لەسەر بە قەزا ناوهێنانی هەڵەبجە وەزارەتی کشتوکاڵ روونکردنەوە دەدات

هەواڵ / کوردستان :: 07/09/2019‌ :: 386‌ جار بینراوە
پارێزگاى هەڵەبجە

دواڕۆژ، عەلی حەمەسەعید

دوای ئەوەی لە نوسراوێکی فەرمیدا وەزارەتی کشتوکاڵ و سەرچاوەکانی هەرێم هەڵەبجەى وەک قەزایەکی سەر بە پارێزگای سلێمانی ئەژمارکردبوو، لەوبارەیەوە هۆکاری بەقەزا ناوهێنانی هەڵەبجەی روونکردەوە.


لە روونکردنەوەکەی وەزارەتی کشتوکاڵ و سەرچاوەکانی ئاودا، کە وێنەیەکی دەست دواڕۆژ کەوتووە، ئەوەخراوەتەڕوو: دواى ئاراستەکردنى نووسراوێکى وەزارەتمان بۆ (وەزارەتى کشتوکاڵى حکومەتى عێراق/ دەستەى گشتى رووپێوى) پەیوەست بە ئیفرازکردنى چەند پارچە زەوییەک لە سنوورى پارێزگاى هەڵەبجە، کە لە نووسراوەکەماندا بە (قەزاى هەڵەبجە لە پارێزگاى سلێمانى) ئاماژەى پێکراوە. هەندێک کەس رەخنەى ئەوەیان گرت کە پارێزگاى هەڵەبجە بە قەزا ناوبراوە.

روونیشیدەکاتەوە: تاکو ئێستا لە هەندێک دامەزراوەى حکومەتى ناوەندى رێکارى پێویست نەگیراوەتەبەر بۆ چەسپاندنى ناوى هەڵەبجە وەک پارێزگایەکى عێراق، بەتایبەت لەو ئاستانەى فەرمانگە و دەستەن و سەر بە وەزارەتەکانن و نووسراوەکەى وەزارەتمان تایبەت بوو بە ئیفرازکردنى زەوى کە تاکو ئێستا لە عێراق کار بە تەسویەى زەویوزارى ساڵى (١٩٥٠) دەکرێت، کە لەوێدا نەک هەڵەبجە، هێشتا دهۆک وەک پارێزگا ناوى نەهاتووە، بەڵکو بە قەزاى دهۆک پارێزگاى نەینەوا ناوى هەیە.

لە بەشێکی دیکەی روونکردنەوەکەدا ئەوەش هاتووە: هۆکارەکەى لەبەردەست  نەبوونى تەسویە و نەخشەیەکى نوێى زەویوزارى عێراقە، ئێمەش بۆ ئەوەى کاروبارەکان بەزوویى رایى بکرێن بە هەمان ناونیشان کە لەسەر نەخشەکانى لاى دەستەى گشتى رووپێوى عێراق هەیە ناونیشان و ژمارەى پارچە زەوییەکانمان ناردووە. ئەگەر بە ناونیشانە نوێیەکەى هەڵەبجە داواى راییکردنى کارەکەمان بکردایە لاى ئەوان ناونیشانەکە نەدەدۆزرایەوە و کارەکان دوادەکەوتن، یان نەدەکران.

لە کۆتایی روونکردنەوەکەی وەزارەتی کشتوکاڵ ئەوەخراوەتەڕوو: وەک وەزارەتى کشتوکاڵ و سەرچاوەکانى ئاو لە حکومەتى هەرێمى کوردستاندا دووپاتیدەکەینەوە کە لە کۆبوونەوەکانماندا لەگەڵ حکومەتى ناوەندى کاردەکەین بۆ ئەوەى هەڵەبجە لە هەموو ئەو دامەزراوانەى ئێمە سەر و سەودامان لەگەڵیاندا هەیە وەک پارێزگا ناوەکەى بچەسپێنرێت.

پێداچونەوە: شیروان شەریف



created by Avesta Group and powered by Microsoft Azure