بازارێ دهۆك خێر ژ حكومه‌تا نوو نه‌دیتییه

هەواڵ / ئابوری :: 03/09/2019‌ :: 116‌ جار بینراوە

دواڕۆژ، دهۆك


پشتی ده‌ر‌بازبوونا دوو مه‌هان ژ راگه‌هاندنا كابینه‌یا نوو یا حكومه‌تا هه‌رێما كوردستانێ، ل پارێزگه‌ها دهۆك، كرین وفرۆتنا كه‌لوپه‌لێن بازرگانی، ئه‌رد و خانوویان، كه‌ره‌سته‌یێن ئاڤاكرنێ و ترۆمبێلان، چو لڤینێن باشتر و بازاره‌كێ خوه‌شتر نه‌بوویه‌.

شه‌ش‌ مه‌هێن به‌ری راگه‌هاندنا كابینه‌یا نوو یا حكومه‌تا هه‌رێما كوردستانێ، ل سنوورێ پارێزگه‌ها دهۆك هه‌لئاواسانه‌كا به‌رچاڤ بخوه‌ڤه‌گرتبوو، داخوازییا وه‌لاتییان لسه‌ر هه‌موو پێدڤیێن رۆژانه‌ و ئه‌رد و خانوویان و ترۆمبێلان زێده‌ببوو، لێ پشتی پێكهینانا حكومه‌تێ، بازرگان و وه‌لاتی ژ بازاری ڤه‌ره‌ڤین‌.

ده‌رباره‌ی ڤێ مژارێ، نزار دێرگژنیكی، خۆدانێ نڤێسینگه‌ها كرین و فرۆتنا ئه‌رد و خانوویان ل دهۆك بۆ دواڕۆژ گۆت:"به‌ری راگه‌هاندنا كابینه‌یا نوو یا حكومه‌تا هه‌رێما كوردستانێ، رۆژانه،‌ بگشی 5 پارچه‌یێن ئه‌ردی دكرین و دفرۆتن، لێ ئه‌ڤه‌ دوو مه‌هه‌، كێم رۆژان وان پارچه ئه‌رده‌ك كرییه‌ یان فرۆتییه‌".

لدۆر هه‌مان مژار، ژیار نه‌بی، بازرگانێ جلۆبه‌رگان زه‌لالكر:"دوو مه‌هن بازارێ جلۆبه‌رگان، گه‌له‌ك لاوازبوویه‌، چنكو وه‌لاتی گه‌له‌ك ب هۆشییاری پاره‌ی بكاردهینن، چنكو ئه‌و دترسن جاره‌كادی قه‌یرانه‌كا نوو چێبیت و گه‌له‌ك باوه‌ری ب حكومه‌تا نوو ناهێت".

ده‌رباره‌ی ترسا وه‌لاتییان و مووچه‌خۆران ژ خه‌رجكرنا پاره‌ییان، محه‌مه‌د ره‌شید، ئابۆری ناس بۆ دواڕۆژ گۆت:"تا نوكه‌، حكومه‌تێن هه‌رێما كوردستانێ و ئیراقێ، لدۆر چاره‌سه‌ركرنا هه‌موو ئاریشه‌یێن بۆدجه‌ و مووچه‌یێن هه‌رێما كوردستانێ نه‌گه‌هشتینه‌ رێككه‌ڤتنه‌كا پشتراستكه‌ر كو بودجه‌ و مووچه‌یێن هه‌رێما كوردستانێ ناهێنه‌ بڕین".

ناڤبۆری ئاماژه‌كر:"بلندبوونا ده‌نگێن ئۆپۆزسیۆنا ئیراقێ بۆ بڕینا به‌شه‌ك ژ بۆدجه‌یا هه‌رێما كوردستانێ، به‌رامبه‌ر وێ چه‌ندێ كو هه‌رێما كوردستانێ 250 هزار به‌رمیلێن په‌ترۆلێ راده‌ستی سۆمۆ ناكه‌ت، ئه‌گه‌ره‌ وه‌لاتی ژ بازاری ب ره‌ڤن و چاڤه‌رێنه‌ حكومه‌تا هه‌رێما كوردستانێ، وان پشتراست بكه‌ت كو سالێن بهێت چو ئاریشه‌ بۆ مووچه‌یێن فه‌رمانبه‌ران و بۆدجه‌یا هه‌رێمێ چێنابن".

مه‌ها ده‌ربازبووی فراكسیۆنێن كوردان ل جڤاتا نوونه‌رێن ئیراقێ داكۆكی كرن كو مژارا هنارتنا مووچه‌یێن فه‌رمانبه‌رێن هه‌رێما كوردستانێ ژ چوارچوڤێ هه‌موو دانوستاندنێن ناڤبه‌را حكومه‌تان و فراكسیۆنان بهێته‌ ده‌رئێخستن و نه‌بیته‌ مژارا دانوستاندنا ناڤبه‌را چو ئالیان دا ئاریشه‌ بۆ مووچه‌ خۆرێن كورد چێنه‌بن.

د.جه‌مال كۆچه‌ر، ئه‌ندامێ جڤاتا نوونه‌رێن ئیراقێ بۆ دواڕۆژ خوه‌یاكر:"ئه‌گه‌ر هه‌تا ده‌ستپێكا سالا 2020-ێ، چو ئاریشه‌ لسه‌ر بۆدجه‌یا هه‌رێم كوردستانێ چێنه‌بن، مووچه‌خۆرێن هه‌رێما كوردستانێ دێ ب ره‌نگه‌كێ ئاسایی مووچه‌یێن خوه‌ وه‌رگرن واته‌ چو مه‌ترسی لسه‌ر مووچه‌یێن وان نابیت".

كۆچه‌ر دزانین:"ئه‌و وه‌لاتیێن هه‌رێما كوردستانێ پشتراست دكه‌ن، حكومه‌تا ئیراقێ نه‌شێت مووچه‌یێن فه‌رمانبه‌رێن هه‌رێما كوردستانێ ببڕیت و نابیت ژ به‌ر ڤێ چه‌ندێ وه‌لاتیێن كورد ژ بازاری دووركه‌ڤن".

نه‌بوونا هه‌ولدان و چاره‌سه‌ریێن حكومه‌تا نوو یا هه‌رێما كوردستانێ بۆ راگرتنا شه‌ڕ و ئالۆزیێن ناڤبه‌را پارتییا كاركه‌رێن كوردستان (په‌كه‌كه‌) و له‌شكه‌رێ تركیا لسه‌ر رووبه‌رێ نێزیكی 30% ژ ده‌ڤه‌رێن دهۆك، خوه‌یانه‌بوونا ئه‌دائا درووست یا حكومه‌تێ بۆ مژارێن ئابۆری و بازرگانی ژ ئه‌گه‌رێن سه‌ره‌كی یێن نه‌بوونا بازاره‌كێ باشه‌.

ل گۆره‌ی دیتنێن هه‌موو چاڤدێران و شاره‌زایان، پشتی شه‌ش مه‌ها، روویێ راست یێ هه‌موو حكومه‌تێن نوو به‌رامبه‌ر‌ پرسێن جۆدا خوه‌یا دبیت، وه‌لاتیێن دهۆك ژی د ڤی بازارێ نه‌خوه‌ش دا دێ چاڤه‌رێی ده‌ر‌بازبوونا شه‌ش مه‌هێن ئێكێ یێن حكومه‌تا نوویا هه‌رێما كوردستانێ بن.

 

ب: ک. س



  • ڕۆژ
  • هەفتە
  • مانگ
created by Avesta Group and powered by Microsoft Azure

بەپەلە