دهۆك؛ 7 پالاوگه‌هـ ب 112 ملیۆن دیناران هاتنه‌ سزادان

هەواڵ / ڕاپۆرت :: پێش 1 هەفتە ‌ :: 238‌ جار بینراوە

تاگ :: دهۆك

دواڕۆژ، بورهان یه‌حیا
 
ل سنۆرێ پارێزگه‌ها دهۆك 52 پالاوگه‌هـ هه‌نه‌ كو هه‌ر هه‌موو دوور ژ رێنومایێن ژینگه‌هێ كار دكه‌ن و ڤێ دووماهیێ ب بڕیارا ئه‌نجوومه‌نێ وه‌زیران 37 ژوان هاتبوونه‌ دائێخستن و تنێ 15 هێلان  و 7 ژوان به‌رده‌وامن سه‌ر كاركرنێ لێ ب شه‌ڤ و نهێنى مه‌شعه‌لێن سۆتنێ ناده‌نێ كارى و گازێن ژه‌هراوى لناڤ هه‌واى و ئه‌ردى به‌لاڤ دكه‌ن و پشتى دووڤچۆنا رێڤه‌به‌رییا فه‌رمانگه‌ها ژینگه‌ها دهۆك هه‌ر هه‌موو هاتنه‌ سزادان و كۆژمه‌یێ گشتیێ وێ سزادانێ گه‌هشته‌ 112 ملیۆن دیناران و بسپۆره‌كێ زانستى ژى خویا دكه‌ت كو ڤێت پالاوگه‌هـ هه‌ڤالێن ژینگه‌هێ بن و فلته‌رێن بهێز بكاربینن.

 
ژ 52 پالاوگه‌هان 37 هاتنه‌ دائێخستن
رێڤه‌به‌رێ فه‌رمانگه‌ها ژینگه‌ها پارێزگه‌ها دهۆك محه‌مه‌د تاهر بۆ دواڕۆژ دیاركر" پشتى بڕیارا ئه‌نجوومه‌نێ وه‌زیران بۆ دائێخستنا پالاوگه‌هێن نه‌یاسایى ل سنۆرێ پارێزگه‌ها دهۆك ژ سه‌رجه‌مێ 52 پالاوگه‌هان 37 هاتنه‌ دائێخستن و ب تنێ 15 هێلان كو 7 ب دروستى كار دكرن و ڤێ دووماهیێ پێزانین گه‌هشتنه‌ رێڤه‌به‌ریێ كو ئه‌و 7 پالاوگه‌هـ ب شه‌ڤ بدزیڤه‌ كار دكه‌ن بێى كو مه‌شعه‌لێن سۆتنێ یێن پاشمایێن نه‌فتێ بده‌نه‌ كارى بۆ هندێ ئه‌و هێزێن تایبه‌ت یێن ل وێ ده‌ڤه‌رێ هه‌ین ئاگه‌هدار نه‌بن و پشتى دووڤچۆنا فه‌رمانگه‌ها ژینگه‌هێ ئه‌و راستى ئاشكرا بوو و هه‌ر هه‌موو ب كۆژمه‌یێن جودا كو سه‌رجه‌مێ وان دبوونه‌ 112 ملیۆن دینار هاتنه‌ سزادان چونكو به‌شه‌ك ژوان بۆ جارا سیێ یه‌ ئه‌ڤان سه‌رپێچییان دكه‌ن".

ل دادگه‌هێ سكالا ل سه‌ر دوو پالاوگه‌هان هاتییه‌ تۆماركرن 
سه‌باره‌ت جۆرێن سزادانا ڤان پالاوگه‌هان و رێنومایێن تایبه‌ت ب سزادانێ محه‌مه‌د تاهر خویاكر" ئه‌گه‌ر ئێكه‌م جار بیت ئه‌و پالاوگه‌هـ سه‌رپێچى كربیت دێ ب كۆژمه‌یێ 8 ملیۆن دیناران هێته‌ سزادان و ئه‌گه‌ر بۆ جارا دووێ بیت دێ ب 24 ملیۆن دیناران هێته‌ سزادان و ئه‌ڤ جاره د دووڤچۆنێ دا 2 پالاوگه‌هـ هاتنه‌ ده‌ستنیشانكرن كو بۆ جارا سیێ بوون سه‌رپێچى دكر له‌وا دێ ئێكسه‌ر ل دادگه‌هێ سكالا ل سه‌ر هێنه‌ تۆماركرن".

ئه‌ڤ پالاوگه‌هێن هه‌نێ ب شه‌ڤ و ب دزیڤه‌ كاره‌كێ نه‌یاسایى دكر
ئه‌رێ ژ سه‌رجه‌مێ 52 پالاوگه‌هان چ ژوان ب دروستاهى مۆله‌تا كاركرنێ نه‌بوون؟ بۆ به‌رسڤا ڤێ پرسیارێ رێڤه‌به‌رێ فه‌رمانگه‌ها ژینگه‌هێ گۆت" بتنێ 7 ژوان به‌شه‌ك ژ رێنومایێن وه‌زاره‌تا سامانێن سروشتى بجهت دئینا له‌وا رێك ب وان هاتبوودان لسه‌ر كاركرنێ به‌رده‌وام بن لێ پشتى دووڤچۆنی دیار بوو ئه‌وان ب شه‌ڤ بێى كو مه‌شعه‌ل و فلته‌ران بده‌نه‌ كارى كارێ پالاوتنا نه‌فتێ دكر و هه‌ر هه‌موو ژه‌هر و دۆهن د هه‌وا و ئاخێ دا به‌لاڤ دبوون و ب ڤى ره‌نگى زیانێن مه‌زن گه‌هاندنه‌ ژینگه‌هێ له‌وا ب شێوه‌یه‌كێ گشتى ب كۆژمه‌یێ 112 ملیۆن دیناران هاتنه‌ سزادان".

ئه‌و زیانێن د ڤان پالاوگه‌هان دا هه‌ى گه‌له‌ك پتره‌ ژ مفایێ وان و وه‌ك بسپۆره‌كێ زانستى دده‌ته‌ خویاكرن د پرۆسه‌یه‌كا دومدرێژ دا مرۆڤ دێ ئێكسه‌ر تووشى نه‌خۆشیێن گران وه‌كو په‌نجه‌شێرێ بن.

د پرۆسه‌یه‌كا دۆمدرێژ دا گازێن ژه‌هراوى مرۆڤان تووشى په‌نجه‌شێرێ دكه‌ن
ره‌مه‌زان حه‌مزه‌ بسپۆرێ زانستى كارێ ڤان پالاوگه‌هان دوور ژ رێنومایێن ژینگه‌هێ دبینیت و بۆ دواڕۆژ دیاركر" پاشمایێن ڤان پالاوگه‌هان ب مه‌شعه‌لێن سه‌ر كورت و بێى فلته‌ر دهێنه‌ ژناڤبرن له‌وا كاریگه‌ریێن وان هه‌ر دمینن و هه‌موو ئه‌و ژه‌هر د هه‌وا و لسه‌ر گیا و داروبارى دمینیت و دووڤدا ئاژه‌ل دخۆن و ئێدى مرۆڤ ژى دێ گوشتێ ئاژه‌لى خون و ب ڤى ره‌نگى د پرۆسه‌یه‌كا دۆمدرێژ دا مرۆڤ دێ تووشى رێژه‌یه‌كا مه‌زن ژ ژه‌هرێ و پاشى نه‌خۆشیێن گران وه‌كو په‌نجه‌شێرێ بن و نوكه‌ ل تاخێن وه‌كو زڕكا وكێڤلا كو نێزیكى سه‌نته‌رێ باژێڕێ دهۆكێ نه‌ ئه‌ڤ نیشانه‌ دهێنه‌ دیتن و وه‌لاتى ب خۆ گازنده‌ ل سه‌ر شێوازێ كاركرنا ڤان پالاوگه‌هان هه‌یه‌".

دڤێت مه‌شعه‌لێن بلند و فلته‌رێن زۆر بهێز بكاربینن
ب گۆره‌ى زانستێ نوو دڤێت هه‌موو پالاوگه‌هـ هه‌ڤالێن ژینگه‌هێ بن و سیسته‌مێ كاركرنا وان د چارچووڤه‌یه‌كێ توندێ زانستى دابن، ره‌مه‌زان حه‌مزه‌ سه‌ر ڤى بابه‌تى خویاكر" دڤێت مه‌شعه‌لێن زۆر بلند و فلته‌رێن زۆر بهێز و پێشكه‌فتى بۆ كارێ سۆتنا نه‌فتێ بهێته‌ بكارئینان داكو ئه‌و گازێن ژه‌هراوى بهێنه‌ ژناڤبرن و نه‌گه‌هنه‌ سێ ژێده‌رێن سه‌ره‌كى یێن ژیانێ كو ئه‌وژى (ئاڤ، ئاخ و هه‌وا)نه‌".

دووراتییا مرۆڤان ژ ڤان پالاوگه‌هان رێژه‌یا تووشبوون ب نه‌خۆشییان كێمتر لێ دكه‌ت و وه‌كو بسپۆرێ زانستى دده‌ته‌ دیاركرن" ئه‌و خه‌لكێ ل نێزیك ڤان كۆمه‌لگه‌هان دژین تووشى نه‌خۆشیێن ته‌نگییا نه‌فه‌سێ و پیسبوونا سیهان و چه‌ندین نه‌خۆشیێن دى دبن".

وێستگه‌ها كاره‌با كواشێ ژى دشێت زیانێ بگه‌هینته‌ ژینگه‌هێ
سه‌رۆكێ لژنه‌یا پیشه‌سازیێ ل جڤاتا پارێزگه‌ها دهۆك عه‌بدولسه‌مه‌د تێلى پێشتر بۆ دواڕۆژ خویاكربوو" وێستگه‌ها كاره‌با كواشێ ژى رێژه‌یه‌كا مه‌زنا دووكێلێ په‌یدا دكه‌ت، لێ چونكو نوكه‌ ژ پێنج یه‌كه‌یێن وێ ب تنێ ئێك كار دكه‌ت دووكێلا وێ كێم بوویه‌، لێ ئه‌گه‌ر بهێت كو هه‌موو كار بكه‌ن دێ بنه‌ ئه‌گه‌رێ بێزاركرنا وه‌لاتیێن ره‌خودۆرێن ده‌ڤه‌را پیشه‌سازییا كواشێ".



created by Avesta Group and powered by Microsoft Azure