابخانێن عه‌فرین ژ ئالیێ تركیا هاتییه‌ قه‌ده‌غه‌كرن، بتنێ زمانێن ئه‌ره‌بی و تركی ل قوتابخانان دهێنه‌ خواندن، لسه‌ر هه‌موو قوتابخانه‌یان و ‌ده‌زگه‌هێن عه‌فرین ئالایێ تركیا هاتییه‌ بلندكرن.

دواڕۆژ: لدووڤ زانیاریێن مه‌، وه‌لاتیێن عه‌فرین ده‌مێ نه‌خوه‌ش دبن نه‌وێرن بچن نه‌خوه‌شخانه‌یێن تركیا. بۆچی؟
ئیبراهیم شێخۆ:
راسته‌، چنكو گه‌له‌ك وه‌لاتیێن عه‌فرین ژ به‌ر نه‌خوه‌شیێن بچووك، قه‌ستا نه‌خوه‌شخانه‌یێن تركیا كربوون‌، لێ جه‌نازه‌یێن وان هاتن‌ عه‌فرین، كوردان چۆ باوه‌ری ب نه‌خوه‌شخانه‌یێن تركیا نه‌مایه‌، دهه‌مان ده‌مدا ره‌وشا كه‌رتێ ساخله‌میێ ل عه‌فرین گه‌له‌ك وێرانه‌.

دواڕۆژ: گه‌هشتنا هاریكاریێن رێكخراوان و ده‌زگه‌هێن خێرخوازی بۆ ئاواره‌یێن عه‌فرین ل شه‌هبا ل چۆ ئاسته‌؟
ئیبراهیم شێخۆ
: هاریكاریێن رێكخراوێن جیهانی و وه‌لاتان و ده‌زگه‌هێن بیانی بۆ ئاواره‌ییان گه‌له‌ك خرابن، دهه‌مان ده‌مدا، وه‌لاتێن زلهێز، چاڤێن خوه‌ ل به‌رامبه‌ر روودانێن عه‌فرین و زۆردارییا تركان و گرۆپێن تیرۆرستی ل وی باژاری گرتینه‌، ئه‌و دزانن چۆ زۆلمه‌ك ل گه‌لێ عه‌فرین دهێته‌ كرن، لێ خوه‌ بێده‌نگ كرینه‌.

دواڕۆژ: ئه‌رێ هاریكاریێن حكومه‌تا هه‌رێما كوردستانێ بۆ ئاواره‌یێن عه‌فرین هه‌نه‌؟
ئیبراهیم شێخۆ
: نه‌خێر، حكومه‌تا هه‌رێما كوردستانێ،  چۆ هاریكاری پێشكێشی ئاواره‌یێن عه‌فرین یێن ل هه‌رێما ‌شه‌هبا نه‌كرینه‌، د هه‌مان ده‌مدا حكومه‌تا هه‌رێما كوردستانێ، دشێت دگه‌ل واراندا وه‌ك كه‌رتێ ساخله‌میێ هاریكارییان بگه‌هینیت ئاواره‌یێن عه‌فرین.

پ: ک. س

بڵاوکردنەوە: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure