دابەشكردنی زەوی بەسەر ئەم چینەدا دەستپێدەكات

هەواڵ / کوردستان :: 06/09/2019‌ :: 2451‌ جار بینراوە

دواڕۆژ، عەلی حەمە سەعید


لەپارێزگای هەڵەبجە 500 پارچە زەوی دابەشدەكرێت بەسەر كەسوكاری شەهیدانی شارەكەدا دابەشدەكرێت و رێككارە ئیدارییەكان لە سەروبەندی تەواو بووندان.


بەرێوەبەری گشتی شەهیدان و ئەنفالكراوانی هەڵەبجە ئاماژە بەوە دەكات سەرجەم كاروبارەكانی تایبەت بەپێدانی زەوی بە كەسوكاری شەهیدانی كیمیابارانی هەڵەبجە و شەهیدانی سەنگەر و شەهیدانی دەستی تیرۆر و شەهیدانی شەڕی داعش كۆتایی هاتووە و ناوەكانمان ئاڕاستەی شارەوانی كردوون كە 500 پارچە زەوییە و لە چاوەڕوانی شارەوانی هەڵەبجەداین بۆ دابەشكردنی زەوییەكان.

كامەران مستەفا، بەڕێوەبەری گشتی شەهیدان و ئەنفالكراوانی هەڵەبجە بەدواڕۆژی ڕاگەیاند "بەهۆی ئەوەی ئەو زەوییانەی كە وابڕیارە بەسەر كەسوكاری شەهیداندا دابەشبكرێن لە ڕووی یاسایی و هونەرییەوە گرفتیان هەبوو، بۆیە دابەشكردنیان دواكەت، بەڵام ئێمە كارئاسانیمان كردووە بۆ سەرۆكایەتی شارەوانی بۆ چارەسەر كردنی گرفتەكان و دابەشكردنیان".

ئاماژەی بەوەشكرد، بەهۆی ئەوەی لەئێستادا زەوییەكان (سورە القید)یان نییە، بەڵام پێشنیازی ئەوەمانكردووە بۆ شارەوانی كە زەوییەكان دابەشبكرێن بەسەر كەسوكاری شەهیدان، دواتر دەتوانرێت ئەو ڕێككارە ئیداریی و یاساییانەی دیكە تەواو بكرێن، بۆ ئەو مەبەستەش وابڕیارە لەگەڵ پارێزگاری هەڵەبجە و شارەوانی كۆبونەوەیەك ئەنجامبدەین و وادەیەك دیاریبكرێت بۆ دابەشكردنی زەوییەكان.

بەڕێوەبەری گشتیی كاروباری شەهیدان و ئەنفالكراوانی هەڵەبجە ئەوەشی خستەڕوو، زیاتر لە 500 وارسی شەهید سوودمەند دەبن لەوەرگرتنی زەویی و سەرجەم ژمارە و ناوەكانمان ئاڕاستەی شارەوانی هەڵەبجە كردووە، كە كەسوكاری شەهیدانی سەنگەر و شەڕی داعش و لایەنە سیاسییەكان و شەهیدانی دەستی تیرۆر دەگرێتەوە.

پێداچوونەوە و بڵاوكردنەوە: ئارام غەفور 



created by Avesta Group and powered by Microsoft Azure